ચીઝી પનીર બાટી

બાટીનો જ પ્રકાર! પણ ચીઝી… પનીરવાળી યમ્મી! વળી તળ્યા વગરની!!! તો હેલ્ધી પણ હોય જ!

સામગ્રીઃ

  • ઘઉંનો લોટ 1 કપ
  • બારીક રવો 3 ટી.સ્પૂન
  • ઘી 1 ટે.સ્પૂન
  • મીઠું સ્વાદ મુજબ
  • અજમો ½ ટી.સ્પૂન

પૂરણ માટેઃ

  • પનીર 200 ગ્રામ
  • મોઝરેલા ચીઝ 4 ટે.સ્પૂન
  • ચીઝ ક્યુબ 1
  • લીલા મરચાં 2
  • કાળા મરી પાઉડર ½ ટી.સ્પૂન
  • ચાટ મસાલો ½ ટી.સ્પૂન
  • આદુનો ટુકડો 2 ઈંચ
  • બાફેલા મકાઈના દાણા 3 ટે.સ્પૂન
  • ચિલી ફ્લેક્સ 2 ટે.સ્પૂન
  • પિઝા સિઝનિંગ 2 ટે.સ્પૂન
  • નાનું ટામેટું 1
  • સિમલા મરચું 1
  • સમારેલી કોથમીર 4 ટે.સ્પૂન

રીતઃ ઘઉંના લોટમાં રવો, મીઠું સ્વાદ મુજબ, અજમો મેળવીને ઘીનું મોણ આપો. ત્યારબાદ થોડું થોડું પાણી ઉમેરીને પુરી જેવો લોટ બાંધીને તેની ઉપર ભીનો રૂમાલ ઢાંકીને 10 મિનિટ રહેવા દો.

બાટીનું પૂરણ તૈયાર કરવા માટે એક વાસણમાં પનીર તેમજ ચીઝ ક્યુબ ખમણી લો. તેમાં મોઝરેલા ચીઝ મેળવી દો. સ્વાદ મુજબ મીઠું, આદુ ખમણીને અને મરચાં સમારીને તેમજ ટામેટું અને સિમલા મરચું ચોરસ નાના ટુકડામાં સમારીને ઉમેરી દો. બાદમાં કાળા મરી પાઉડર, ચાટ મસાલો, બાફેલા મકાઈના દાણા, ચિલી ફ્લેક્સ, પિઝા સિઝનિંગ, સમારેલી કોથમીર મેળવીને પૂરણ તૈયાર કરી લો.

બાંધેલા લોટમાંથી મોટો લૂવો લઈ તેને હાથેથી થોડો થાપીને વાટકીનો આકાર આપી દો. કિનારીવાળો ભાગ પાતળો અને વચ્ચે થોડું જાડું પડ રાખવું. તેમાં વચ્ચે 1થી 2 ચમચી જેટલું પૂરણ અથવા તેમાં આવે તેટલું ભરીને ચારેકોર કિનારી ભેગી કરીને પેક કરીને ગોળો વાળી દો. ઉપરના ભાગમાં ચમચીના હાથા વડે ક્રોસ પાડી દો. જેથી ડિઝાઈન સારી પડે અને બાટી સારી શેકાય જાય.

બાટી શેકવા માટે અપ્પે પેનનો ઉપયોગ કરી શકાય તેના ખાનામાં ઘી અથવા તેલ લગાડીને બાટી ગોઠવીને પેન ઢાંકી દો. ગેસની ધીમી-મધ્યમ આંચે 10 મિનિટ બાટી શેકાય એટલે પેન ખોલીને એક ચમચીથી બાટી ઉથલાવી જુઓ. જો નીચેનો ભાગ શેકાયો હોય તો બધી બાટી ઉથલાવીને પેન ઢાંકીને ફરીથી 10 મિનિટ બાટી તૈયાર થવા દો. ત્યારબાદ ગેસ બંધ કરીને બાટી ઉતારીને ગરમાગરમ પીરસો.

અપ્પે પેન ન હોય તો કૂકરમાં 500 ગ્રામ જેટલું મીઠું પાથરી તેની ઉપર કાંઠો અથવા સ્ટેન્ડ મૂકીને કૂકરને ગેસ ઉપર 10 મિનિટ ગરમ થવા દો. ત્યારબાદ ગેસની આંચ ધીમી કરી દો. ઘી ચોપડેલી થાળીમાં બાટી આવે તેટલી ગોઠવી દો. ગરમ થયેલા કૂકરમાં સ્ટેન્ડ ઉપર આ થાળી મૂકીને કૂકર બંધ કરી દો 4-5 મિનિટ બાદ કૂકર ખોલી જુઓ. જો બાટી શેકાઈ હોય તો બધી બાટી ઉથલાવીને ફરીથી કૂકર બંધ કરીને બાટી સરખી શેકાવા દો. 4-5 મિનિટ બાદ બાટી તૈયાર થઈ જાય એટલે ગેસ બંધ કરીને કૂકર ઠંડું થાય એટલે બાટી કાઢી લો.

તૈયાર બાટી ટોમેટો કેચ-અપ અથવા લીલી ચટણી સાથે પીરસો.