Home Blog Page 3

શિક્ષણ મંત્રાલયની કમાન હવે પ્રહ્લાદ જોશીના હાથમાં

રાષ્ટ્રપતિ દ્રૌપદી મુર્મૂએ કેન્દ્રીય શિક્ષણ મંત્રી ધર્મેન્દ્ર પ્રધાનનું રાજીનામું મંજૂર કરી લીધું છે. હવે કેન્દ્રીય મંત્રી પ્રહ્લાદ જોશીને શિક્ષણ મંત્રાલયની કમાન સોંપવામાં આવી છે. રાષ્ટ્રપતિ ભવન દ્વારા જારી કરવામાં આવેલા અધિકૃત નિવેદન અનુસાર, ભારતના રાષ્ટ્રપતિએ વડાપ્રધાનની સલાહ પર, ભારતીય બંધારણના આર્ટિકલ 75 ના ક્લોઝ (2) હેઠળ તાત્કાલિક અસરથી કેન્દ્રીય મંત્રીપરિષદમાંથી ધર્મેન્દ્ર પ્રધાનનું રાજીનામું સ્વીકારી લીધું છે. આ ઉપરાંત, વડાપ્રધાનની ભલામણ પર રાષ્ટ્રપતિએ નિર્દેશ આપ્યો છે કે કેબિનેટ મંત્રી પ્રહ્લાદ જોશીને તેમના વર્તમાન પોર્ટફોલિયો ઉપરાંત શિક્ષણ મંત્રાલયનો વધારાનો પ્રભાર સોંપવામાં આવે.

કોણ છે નવા શિક્ષણ મંત્રી પ્રહ્લાદ જોશી?

પ્રહ્લાદ જોશી કર્ણાટકના ધારવાડથી સાંસદ છે. તેઓ હાલમાં કન્ઝ્યુમર અફેર્સ, ફૂડ એન્ડ પબ્લિક ડિસ્ટ્રિબ્યુશન, અને ન્યૂ એન્ડ રિન્યૂએબલ એનર્જી (MNRE) ના કેન્દ્રીય મંત્રી તરીકે સેવા આપી રહ્યા છે. આ સાથે તેઓ ઇન્ટરનેશનલ સોલર અલાયન્સના પ્રેસિડેન્ટ પણ છે.

ધર્મેન્દ્ર પ્રધાને રાજીનામા અંગે શું કહ્યું?

ધર્મેન્દ્ર પ્રધાને શનિવારે કેન્દ્રીય શિક્ષણ મંત્રીના પદ પરથી પોતાના રાજીનામાની જાહેરાત કરતી વખતે જણાવ્યું હતું કે, આ નિર્ણય વિદ્યાર્થીઓના ભવિષ્યની રક્ષા કરવા અને દિલ્હીના જંતર-મંતર પર યુવાનોના મોટા પાયાના વિરોધ પ્રદર્શનોનો ફાયદો ઉઠાવવાથી દેશવિરોધી તાકાતોને રોકવા માટે લેવામાં આવ્યો છે. નરેન્દ્ર મોદી સરકારમાં કોઈ સીનિયર મંત્રી દ્વારા સતત રોડ પર ચાલી રહેલા વિરોધ પ્રદર્શનો અને રાજકીય દબાણ વચ્ચે પદ છોડવાનું આ એક દુર્લભ ઉદાહરણ છે.

CJP ના પ્રદર્શન બાદ સરકાર ઝૂકી અને નવી ચેતવણી

આ રાજીનામું કેન્દ્ર સરકાર અને ‘કોકરોચ જનતા પાર્ટી’ (CJP) વચ્ચે ત્રીજા રાઉન્ડની વાટાઘાટો થવાના થોડા કલાકો પહેલાં જ આવ્યું છે. બેઠક પહેલાં CJP નેતાઓએ સ્પષ્ટ કર્યું હતું કે ધર્મેન્દ્ર પ્રધાનનું રાજીનામું “નોન-નેગોશિયેબલ” (બિન-સમજૂતીપાત્ર) છે અને તેમણે તેને પોતાના આંદોલનની મુખ્ય માંગ બનાવી હતી. પ્રહ્લાદ જોશીની નિમણૂક બાદ કોકરોચ જનતા પાર્ટીના મુખ્ય પ્રવક્તા સૌરવ દાસે નવા શિક્ષણ મંત્રીને ચેતવણી આપતા કહ્યું, યુવાનોએ ચેતવણી આપી છે કે જે પણ કેન્દ્રીય શિક્ષણ મંત્રી બનશે, જો તેમના મુદ્દાઓ પર ધ્યાન આપવામાં નહીં આવે, તો તેઓ ફરીથી જંતર-મંતર પર પાછા ફરશે અને સરકાર પાસે જવાબદેહીની માંગ કરશે.

અંબાજીથી શરૂ થશે ધાર્મિક પરંપરાના રક્ષણનું રાજ્યવ્યાપી અભિયાન

અંબાજી : જગપ્રસિદ્ધ શક્તિપીઠ ખાતે સનાતન ધર્મ, શાસ્ત્રોક્ત પરંપરાઓ અને કર્મકાંડી ભૂદેવોના પરંપરાગત અધિકારોના સંરક્ષણ અર્થે સનાતન ધર્મ સંસદ દ્વારા એક મહત્ત્વની બેઠક યોજવામાં આવી હતી. મહામંડલેશ્વર પરમ પૂજ્ય ડોક્ટર જ્યોતિનાથજીના અધ્યક્ષ સ્થાને યોજાયેલી આ બેઠકમાં અંબાજી મંદિરના દેવસ્થાન ટ્રસ્ટના વહીવટ, ધાર્મિક બાબતોમાં વહીવટી હસ્તક્ષેપ, સેવાઓના વ્યાપારીકરણ અને ભ્રષ્ટાચાર અંગે ગંભીર ચિંતા વ્યક્ત કરવામાં આવી હતી.વહીવટી નિર્ણયો અને વ્યાપારીકરણ સામે વિરોધ

સનાતન ધર્મ સંસદે ભારપૂર્વક જણાવ્યું કે, ધર્મશાસ્ત્ર, આગમશાસ્ત્ર કે શાસ્ત્રોક્ત પરંપરાઓની પૂરતી સમજ વિના સરકારી અધિકારીઓ દ્વારા લેવાતા નિર્ણયોને કારણે શ્રદ્ધાળુઓની આસ્થાને ઠેસ પહોંચી રહી છે. ધાર્મિક સ્થળોના વહીવટી નિર્ણયો લેતા પહેલાં શાસ્ત્રમર્મના વિદ્વાનોની સલાહ લેવી અનિવાર્ય છે.

આરોપ લગાવ્યો હતો કે પારદર્શિતાના અભાવે વિવિધ દેવસ્થાન ટ્રસ્ટોમાં વ્યાપારીકરણ અને ગેરરીતિઓ વધી રહી છે. મંદિર ટ્રસ્ટોનો મૂળ હેતુ શ્રદ્ધાળુઓની સુવિધા અને ધર્મસેવા હોવો જોઈએ, નહીં કે માત્ર આવક વધારવાનો.

સનાતન ધર્મ સંસદની મુખ્ય માંગણીઓ

  • ધાર્મિક વિધિઓનું વ્યાપારીકરણ બંધ કરવું: ધ્વજારોહણ, યજ્ઞશાળા અને ચંડીપાઠ જેવી પવિત્ર વિધિઓનું વ્યાપારીકરણ તાત્કાલિક ધોરણે અટકાવવું.

  • ભૂદેવોના અધિકારોનું રક્ષણ: સ્થાનિક કર્મકાંડી ભૂદેવોના પરંપરાગત હક્કો અને અધિકારો જાળવી રાખવા.

  • પારદર્શક તપાસ: ભંડારા ગણતરીના છેલ્લા ૧૨ મહિનાના CCTV ફૂટેજ જાહેર કરી નિષ્પક્ષ તપાસ કરવી તેમજ ચેરિટેબલ ટ્રસ્ટના નામે થતી ફરજિયાત વસૂલાતની તપાસ કરવી.

  • વહીવટદારનું રાજીનામું: અંબાજી મંદિરના વહીવટદાર તાત્કાલિક રાજીનામું આપે.

  • ૫૧ શક્તિપીઠોમાં નૈવેદ્ય પુનઃ શરૂ કરવું: વડાપ્રધાન નરેન્દ્રભાઈ મોદીના મુખ્યમંત્રી કાળ દરમિયાન સ્થાપિત ૫૧ શક્તિપીઠોની પ્રાણપ્રતિષ્ઠિત મૂર્તિઓમાં કોવિડ સમયથી બંધ કરાયેલ દૈનિક થાળ અને નૈવેદ્યની પરંપરા તુરંત ચાલુ કરવી.સમગ્ર રાજ્યના યાત્રાધામોમાં યોજાશે સંસદ

આ અભિયાન માત્ર અંબાજી પૂરતું મર્યાદિત નહીં રહે. આગામી સમયમાં ડાકોર, સોમનાથ, દ્વારકા, સાળંગપુર અને પાવાગઢ સહિત ગુજરાતના તમામ પ્રમુખ યાત્રાધામોમાં સનાતન ધર્મ સંસદ યોજાશે. સ્થાનિક પ્રશ્નો, વહીવટી પારદર્શિતા અને પરંપરાઓના જતન અંગેની રજૂઆતો એકત્ર કરી રાજ્ય સરકાર સમક્ષ મુકવામાં આવશે.

આ બેઠકમાં સમસ્ત બ્રહ્મ સમાજ, પરશુરામ પરિવાર, વર્લ્ડ બ્રાહ્મણ ઓર્ગેનાઈઝેશન, શ્રી પરશુરામ ફાઉન્ડેશન, કરણી સેના, પાટીદાર સમાજ, ક્ષત્રિય સમાજ, વણિક સમાજ સહિત વિવિધ સામાજિક સંગઠનોના અગ્રણીઓ અને મોટી સંખ્યામાં ઋષિપુત્રો ઉપસ્થિત રહ્યા હતા.

ITRની મુદતમાં ગુજરાત માટે વધારો કરવાની CBDTને વિનંતી

અમદાવાદઃ હાલ ગુજરાત રાજ્ય છેલ્લાં અનેક વર્ષોમાં ન જોવા મળેલા અતિ ભારે વરસાદ અને પૂર જેવી વિકટ પરિસ્થિતિમાંથી પસાર થઈ રહ્યું છે. સતત અને વિક્રમજનક વરસાદને કારણે રાજ્યના અનેક વિસ્તારોમાં પાણી ભરાવા, પૂર, વીજ પુરવઠામાં ખલેલ અને સામાન્ય જનજીવન સંપૂર્ણપણે પ્રભાવિત થયું છે.

ભારતીય હવામાન વિભાગે આગામી દિવસોમાં પણ ભારે વરસાદ ચાલુ રહેવાની આગાહી કરી છે. આવી અસાધારણ પરિસ્થિતિમાં કરદાતાઓ અને કરવ્યવસાયિકો માટે નિયત સમયમર્યાદામાં આવકવેરા રિટર્ન ભરવું અત્યંત મુશ્કેલ બન્યું છે.

મુખ્ય મુશ્કેલીઓ

  • ગુજરાતમાં અભૂતપૂર્વ વરસાદ અને પૂર.
  • 24 જુલાઈ, 2026એ અમદાવાદમાં માત્ર 24 કલાકમાં 294.6 મિમી વરસાદ નોંધાયો.
  • અનેક તાલુકાઓમાં જનજીવન ઠપ, બચાવ કામગીરી માટે NDRF, SDRF, સેના અને કોસ્ટ ગાર્ડની મદદ લેવાઈ રહી છે.
  • CA, ટેક્સ કન્સલ્ટન્ટ અને તેમના ગ્રાહકોની ઓફિસો સામાન્ય રીતે કાર્ય કરી શકતી નથી.
  • IMD દ્વારા 29 જુલાઈ, 2026 સુધી ભારે વરસાદની આગાહી તથા નવસારી અને વલસાડ માટે રેડ એલર્ટ જાહેર.
  • વીજળી અને ઇન્ટરનેટ સેવાઓમાં વ્યાપક વિક્ષેપ.
  • આવકવેરા ઈ-ફાઇલિંગ પોર્ટલ પર ટેક્નિકલ સમસ્યાઓ:
    • ધીમો પ્રતિસાદ
    • ટાઈમ-આઉટ
    • પ્રી-ફિલ્ડ માહિતીમાં ક્ષતિઓ
    • Form 26AS, AIS અને TIS મેળવવામાં મુશ્કેલીઓ
  • સમયસર મુદતવધારાની જાહેરાત કરવાથી કરદાતાઓ અને ટેક્સ પ્રોફેશનલ્સ પરનો તણાવ ઘટશે.

રજૂ કરાયેલી વિનંતી

ઉપરોક્ત પરિસ્થિતિને ધ્યાનમાં રાખીને ગુજરાત રાજ્ય માટે આકારણી વર્ષ 2026–27 ના નોન-ઓડિટ આવકવેરા રિટર્ન ભરવાની નિયત તારીખમાં ઓછામાં ઓછા 15 દિવસનો વધારો કરવાની વિનંતી ચેમ્બર દ્વારા કરવામાં આવી છે, એમ ડાયરેક્ટ ટેક્સ કમિટીના ચેરમેન CA (ડો.) જૈનિક વકીલે જણાવ્યું હતું.

વિગત હાલની નિયત તારીખ સૂચિત નવી તારીખ
નોન-ઓડિટ ITR-1 અને ITR-2 31 જુલાઈ, 2026 15 ઓગસ્ટ, 2026
નોન-ઓડિટ ITR-3 અને ITR-4 31 ઓગસ્ટ, 2026 15 સપ્ટેમ્બર, 2026

 

આ લોકશાહીની જીત છે, CJP અને યુવા પેઢીને શુભેચ્છાઃ સોનમ વાંગચુક

નવી દિલ્હીઃ કેન્દ્રીય શિક્ષણ મંત્રી ધર્મેન્દ્ર પ્રધાને શનિવારે બપોરે CJPની માગને ધ્યાનમાં રાખીને રાજીનામું વડા પ્રધાન નરેન્દ્ર મોદીને મોકલી આપ્યું છે. ત્યાર બાદ સોનમ વાંગચુકે નિવેદન જાહેર કરીને CJP અને GenZ (યુવા પેઢી)ને અભિનંદન પાઠવ્યાં હતાં. તેમણે કહ્યું હતું કે કેન્દ્રીય શિક્ષણ મંત્રીના રાજીનામા સાથે લોકશાહીની જીત થઈ છે.

ધર્મેન્દ્ર પ્રધાને પોતાના પત્રમાં જણાવ્યું કે તેઓ છેલ્લા ચાર દાયકાથી વધુ સમયથી વિદ્યાર્થી, શિક્ષક અને શિક્ષણ સુધાર માટે સમર્પિત રહ્યા છે. દેશના યુવાનોની આશાઓ, લાગણીઓ અને અપેક્ષાઓનો તેઓ સન્માન કરે છે અને ભારતની યુવા પેઢીના સપનાઓ સાકાર કરવું સૌનું નૈતિક કર્તવ્ય છે. તેમણે વધુમાં કહ્યું કે ત્રીજી મે, 2026એ યોજાયેલી NEET UG પરીક્ષામાં ગેરરીતિઓ સામે આવી હતી, જેને સરકારે ગંભીરતાથી લીધી અને તપાસ CBIને સોંપી હતી.

આ લોકશાહીની જીત છે – સોનમ વાંગચુક

સોનમ વાંગચુકે સોશિયલ મિડિયા પ્લેટફોર્મ X પર લખ્યું હતું કે આ લોકશાહીની જીત છે. આ સીધી લોકશાહી છે, જે રસ્તાઓ પરથી ઊભી થઈ છે. આ શાંતિ, ધીરજ અને અડગ સંકલ્પની જીત છે. CJP અને દેશના GenZને અભિનંદન તેમ જ દેશના દરેક ખૂણેથી નિર્ભય બની અવાજ ઉઠાવનારા તમામ નાગરિકોનો આભાર. હવે જવાબદારી નક્કી થયા પછી સુધારાની દિશામાં આગળ વધવાનો સમય છે.

અમે કોઈનું પણ રાજીનામું અપાવી શકીએ છીએ – અભિજિત દીપકે

આ પહેલા CJPના સ્થાપક અભિજિત દીપકેએ પણ પ્રતિક્રિયા આપી હતી. તેણે કહ્યું હતું કે કેન્દ્રીય શિક્ષણ મંત્રી ધર્મેન્દ્ર પ્રધાને રાજીનામું આપી દીધું છે. આ રાજીનામું એ વાતનો પુરાવો છે કે જો તમે ડરતા નથી અને સરકાર સામે ઝૂકતા નથી, તો અમે કોઈનું પણ રાજીનામું અપાવી શકીએ છીએ.

Nutshell in 99

લખનૌમાં ધર્માંતરણ રેકેટનો પર્દાફાશઃ સાત આરોપીઓ ઝડપાયા

લખનૌઃ ઉત્તર પ્રદેશની રાજધાની લખનૌના મોહનલાલગંજ પોલીસ સ્ટેશન વિસ્તારમાં આંતરરાજ્યીય ધર્માંતરણ રેકેટનો પર્દાફાશ થયો છે. રાત્રિના અંધકારમાં બોલેરો ગાડીમાં ગામડાઓમાં પહોંચીને લોકોને નિશાન બનાવતી આ ટોળકીનું જાળું તામિલનાડુથી લઈને ઉત્તર પ્રદેશના અનેક જિલ્લાઓ સુધી ફેલાયેલું હોવાનું પોલીસ તપાસમાં સામે આવ્યું છે. પોલીસે આ મામલે ટોળકીના મુખ્ય સૂત્રધાર પાસ્ટર અને તેની પત્ની સહિત કુલ સાત આરોપીઓની ધરપકડ કરીને જેલ હવાલે કર્યા છે. તેમની પાસેથી ધાર્મિક સાહિત્ય, ધર્માંતરણ સંબંધિત પુસ્તિકાઓ, બેંક સ્ટેટમેન્ટ, બોલેરો વાહન અને એક રહસ્યમય ડાયરી પણ જપ્ત કરવામાં આવી છે, જેને આધારે તપાસને નવી દિશા મળી છે.

આ રીતે કરાવતા હતા ધર્માંતરણ

દક્ષિણ ઝોનના એડિશનલ ડીસીપી રલ્લાપલ્લી વસંતકુમારે જણાવ્યું કે સમગ્ર મામલાની શરૂઆત એક પ્રેમકથાથી થઈ હતી. પોલીસ પૂછપરછ દરમિયાન મુખ્ય આરોપી ડેનિયલે ખુલાસો કર્યો કે તેનું મૂળ નામ બાલા સુબ્રમણ્યમ છે અને તે મૂળ તામિલનાડુનો રહેવાસી છે. 16 વર્ષની ઉંમરે તેને સુબલા નામની એક ખ્રિસ્તી યુવતી સાથે પ્રેમ થયો હતો. યુવતીના કહેવા પર તેણે પોતાનો ધર્મ બદલી લીધો અને લગ્ન બાદ તેનું નામ ડેનિયલ રાખવામાં આવ્યું. ત્યાર બાદ તે તામિલનાડુના એફજીપીસી ચર્ચ સાથે જોડાયો અને ધર્માંતરણની પ્રવૃત્તિઓ શરૂ કરી.

વર્ષ 1998માં આ દંપતીને લખનૌ મોકલવામાં આવ્યાં હતાં અને ડેનિયલને વારાણસી સર્કલનો પાસ્ટર બનાવી ધર્મપ્રચારની જવાબદારી સોંપવામાં આવી હતી. એડિશનલ ડીસીપીના જણાવ્યાનુસાર ચર્ચ તરફથી દર વર્ષે વધુમાં વધુ લોકોને ધર્માંતરણ કરાવવાનો લક્ષ્યાંક આપવામાં આવતો હતો. તેના બદલામાં ચર્ચ દ્વારા મોટા પ્રમાણમાં નાણાકીય સહાય મોકલવામાં આવતી હતી. આ ટોળકી ગરીબ અને લાચાર ગ્રામજનોને નિશાન બનાવતી હતી. ઘૂંટણના દુખાવાનો ઈલાજ, અસાધ્ય બીમારીઓમાંથી મુક્તિ, આર્થિક મુશ્કેલીઓ દૂર કરાવવાની ખાતરી, લગ્ન કરાવવાની મદદ અને સંતાન પ્રાપ્તિ જેવાં લોભામણા વચનો આપી ‘પ્રાર્થના સભા’ને નામે લોકોનું બ્રેનવોશ કરવામાં આવતું હતું.

આ રીતે આરોપીઓ ઝડપાયા

મામલો ત્યારે બહાર આવ્યો જ્યારે મોહનલાલગંજના ભરસવા ગામના રહેવાસી અમિત કુમારે આ પ્રવૃત્તિનો વિરોધ કર્યો. આરોપીઓએ તેમના પર ધર્મ બદલવાનું દબાણ કર્યું અને ગંભીર પરિણામો ભોગવવાની ધમકી આપતા ગામલોકોમાં રોષ ફાટી નીકળ્યો. બુધવારે રાત્રે બોલેરોમાં આવેલા આરોપીઓને ગ્રામજનોએ ઝડપી પાડ્યા અને પોલીસને સોંપી દીધા હતા.

Breaking News: કેન્દ્રિય શિક્ષણ મંત્રી ધર્મેન્દ્ર પ્રધાને આપ્યું રાજીનામું

NEET પરીક્ષાના પેપર લીક મામલે ચાલી રહેલા પ્રદર્શન વચ્ચે કેન્દ્રીય શિક્ષણ મંત્રી ધર્મેન્દ્ર પ્રધાને પોતાના પદ પરથી રાજીનામું આપી દીધું છે. જૂનમાં પેપર લીક થવાના કારણે દેશભરના વિદ્યાર્થીઓમાં ભારે રોષ ફેલાયો હતો, જેના કારણે દિલ્હીમાં વિદ્યાર્થીઓ, કાર્યકરો અને વિપક્ષી પક્ષો દ્વારા મોટા પાયે વિરોધ પ્રદર્શનો ચાલી રહ્યાં છે.

દેશની સૌથી મોટી મેડિકલ પ્રવેશ પરીક્ષા NEET પેપર લીકને લઈ ચાલી રહેલા વ્યાપક વિરોધ અને દબાણ વચ્ચે કેન્દ્રીય શિક્ષણ પ્રધાન ધર્મેન્દ્ર પ્રધાને શનિવારે રાજીનામું આપ્યું. તેમણે વડા પ્રધાન નરેન્દ્ર મોદીને પોતાનું રાજીનામું સુપરત કર્યું. મેડિકલ વિદ્યાર્થીઓના ભવિષ્યને લગતા આ સંવેદનશીલ મુદ્દા પર સરકારની વ્યાપક ટીકા થઈ હતી અને આ રાજીનામાને પરીક્ષા પ્રણાલીમાં જવાબદારી સ્થાપિત કરવા તરફના એક મોટા પગલા તરીકે જોવામાં આવી રહ્યું છે.

નોંધનીય છે કે કોકરોચ જનતા પાર્ટી (CJP) એ પેપર લીક થયા બાદ શરૂઆતમાં ધર્મેન્દ્ર પ્રધાનના રાજીનામાની માંગ કરી હતી અને તે પોતાના નિર્ણય પર અડગ રહી હતી. આજે સરકાર અને CJP વચ્ચે બીજા રાઉન્ડની વાટાઘાટો પહેલા કેન્દ્રીય શિક્ષણ પ્રધાને પોતાનું રાજીનામું સુપરત કર્યું.

ધર્મેન્દ્ર પ્રધાને સોશિયલ મીડિયા પર પોસ્ટ શેર કરી

સોશિયલ મીડિયા પ્લેટફોર્મ X પર એક પોસ્ટમાં, ધર્મેન્દ્ર પ્રધાને પોતાનો રાજીનામું પત્ર જાહેર કર્યો. તેમાં તેમણે લખ્યું,”મારા યુવા સાથીઓ, હું ચાર દાયકાથી વધુ સમયથી વિદ્યાર્થીઓ, શિક્ષકો અને શિક્ષણ સુધારા માટે સમર્પિત છું. મેં હંમેશા માન્યું છે કે એક મજબૂત, સમાવેશી અને દૂરંદેશી શિક્ષણ પ્રણાલી એ એક મજબૂત રાષ્ટ્રનો પાયો છે.હું દેશના યુવાનોની આકાંક્ષાઓ, લાગણીઓ અને ન્યાયી અપેક્ષાઓનો ખૂબ આદર કરું છું. ભારતની યુવા પેઢીના સપનાઓને પૂર્ણ કરવા એ આપણા બધાની રાજકીય અને સામાજિક જીવનમાં નૈતિક પ્રતિબદ્ધતા રહી છે. પ્રધાનમંત્રીના દૂરંદેશી નેતૃત્વ હેઠળ રાષ્ટ્રની સેવા કરવાની તક મળવા બદલ હું તેમનો આભાર વ્યક્ત કરું છું.”

ધર્મેન્દ્ર પ્રધાને NEET પેપર લીક અંગે શું કહ્યું?

તેમણે આગળ લખ્યું,”3 મે, 2026 ના રોજ યોજાયેલી NEET-UG પરીક્ષામાં અનિયમિતતાઓ મળી આવી હતી. ભારત સરકારે તાત્કાલિક આ બાબતની નોંધ લીધી, તપાસ CBI ને સોંપી, પરીક્ષા રદ કરી અને નવી પરીક્ષા તારીખ જાહેર કરી. આવતા વર્ષથી CBT મોડમાં પરીક્ષા લેવાનો પણ નિર્ણય લેવામાં આવ્યો.”

CJPનું એલાન: 26 જુલાઈએ દેશભરમાં કાઢવામાં આવશે કેન્ડલ માર્ચ

નવી દિલ્હીઃ CJPએ રવિવાર, 26 જુલાઈએ દેશભરમાં કેન્ડલ માર્ચ યોજવાનું આહવાન કર્યું છે. પાર્ટીના જણાવ્યા મુજબ આ કેન્ડલ માર્ચ સાંજે છ વાગ્યે યોજાશે અને તેમાં મોટી સંખ્યામાં લોકો જોડાય તેવી અપેક્ષા છે. પાર્ટીએ પોતાના સમર્થકો, વિદ્યાર્થીઓ, વાલીઓ, શિક્ષકો અને સામાન્ય નાગરિકોને આ કાર્યક્રમમાં શાંતિપૂર્ણ રીતે ભાગ લેવા અપીલ કરી છે.પાર્ટીએ જણાવ્યું છે કે માર્ચ સંપૂર્ણપણે શાંતિપૂર્ણ રીતે યોજવામાં આવશે અને તમામ ભાગ લેનારાઓને કાયદાનું પાલન કરવા તેમ જ શાંતિ જાળવવા વિનંતી કરવામાં આવી છે. CJP એ દેશનાં વિવિધ શહેરો અને રાજ્યોમાં લોકોને સાંજે છ વાગ્યે યોજાનારા કેન્ડલ માર્ચમાં જોડાઈને પોતાનું સમર્થન વ્યક્ત કરવા અનુરોધ કર્યો છે.

દિલ્હી પોલીસ લોકોને અટકાવવાનું અને ડરાવવાનું બંધ કરે: CJP

CJPએ દિલ્હી પોલીસને તાત્કાલિક અસરથી નાગરિકોને જંતર-મંતર પહોંચતા અટકાવવાનું, તેમને ડરાવવાનું અથવા અટકાયતમાં લેવાનું બંધ કરવાની માગ કરી છે. પાર્ટીનો આરોપ છે કે વિરોધ પ્રદર્શન સ્થળની આસપાસ “ભય અને ઘેરાબંધી” જેવું વાતાવરણ ઊભું કરવામાં આવ્યું છે. CJPના પ્રવક્તા સૌરવ દાસે X પર શેર કરાયેલી એક પોસ્ટમાં પાર્ટીનું નિવેદન શેર કરતાં જણાવ્યું હતું કે
મહત્વપૂર્ણ નિવેદન: કોકરોચ જનતા પાર્ટી @DelhiPolice ને માગ કરે છે કે તેઓ નાગરિકોને જંતર-મંતર પહોંચતા ગેરકાયદે રીતે અટકાવવાનું, ડરાવવાનું અથવા રોકવાનું તરત બંધ કરે અને જંતર-મંતરની આસપાસ ભય અને ઘેરાબંધીનું વાતાવરણ ઊભું કરવાનું ટાળે.

મોદીજીની રીલ્સ ગુસ્સે ભરાયેલા વિદ્યાર્થીઓને રોકી શકશે નહીં: CJP

CJPના આશુતોષ રાંકાએ કહ્યું: જો મોદીજી રાત્રે રીલ્સ બનાવી રહ્યા છે, તો તે સ્પષ્ટ દર્શાવે છે કે વ્યવસ્થામાં ઊથલપાથલ ચાલી રહી છે. પહેલા તમે જે ‘કઠોર પગલાં’ લેવાની વાત કરી હતી તે લો અને ધર્મેન્દ્ર પ્રધાનનું રાજીનામું અપાવો. ત્યાર બાદ રીલ્સ બનાવો, અમે તેને પણ શેર કરીશું.

તાજેતરના એક વિડિયોમાં વડા પ્રધાન નરેન્દ્ર મોદીએ યુવાનોનો આભાર વ્યક્ત કર્યો હતો, જેમણે તેમનો અગાઉનો સંદેશ જોયો હતો અને સકારાત્મક સૂચનો આપ્યાં હતાં.

મુંબઈમાં ઠાકરે બંધુઓ દ્વારા વિદ્યાર્થીઓના સમર્થનમાં તિરંગા યાત્રા યોજાશે

NEET પેપર લીક મામલે જવાબમાં મહારાષ્ટ્રમાં રાજ ઠાકરે અને ઉદ્ધવ ઠાકરેના નેતૃત્વમાં તિરંગા યાત્રા કાઢવામાં આવશે. રાજ ઠાકરેએ પોતે આ અંગે પત્ર લખીને માહિતી આપી છે.

NEET પેપર લીક મામલે રાજ ઠાકરે અને ઉદ્ધવ ઠાકરેના નેતૃત્વમાં આવતીકાલે એટલે કે રવિવારે તિરંગા યાત્રા કાઢવામાં આવશે. રાજ ઠાકરેએ પોસ્ટ કરી છે કે આવતીકાલની કૂચ કોઈપણ રાજકીય પક્ષના ધ્વજ વિના યોજાશે.

રાજ ઠાકરેએ આ યાત્રાને લઈને દરેકને પત્ર પણ લખ્યો છે. રાજ ઠાકરેએ લખ્યું,’મારા તમામ મહારાષ્ટ્રના સૈનિકો અને શિવસૈનિકોના નામે, પ્રેમથી, જય મહારાષ્ટ્ર! આગામી 26મી જુલાઈએ, અમે NEET પરીક્ષામાં ગેરરીતિઓ, વિદ્યાર્થીઓના ચાલી રહેલા આંદોલન અને આ આંદોલનને દબાવવાના સરકારના પ્રયાસોના વિરોધમાં ‘તિરંગા માર્ચ’નું આયોજન કરી રહ્યા છીએ. તમે બંને પક્ષોના કેન્દ્રીય કાર્યાલય અને નેતાઓ પાસેથી આ વિશે માહિતી મેળવી હશે.’

તેમણે ઉમેર્યુ કે,’આ ‘તિરંગા માર્ચ’ કેન્દ્ર સરકાર અને દિલ્હી પોલીસના વલણ સામે શાંતિપૂર્ણ વિરોધ નોંધાવવા માટે કાઢવામાં આવી રહી છે. સાથે જ, તેનો ઉદ્દેશ્ય એવો સંદેશ આપવાનો છે કે સમગ્ર મહારાષ્ટ્ર વિદ્યાર્થીઓ, તેમના પરિવારો અને જેઓ પોતાનો વિરોધ નોંધાવવા દિલ્હી જઈ શકતા નથી કે મુંબઈ આવી શકતા નથી તેમની સાથે છે.’

આ સંપૂર્ણ બિનરાજકીય કૂચ હશેઃ રાજ ઠાકરે

તેમણે કહ્યું કે,’આ સંપૂર્ણ બિનરાજકીય કૂચ હશે. તેમાં કોઈ રાજકીય પક્ષનો ઝંડો નહીં હોય, કોઈ પક્ષ કે તેના નેતાઓના સમર્થનમાં કોઈ સૂત્રોચ્ચાર કરવામાં આવશે નહીં. માત્ર સરકાર સામે વિરોધ કરવામાં આવશે અને સમગ્ર દેશમાં વિદ્યાર્થીઓ અને યુવાનોના સમર્થનમાં અવાજ ઉઠાવવામાં આવશે. ભલે મેં અને ઉદ્ધવજીએ આ કૂચ માટે હાકલ કરી છે, પરંતુ નારા લગાવવા જોઈએ નહીં અને બધા વિદ્યાર્થીઓના નામથી આ કૂચને સફળ બનાવીશું. સંપૂર્ણ વિશ્વાસ રાખો. કોઈ પણ આ કૂચને વિક્ષેપિત કરવાની હિંમત કરશે નહીં, કારણ કે દરેકને ખબર છે કે અમે શું કરી શકીએ છીએ. જો કે, જો કેટલાક લોકો વાતાવરણને બગાડવાનો પ્રયાસ કરે છે, ખોટા સૂત્રોચ્ચાર કરે છે અથવા ત્યાં હાજર વાલીઓ સાથે, ખાસ કરીને મહિલાઓ અને વિદ્યાર્થીનીઓ સાથે દુર્વ્યવહાર કરે છે, તો શાંતિથી તેમને નજીકમાં હાજર પોલીસને સોંપો. જ્યાં પોલીસ હાજર ન હોય, તમે બધા પાસે પરિસ્થિતિનો યોગ્ય રીતે સામનો કરવાનો અનુભવ અને ક્ષમતા છે.’

મને ખાતરી છે કે તમે બધા આવશોઃ રાજ

રાજ ઠાકરેએ જણાવ્યુ કે,’મહારાષ્ટ્રના સૈનિકો અને શિવસૈનિકોને મોટી સંખ્યામાં જોડાવા માટે અપીલ કરવાની જરૂર નથી, કારણ કે મને ખાતરી છે કે તમે બધા આવશો. પરંતુ તમારી સાથે શક્ય તેટલા વિદ્યાર્થીઓ અને તેમના માતા-પિતાને પણ લાવો, સમગ્ર કૂચ દરમિયાન તેમની સંભાળ રાખો અને તેમને સુરક્ષિત રીતે ઘરે પહોંચવામાં મદદ કરો. મને બાકીની સરકારો વિશે ખબર નથી, પરંતુ મને વિશ્વાસ છે કે મહારાષ્ટ્ર પોલીસ બાળકોના જીવન અને ભવિષ્ય સાથે જોડાયેલા આ મુદ્દા પર અમારી સાથે છે.તો ચાલો 26 જુલાઈએ સવારે 10 વાગ્યે શિવાજી પાર્કમાં છત્રપતિ શિવાજી મહારાજની પ્રતિમા પાસે એકઠા થઈએ. અમે તમારી, વિદ્યાર્થીઓ અને તેમના માતાપિતાની રાહ જોઈ રહ્યા છીએ. ચાલો આપણે દિલ્હીને શાંતિપૂર્ણ રીતે બતાવીએ કે દેશના લોકોના મનમાં કેટલો ગુસ્સો છે. તમારા, રાજ ઠાકરે.”

વિદ્યાર્થીઓની ત્રણ માગ પર કોઈ સમાધાન નહીં: રાહુલ ગાંધી

નવી દિલ્હીઃ લોકસભામાં વિરોધ પક્ષના નેતા રાહુલ ગાંધીએ શનિવારે વિદ્યાર્થીઓ સાથે પ્રેસ કોન્ફરન્સ કરી હતી. તેમણે જણાવ્યું હતું કે વિદ્યાર્થીઓની ત્રણ મુખ્ય માગ છે અને આ માગ પર કોઈ પણ પ્રકારનું સમાધાન કરવામાં આવશે નહીં. તેમણે કહ્યું હતું કે પ્રથમ માગ શિક્ષણ મંત્રી ધર્મેન્દ્ર પ્રધાનના રાજીનામાની છે અને આ મુદ્દે કોઈ ચર્ચા કે સમાધાન સ્વીકાર્ય નથી.

વિદ્યાર્થીઓની ત્રણ માગ એવી છે કે જેના પર કોઈ સમજૂતી થઈ શકે નહીં. પ્રથમ માગ એ છે કે શિક્ષણ મંત્રી, જે ભ્રષ્ટ, અયોગ્ય અને ખોટી વિચારસરણી ધરાવે છે, તેમને પદ પરથી દૂર કરવામાં આવે.વડા પ્રધાન નરેન્દ્ર મોદીની કેબિનેટમાં એવી ચર્ચા ચાલી રહી છે કે સમસ્યાનો ઉકેલ ધર્મેન્દ્ર પ્રધાનને શિક્ષણ મંત્રાલયમાંથી હટાવીને અન્ય કોઈ મંત્રાલયમાં મોકલવાનો છે, પરંતુ ભારતના વિદ્યાર્થીઓને આ સ્વીકાર્ય નથી. ધર્મેન્દ્ર પ્રધાન ભ્રષ્ટાચાર અને દેશનાં બાળકોના ભવિષ્ય સાથે થયેલા અન્યાયનું પ્રતીક બની ગયા છે. તેમને એક મંત્રાલયમાંથી બીજા મંત્રાલયમાં ખસેડવાથી કોઈ ફેર પડશે નહીં; તેમને પદ પરથી દૂર કરવા જ પડશે, એમ તેમણે કહ્યું હતું.

બીજી માગ એ છે કે વિદ્યાર્થીઓ સામે કાર્યવાહી કરનારા દિલ્હી પોલીસના અધિકારીઓની જવાબદારી નક્કી કરવામાં આવે. તેમણે આરોપ લગાવ્યો કે વિદ્યાર્થીઓ સામે પેલેટ ગનનો ઉપયોગ કરવામાં આવ્યો હતો અને આ મામલે જવાબદાર અધિકારીઓ સામે કાર્યવાહી થવી જોઈએ. તેમણે કહ્યું હતું કે વિદ્યાર્થીઓ પર થયેલા હુમલા માટે વડા પ્રધાન મોદીએ માફી માંગવી જોઈએ. કોંગ્રેસ નેતાએ વિદ્યાર્થીઓને સંબોધતાં કહ્યું હતું કે તેમને વિદ્યાર્થીઓ પર ગર્વ છે. વિદ્યાર્થીઓ ડરવાના નથી અને તેઓ દેશના ભવિષ્યનું પ્રતિનિધિત્વ કરે છે. વિદ્યાર્થીઓ ભારતનું ભવિષ્ય છે, જ્યારે નરેન્દ્ર મોદી ભારતનો ભૂતકાળ છે, એમ તેમણે જણાવ્યું હતું.

1234...5,165Page 3 of 5,165