Home Blog Page 1001

અમેરિકા-હોંગકોંગ ટ્રેડ ટકરાવ, ટેરિફ અને ડાક ખર્ચમાં વધારાની અસર

અમેરિકન રાષ્ટ્રપતિ ડોનાલ્ડ ટ્રમ્પની આક્રમક ટેરિફ નીતિઓએ વૈશ્વિક વેપારમાં નવો તણાવ સર્જ્યો છે, અને હોંગકોંગ સરકારે આના જવાબમાં કડક પગલાં લેવાની જાહેરાત કરી છે. ટ્રમ્પે ગત સપ્તાહે 800 ડૉલરથી ઓછી કિંમતના આયાતી પેકેજો પર અગાઉ આપવામાં આવતી ટેરિફ છૂટ (ડી મિનિમિસ રૂલ) બંધ કરવાનો નિર્ણય જાહેર કર્યો હતો, જેના પગલે હોંગકોંગે અમેરિકન પાર્સલની ડિલિવરી અને સપ્લાય બંધ કરવાનો વળતો નિર્ણય લીધો છે. આ ઘટનાએ બંને દેશો વચ્ચે વેપારી સંબંધોમાં નવો ટકરાવ સર્જ્યો છે.

હોંગકોંગ સરકારે અમેરિકા પર આક્ષેપ લગાવ્યો છે કે, ટ્રમ્પ તંત્ર અયોગ્ય વ્યવહાર, ધમકીઓ અને ગેરવાજબી ટેરિફ લાદી રહ્યું છે. હોંગકોંગના અધિકારીઓએ જણાવ્યું કે, આવી નીતિઓથી તેમના નાગરિકોને વધુ પડતો અને અન્યાયી ટેક્સનો બોજ સહન કરવો પડશે. અગાઉ અમેરિકામાં 800 ડૉલરથી ઓછી કિંમતના નાના પાર્સલો પર કોઈ ટેરિફ લાગુ નહોતું, પરંતુ ટ્રમ્પના નવા નિર્ણયથી આ છૂટ ખતમ કરી દેવાઈ છે, જે ખાસ કરીને ઈ-કોમર્સ કંપનીઓ અને ગ્રાહકો માટે મોટો ફટકો છે. હોંગકોંગે આના જવાબમાં અમેરિકન પાર્સલની ડિલિવરી અને સપ્લાય પર પ્રતિબંધ મૂકવાનો નિર્ણય લઈને વળતો પ્રહાર કર્યો છે.

ટ્રમ્પ તંત્રે 800 ડૉલરથી ઓછી કિંમતની આયાતી પ્રોડક્ટ્સ પર 90 ટકા ટેરિફ લાદવાની જાહેરાત કરી છે, જે અગાઉ 30 ટકાની યોજના હતી. આનો અર્થ એ થયો કે, વિદેશથી આવતી પ્રોડક્ટની કિંમતના 90 ટકા જેટલી રકમ ટેક્સ તરીકે ચૂકવવી પડશે. ઉદાહરણ તરીકે, 100 ડૉલરની પ્રોડક્ટ પર 90 ડૉલરનો ટેક્સ લાગશે, જેનાથી ગ્રાહકો માટે આયાતી વસ્તુઓની કિંમત નોંધપાત્ર રીતે વધી જશે. આ નિર્ણયથી ખાસ કરીને ચીન, હોંગકોંગ અને દક્ષિણપૂર્વ એશિયાઈ દેશોમાંથી આયાત થતી ઈ-કોમર્સ પ્રોડક્ટ્સ પર મોટી અસર પડશે, જે અગાઉ ડી મિનિમિસ રૂલનો લાભ લઈને ટેક્સ-ફ્રી આવતી હતી.

ટેરિફ ઉપરાંત, ટ્રમ્પ સરકારે ડાક ખર્ચમાં પણ નોંધપાત્ર વધારો કર્યો છે. અગાઉ 2 મે થી 1 જૂન, 2025 વચ્ચે આયાતી પાર્સલો પર 25 ડૉલરનો ડાક ખર્ચ લાદવાની યોજના હતી, પરંતુ હવે તેને વધારીને 75 ડૉલર કરી દેવાયો છે. આ ઉપરાંત, 1 જૂન, 2025 પછી ડાક ખર્ચને 50 ડૉલરથી વધારીને 150 ડૉલર કરવાની યોજના જાહેર કરવામાં આવી છે. આનાથી આયાતી પાર્સલોની કિંમતમાં ભારે વધારો થશે, જેની સીધી અસર ગ્રાહકો અને ઈ-કોમર્સ કંપનીઓ પર પડશે.

ટ્રમ્પની આ નીતિઓએ વૈશ્વિક વેપારમાં અસ્થિરતા સર્જી છે. હોંગકોંગના પ્રતિબંધને કારણે અમેરિકન ગ્રાહકો અને વ્યવસાયોને નાના પાર્સલોની ડિલિવરીમાં મુશ્કેલીનો સામનો કરવો પડી શકે છે, જે ખાસ કરીને ઈ-કોમર્સ પ્લેટફોર્મ્સ જેવા કે Temu અને Shein જેવી કંપનીઓ માટે નુકસાનકારક હશે, જે હોંગકોંગ દ્વારા મોટા પ્રમાણમાં પાર્સલો મોકલે છે. બીજી તરફ, આ નિર્ણયથી અમેરિકન ગ્રાહકોને આયાતી વસ્તુઓની કિંમતમાં વધારો અને મર્યાદિત પસંદગીનો સામનો કરવો પડશે, જેનાથી મોંઘવારીનું દબાણ વધશે.

અમેરિકન અર્થતંત્ર પર પણ આ નીતિઓની નકારાત્મક અસર પડી રહી છે. નિષ્ણાતોના મતે, ટેરિફ અને ડાક ખર્ચમાં વધારાથી અમેરિકન ગ્રાહકોને 2025માં દરેક ઘરગથ્થુએ સરેરાશ 1,300 ડૉલરનો વધારાનો ખર્ચ સહન કરવો પડી શકે છે. આ ઉપરાંત, વૈશ્વિક બજારોમાં થયેલી અસ્થિરતાએ શેરબજારોમાં મોટો કડાકો નોંધાવ્યો છે, જેમાં એક અઠવાડિયામાં 6.6 ટ્રિલિયન ડૉલરનું નુકસાન થયું હતું.

હોંગકોંગના નિર્ણયથી અમેરિકા સાથેના વેપારી સંબંધોમાં વધુ તિરાડ પડવાની શક્યતા છે. હોંગકોંગે અમેરિકન પાર્સલની ડિલિવરી બંધ કરવાની જાહેરાત કરીને સ્પષ્ટ સંદેશ આપ્યો છે કે, તે ટ્રમ્પની ધમકીઓ અને એકતરફી નીતિઓને નહીં સહન કરે. આ ઉપરાંત, હોંગકોંગે પોતાના નાગરિકોને ગેરવાજબી ટેક્સનો બોજ સહન કરવા તૈયાર રહેવાની ચેતવણી આપી છે, જેનાથી સ્થાનિક સ્તરે પણ આર્થિક અસરો જોવા મળી શકે છે.

ટ્રમ્પની ટેરિફ અને ડાક ખર્ચ વધારવાની નીતિઓએ વૈશ્વિક વેપારમાં મોટો ઉથલપાથલ સર્જ્યો છે. હોંગકોંગની વળતી કાર્યવાહીએ આ ટ્રેડ વૉરને વધુ જટિલ બનાવ્યો છે, જેની અસર બંને દેશોના ગ્રાહકો, વ્યવસાયો અને અર્થતંત્ર પર પડશે. આ ઘટનાઓથી વૈશ્વિક સપ્લાય ચેઈનમાં વિક્ષેપ, મોંઘવારીમાં વધારો અને આર્થિક અસ્થિરતાની શક્યતા વધી છે. ભવિષ્યમાં આ ટકરાવ કઈ દિશામાં જશે, તેના પર વૈશ્વિક બજારો અને નીતિ નિર્માતાઓની નજર રહેશે.

સુનિલ શેટ્ટી અને શ્રદ્ધા કપૂરનું થશે આ એવોર્ડથી સન્માન

ટૂંક સમયમાં જ લતા દીનાનાથ મંગેશકર નાટ્યગ્રહમાં ગુરુ દીનાનાથ મંગેશકરની 83મી પુણ્યતિથિ ઉજવવામાં આવશે. આ પ્રસંગે એક કાર્યક્રમનું પણ આયોજન કરવામાં આવશે, જેમાં કલા ક્ષેત્ર સાથે સંકળાયેલી અનેક હસ્તીઓને સન્માનિત કરવામાં આવશે. આ કાર્યક્રમ 24 એપ્રિલના રોજ સાંજે વિલે પાર્લે (વેસ્ટ), મુંબઈ ખાતે યોજાશે.

આ લોકોનું સન્માન કરવામાં આવશે

આદિત્ય બિરલા ગ્રુપના ચેરમેન પદ્મ વિભૂષણ કુમાર મંગલમ બિરલાને તેમના દૂરંદેશી નેતૃત્વ અને ભારતના વિકાસમાં યોગદાન બદલ લતા દીનાનાથ મંગેશકર પુરસ્કાર એનાયત કરવામાં આવશે. ઉપરાંત, સુનીલ શેટ્ટી, શ્રદ્ધા કપૂરને ભારતીય સિનેમામાં તેમના યોગદાન બદલ સન્માનિત કરવામાં આવશે. સોનાલી કુલકર્ણીને થિયેટર અને ફિલ્મોમાં તેમના ઉત્કૃષ્ટ કાર્ય માટે એવોર્ડ મળશે. ગાયિકા રીવા રાઠોડને પણ લતા દીનાનાથ મંગેશકર એવોર્ડ આપવામાં આવશે. સાહિત્યમાં વાગ્વિલાસિની એવોર્ડ શ્રીપાલજી સબનીસને આપવામાં આવશે.

આ કાર્યક્રમમાં રંગભૂમિ અને ફિલ્મ કલાકાર શરદ પોંક્ષે અને અભિનેતા સચિન પિલગાંવકરના અભિનય અને દિગ્દર્શન ફિલ્મોને પ્રકાશિત કરવામાં આવશે અને તેમને પુરસ્કારોથી સન્માનિત પણ કરવામાં આવશે.

મોહન ભાગવત પણ આ કાર્યક્રમમાં ભાગ લેશે

પંડિત હૃદયનાથ મંગેશકર સમારોહની અધ્યક્ષતા કરશે અને મોહન ભાગવત દ્વારા સન્માન આપવામાં આવશે. આ કાર્યક્રમ માસ્ટર દીનાનાથ મંગેશકર સ્મૃતિ પ્રતિષ્ઠાન અને હૃદયેશ આર્ટ્સ દ્વારા સંયુક્ત રીતે આયોજિત કરવામાં આવશે. પંડિત હૃદયનાથ મંગેશકરે કહ્યું, ‘દર વર્ષે અમે એવા વ્યક્તિઓનું સન્માન કરીએ છીએ જેઓ માસ્ટર દીનાનાથજીએ પોતાના જીવનમાં જે સમર્પણ, શ્રેષ્ઠતા અને સેવાની ભાવના દર્શાવી હતી તેને મૂર્તિમંત કરે છે.’ આ તહેવાર ફક્ત ભૂતકાળને શ્રદ્ધાંજલિ જ નહીં, પણ વર્તમાન અને ભવિષ્ય માટે એક મશાલ પણ છે.

બિહારના મુઝફ્ફરપુરમાં દલિત વસાહતમાં ભયંકર આગ, પાંચ બાળકોના મોત, 15 ગુમ

બિહારના મુઝફ્ફરપુર જિલ્લાના રામપુર મની પંચાયતમાં આવેલી દલિત વસાહતમાં 15 એપ્રિલ, 2025ના રોજ મોડી રાત્રે લાગેલી ભયાનક આગે આખા ગામને હચમચાવી દીધું છે. આ દુર્ઘટનામાં લગભગ 50 મકાનો બળીને ખાક થઈ ગયા, પાંચ બાળકોના કરુણ મોત થયા, અને 15 બાળકો ગુમ થયા હોવાની આશંકા વ્યક્ત કરવામાં આવી રહી છે. આ ઘટનાએ ગામમાં શોકનું મોજું ફેલાવ્યું છે, અને સમગ્ર વિસ્તાર ગમગીનીમાં ડૂબી ગયો છે.

આગની શરૂઆત એક મકાનમાં થઈ હોવાનું કહેવાય છે, જે ઝડપથી આસપાસના મકાનોમાં ફેલાઈ ગઈ. આ ઘટનામાં ચાર બાળકો આગમાં ફસાઈ ગયા હતા અને તેમને બચાવવાના તમામ પ્રયાસો નિષ્ફળ રહ્યા. મૃતકોમાં ત્રણ બાળકો એક જ પરિવારના હોવાનું જાણવા મળ્યું છે, જેના કારણે આ પરિવાર પર આઘાતનો પહાડ તૂટી પડ્યો છે. આગની તીવ્રતા એટલી ભયંકર હતી કે ગ્રામજનો દ્વારા શરૂ કરવામાં આવેલું બચાવ કાર્ય પણ નિષ્ફળ રહ્યું. ઘટનાની જાણ થતાં જ ફાયર બ્રિગેડના બે વાહનો ઘટનાસ્થળે પહોંચ્યા અને આગને કાબૂમાં લેવાના પ્રયાસો શરૂ કર્યા. પોલીસ અને વહીવટી તંત્રની ટીમો પણ તાત્કાલિક ઘટનાસ્થળે દોડી આવી અને બચાવ કામગીરીમાં જોડાઈ.

આગ લાગવાનું ચોક્કસ કારણ હજુ સુધી સ્પષ્ટ થયું નથી, પરંતુ પ્રાથમિક તપાસમાં શોર્ટ સર્કિટ અથવા ચૂલાને કારણે આગ લાગી હોવાની શક્યતા વ્યક્ત કરવામાં આવી રહી છે. સ્થાનિક વહીવટી તંત્રે આ ઘટનાની ઊંડાણપૂર્વક તપાસના આદેશ આપ્યા છે, અને પીડિત પરિવારોને તાત્કાલિક રાહત અને સહાય પૂરી પાડવાની જાહેરાત કરી છે. બચાવ ટીમો હાલ ગુમ થયેલા બાળકોની શોધખોળમાં લાગેલી છે, અને પીડિતોને આશ્રય અને આવશ્યક સુવિધાઓ પૂરી પાડવાની વ્યવસ્થા કરવામાં આવી રહી છે.

આ દુ:ખદ ઘટનાએ રાજ્યના રાજકીય અને સામાજિક વર્તુળોમાં પણ હલચલ મચાવી છે. સ્થાનિક નેતાઓ અને સમાજસેવી સંસ્થાઓએ પીડિતોની મદદ માટે આગળ આવવાની તૈયારી દર્શાવી છે. આગની આ ઘટનાએ દલિત સમુદાયની સુરક્ષા અને ગામડાઓમાં આગ સામે રક્ષણની પૂરતી વ્યવસ્થાના અભાવના મુદ્દાને ફરી એકવાર ચર્ચામાં લાવ્યો છે.

ગુણવત્તાયુક્ત શૈક્ષણિક સંસ્થાઓથી જ ભારત મહાન રાષ્ટ્ર બનશે: એસ. જયશંકર

ચાંગા:  કેન્દ્રીય વિદેશ મંત્રી ડૉ. એસ. જયશંકરે ચારુસેટ કેમ્પસની મુલાકાત લઈ “ચેન્જિંગ વર્લ્ડ: ઓપોર્ચ્યુનિટીઝ એન્ડ ચેલેન્જીસ”  (“Changing World: Opportunities and Challenges” ) વિષય પર લેક્ચર આપ્યું હતું. વિદેશ મંત્રીએ ચારુસેટના વિદ્યાર્થીઓ સાથે સંવાદ સાધી પૂછાયેલા સવાલોના માહિતીસભર જવાબો આપ્યા હતા. ડૉ. એસ. જયશંકરે જણાવ્યું હતું કે, રાષ્ટ્રને આગળ લઈ જવા માટે ઉચ્ચ ગુણવત્તાયુક્ત શૈક્ષણિક સંસ્થાઓ દેશભરમાં સ્થાપવામાં આવી છે. આવી સંસ્થાઓના સહયોગથી જ ભારત મહાન રાષ્ટ્ર બનશે એવો વિશ્વાસ તેમણે વ્યક્ત કર્યો હતો.એસ. જયશંકરે જણાવ્યું હતું કે, “છેલ્લા દસ વર્ષમાં દેશમાં તમામ ક્ષેત્રોમાં આમૂલ પરિવર્તન આવ્યું  છે. ભારત આજે આત્મવિશ્વાસ સાથે દુનિયાની સાથે કદમ મિલાવી પડકારોનો સામનો કરી નવી તકોના સર્જન થકી વડાપ્રધાનના વિકસિત ભારત @2047ના સંકલ્પને સાકાર કરવા આગળ વધી રહ્યું છે.”વિદેશમંત્રીએ સરદાર વલ્લભભાઈ પટેલની  વિઝનરી લીડરશીપને યાદ કરીને ભાવાજંલી અર્પણ કરી હતી. તેમણે જણાવ્યું હતું કે વિદેશમાં વસતા ભારતીયો સાયન્સ એન્ડ ટેકનોલોજી ક્ષેત્ર ભારત અને દુનિયા વચ્ચે સેતુ બનવામાં મહત્વપૂર્ણ ભૂમિકા ભજવી શકે છે. ડો. એસ. જયશંકર સાથે સમગ્ર ઇન્ટરએક્ટીવ સેશનનું સંચાલન ડો. વિજય ચૌથાઈવાલેએ કર્યું હતું.

શાશ્વત મહેન્દ્રુએ સવાલ પૂછ્યો હતો કે, ઘણા વિદ્યાર્થીઓ અભ્યાસ માટે વિદેશ જાય છે, જયારે વિવિધ કંપનીઓ આપણા દેશમાં રોકાણ કરી રહી છે, તો શું આનાથી બંને દેશો વચ્ચે સંબંધ મજબૂત થાય છે કે કેમ તેમજ વિદ્યાર્થીઓ વિદેશ જાય છે તેનાથી શું ફેર પડી રહ્યો છે. ડો. જયશંકરે કહ્યું, “જેઓ વિદેશ જાય છે તેઓ સારી જવાબદારી અદા કરે છે અને ભારતનું પ્રતિનિધિત્વ કરે છે.  સાક્ષી શાહે ટેક્નોલોજી અને એન્ટરપ્રિન્યોરશીપ અને ઋષભ જોષીએ સસ્ટેનેબિલિટી ડેવલોપમેન્ટ ગોલ્સ વિશે પ્રશ્ન પૂછ્યો હતો.ચારૂસેટ કેમ્પસમાં ડો. એસ. જયશંકરનું સુરેન્દ્રભાઈ પટેલ અને અન્ય મહાનુભાવોએ સ્વાગત કર્યું હતું. ત્યાર બાદ કેમ્પસ મુલાકાત દરમિયાન વિવિધ વિભાગોની મુલાકાત લીધી હતી. એસ. જયશંકરના હસ્તે CSPITમાં એમ. એસ. પટેલ ડિપાર્ટમેન્ટ ઓફ સિવિલ એન્જિનિયરિંગમાં નવનિર્મિત વોટર ટ્રીટમેન્ટ પ્લાન્ટનું ઉદ્ઘાટન કરવામાં આવ્યું હતું.

ટેક્સીચાલકે અનેક વાહનોની મારી ટક્કરઃ ડ્રાઇવરનું મોત

અમદાવાદઃ વેજલપુર વિસ્તારમાં મંગળવારની રાત્રે એક ડ્રાઈવરનો મૃતદેહ મળી આવ્યો હતો, જેમાં પ્રાથમિક માહિતી અનુસાર એક ટેક્સીચાલકે અંધાધૂંધ વાહનોને ટક્કર માર્યા પછી ગુસ્સે થયેલા ટોળાએ કારચાલકનો પીછો કરીને તેને માર માર્યો હતો. આ કેસમાં પાંચથી છ લોકોની અટક કરવામાં આવ્યા પછી કેસ નોંધીને તપાસ હાથ ધરી છે.

આ વિસ્તારમાં ગુસ્સામાં આવેલા ટોળાએ કથિત રીતે ડ્રાઈવરની હત્યા કરી હોવાનું પ્રકાશમાં આવ્યું છે. આ ઘટના કંઈક એવી હતી કે કેબ ડ્રાઈવરે પહેલા વાસણાથી જુહાપુરા સુધીમાં અનેક વાહનોને ટક્કર મારીને ગંભીર અકસ્માત સર્જ્યો હતો, જેથી ગુસ્સામાં આવેલા લોકોના ટોળાએ માર માર્યો હતો. જોકે, ડ્રાઈવરની હત્યા કરવામાં આવી છે કે તેનું આકસ્મિક મોત થયું છે? એના અંગે પોલીસ તપાસ કરી રહી છે, એમ પોલીસ અધિકારીએ જણાવ્યું હતું.

જોકે  કેબચાલક નશામાં હતો અને તેણે અનેક નશની હાલતમાં કેબ ચલાવીને અનેક વાહનોને ટક્કર મારી હતી. મળતી જાણકારી પ્રમાણે ઈસનપુરમાં રહેનારા કારચાલક નશાની હાલતમાં કાર ચલાવી હતી અને સ્ટિયરિંગ પરથી કાબૂ ગુમાવી દેતાં અનેક વાહનોને ટક્કર મારી હતી.

વાસણાથી જુહાપુરા જતાં માર્ગ પર એક કારચાલકે અનેક અકસ્માત સર્જ્યા હતા, જ્યારે જુહાપુરા અલ અકસા મસ્જિદ પાસે પણ કારચાલકે અકસ્માત સર્જ્યો હતો. જોકે અકસ્માતની ઘટના બાદ ત્યાં હાજર ટોળું ઉશ્કેરાયું હતું અને હિંસક બન્યું હતું. ટોળાએ ચાલકને કારમાંથી બહાર કાઢી ઢોર માર માર્યો હતો.

ગેરકાયદે દરગાહ હટાવવા પર ભારે બબાલઃ પોલીસ કર્મચારીઓ ઘાયલ

નાસિક: ગઈ કાલે રાત્રે મહારાષ્ટ્રના નાસિકમાં ગેરકાયદે દરગાહને તોડી પાડવા પહોંચેલી મ્યુનિસિપલ કોર્પોરેશનની ટીમ અને પોલીસ પર હુમલો કરવામાં આવ્યો હતો. જેથી આ હુમલામાં 21 પોલીસ કર્મચારીઓ ઘાયલ થયા હતા.  કોર્પોરેશનના કર્મચારીઓ પર પથ્થરમારો કરવામાં આવ્યો હતો. જવાબમાં પોલીસે ટિયર ગેસના શેલ છોડ્યા હતા, આ ઘટના બાદ વિસ્તારમાં માહોલ તંગ છે. બુધવારે પણ દરગાહની આસપાસ પોલીસ ફોર્સ તૈનાત કરવામાં આવી છે.

નાસિકના કાઠે ગલી વિસ્તારમાં આવેલી એક ગેરકાયદે ઊભી કરવામાં આવેલી સતપીર દરગાહને દૂર કરવા મ્યુનિસિપલ કોર્પોરેશને મધ્યરાત્રિએ ઝુંબેશ શરૂ કરી હતી. આ માટે કાઠે ગલીથી ભાભા નગર તરફ જતા ટ્રાફિકને અન્ય રૂટ પર ડાયવર્ટ કરવામાં આવ્યો છે, એમ અહેવાલ કહે છે.

આ કાર્યવાહી દરમિયાન અસામાજિક તત્ત્વો દ્વારા પથ્થરમારો કરવામાં આવ્યો હતો. પથ્થરમારામાં વાહનોને નુકસાન પહોંચ્યું હતું. આ પથ્થરમારામાં બે ACP અને 20થી વધુ પોલીસ કર્મચારીઓ ઘાયલ થયા છે. એક પોલીસ કર્મચારીના પગમાં ફ્રેક્ચર થયું હોવાના પણ અહેવાલ છે. પોલીસે કાર્યવાહી આઠ લોકોની અટકાયત કરી છે.

આજે મૌલાનાઓની મદદથી દરગાહને તોડી પાડવાની પ્રક્રિયા શરૂ થઈ ગઈ છે. આજે શહેરમાં તણાવપૂર્ણ માહોલ છે. આજે દિવસભર ભારે સુરક્ષા-વ્યવસ્થા રહેશે.

નાસિક મહાનગરપાલિકાએ પહેલી એપ્રિલે 15 દિવસમાં અનધિકૃત બાંધકામ દૂર કરવા નોટિસ ફટકારી હતી. નાસિકના કાઠે ગલી સિગ્નલ વિસ્તારમાં આવેલી સતપીર દરગાહને પણ નોટિસ ફટકારી હતી. નોટિસમાં કહેવામાં આવ્યું છે કે સુપ્રીમ કોર્ટના આદેશ મુજબ સતપીર દરગાહ અનધિકૃત છે.

IPL 2025 માં મેચ ફિક્સિંગનો ખતરો

ભારતમાં હાલમાં IPL 2025 ની લડાઈ ચાલી રહી છે, જ્યાં ચાહકોને ઘણી રોમાંચક મેચો જોવા મળી છે. પરંતુ હવે એક ચોંકાવનારા સમાચાર સામે આવી રહ્યા છે, જ્યાં વિશ્વની સૌથી મોટી ક્રિકેટ લીગ પર મેચ ફિક્સિંગનો પડછાયો છવાઈ રહ્યો છે. આ જોખમને ધ્યાનમાં રાખીને, ભારતીય ક્રિકેટ કંટ્રોલ બોર્ડ (BCCI) એ તમામ ફ્રેન્ચાઇઝીઓને ચેતવણી જારી કરી છે. આ સંદર્ભમાં, BCCI એ માલિકો, ખેલાડીઓ, કોચ, સપોર્ટ સ્ટાફ અને કોમેન્ટેટર્સને પણ ચેતવણી આપી છે કે શંકાસ્પદ ઓળખપત્ર ધરાવતો એક ઉદ્યોગપતિ લીગમાં સામેલ વ્યક્તિઓને ફસાવવાનો સક્રિય પ્રયાસ કરી રહ્યો છે.

ACSU એ દેખરેખ વધારી

ક્રિકેટની સૌથી ગ્લેમરસ લીગ પર શંકાના વાદળો ઘેરાતા અનેક ઘટનાઓ પ્રકાશમાં આવ્યા બાદ ભ્રષ્ટાચાર વિરોધી અને સુરક્ષા એકમ (ACSU) એ દેખરેખ વધારી દીધી છે. ‘ક્રિકબઝ’ના એક અહેવાલ મુજબ, હૈદરાબાદના આ ઉદ્યોગપતિની ઓળખ ગુપ્ત રાખવામાં આવી છે અને તે કથિત રીતે જાણીતા બુકીઓ સાથે સંકળાયેલો છે. ઉપરાંત, તેનો ઘણી મેચોને પ્રભાવિત કરવાનો ઇતિહાસ છે. ACSU માને છે કે તે IPL વર્તુળોમાં ઘૂસણખોરી કરવાનો સક્રિય પ્રયાસ કરી રહ્યો છે.

રિપોર્ટ્સમાં ચોંકાવનારા દાવાઓ

રિપોર્ટમાં વધુમાં જણાવાયું છે કે તે વ્યક્તિ કથિત રીતે IPL ટીમોના ચાહક તરીકે પોતાને રજૂ કરીને તેમની નજીક જવાનો પ્રયાસ કરી રહ્યો હતો. તે ટીમ હોટલ અને મેચોમાં જોવા મળ્યો છે અને ખેલાડીઓ અને સ્ટાફ સાથે મિત્રતા કરવાનો પ્રયાસ કરી રહ્યો છે.

એવી પણ માહિતી છે કે તે ફક્ત ટીમના સભ્યોને જ નહીં પરંતુ તેમના પરિવારોને પણ ભેટો આપી રહ્યો છે. વધુમાં એવું પણ જાણવા મળ્યું છે કે તે ચાહક તરીકે ઓળખાવતો હતો અને તેમને જ્વેલરી શોપ અને મોંઘી હોટલોમાં લઈ જવાની ઓફર કરતો હતો. એવા સંકેતો પણ છે કે તેણે વારંવાર સોશિયલ મીડિયા પ્લેટફોર્મ દ્વારા વિદેશમાં રહેતા સંબંધીઓનો સંપર્ક કરવાનો પ્રયાસ કર્યો હશે.

 

મોદીજી, તમારા ગૃહમંત્રી પર નજર રાખો… મમતા બેનર્જીના ચાબખા

પશ્ચિમ બંગાળમાં વક્ફ કાયદાને લઈને રાજ્યભરમાં ફેલાયેલી હિંસા અંગે વિપક્ષના આરોપોને મુખ્યમંત્રી મમતા બેનર્જીએ સંપૂર્ણપણે ફગાવી દીધા. ઇમામો સાથેની મુલાકાત દરમિયાન તેમણે કેન્દ્ર સરકાર પર જોરદાર પ્રહારો કર્યા. તેમણે વડા પ્રધાન નરેન્દ્ર મોદીને કોઈપણ અમાનવીય અને જુલમી કાયદો લાગુ ન કરવા અપીલ કરી અને કેન્દ્રીય ગૃહમંત્રી અમિત શાહ પર નજર રાખવાની પણ સલાહ આપી.

મમતા બેનર્જીએ કહ્યું કે જો તૃણમૂલ કોંગ્રેસ વક્ફ હિંસામાં સામેલ હોત તો આપણા નેતાઓના ઘરો પર હુમલો ન થયો હોત. તેમણે કહ્યું, વક્ફ કાયદાને લઈને મુર્શિદાબાદ જિલ્લાના કેટલાક વિસ્તારોમાં અશાંતિ જોવા મળી છે, પરંતુ તેને વિકૃત રીતે રજૂ કરવામાં આવી રહી છે. તેમણે કહ્યું કે ટીએમસીએ સંસદમાં વક્ફ કાયદા સામે સૌથી વધુ જોરશોરથી લડત આપી છે, પરંતુ અફવાઓ ફેલાવીને પાર્ટીને બદનામ કરવામાં આવી રહી છે. મુખ્યમંત્રીએ કહ્યું, હું પીએમ મોદીને અપીલ કરું છું કે આવા કોઈ અમાનવીય કાયદાને મંજૂરી ન આપે અને તેમના ગૃહમંત્રી પર નજર રાખે.

શું તોફાનીઓ સરહદ પારથી આવ્યા હતા?

મુર્શિદાબાદ જિલ્લામાં તાજેતરમાં થયેલી અશાંતિ અંગે મમતાએ કહ્યું, “મને કેટલાક અહેવાલો મળ્યા છે જે કહે છે કે સરહદ પારના કેટલાક તત્વો આ અશાંતિમાં સામેલ હોઈ શકે છે. જો એવું હોય, તો શું સરહદનું રક્ષણ કરવાની જવાબદારી BSFની નથી?”

દીપિકા-રણવીર સિંહ દીકરી દુઆ સાથે નવા ઘરમાં શિફ્ટ થવા તૈયાર

દીપિકા પાદુકોણ અને રણવીર સિંહ હવે ટૂંક સમયમાં તેમની પુત્રી દુઆ સાથે નવા એપાર્ટમેન્ટમાં શિફ્ટ થશે. આજે, તેમના કરોડો રૂપિયાના ઘરનો પહેલો ફોટો સામે આવ્યો છે, જે ચાહકોમાં ખૂબ વાયરલ થઈ રહ્યો છે.

દીપવીરના નવા ઘરનો વીડિયો વાયરલ
મનીકંટ્રોલ અનુસાર, દીપિકા અને રણવીરના નવા ઘરની કિંમત 100 કરોડ રૂપિયા છે. આ એપાર્ટમેન્ટ બિલ્ડિંગના 16મા થી 19મા માળ પર આવેલું છે અને 11,266 ચોરસ ફૂટમાં ફેલાયેલું છે. સૌથી ખાસ વાત એ છે કે તેમનું નવું ઘર દરિયા કિનારે બનેલું છે. આ ઇમારતનો એક વીડિયો આજે સોશિયલ મીડિયા પર સામે આવ્યો છે, જે ચાહકોમાં વાયરલ થઈ રહ્યો છે. આ વીડિયોમાં સ્પષ્ટપણે જોઈ શકાય છે કે ઇમારતનું બાંધકામ લગભગ પૂર્ણ થઈ ગયું છે. દીપવીરનું આ નવું ઘર મુંબઈના બાંદ્રાના બેન્ડસ્ટેન્ડ વિસ્તારમાં આવેલું છે.

 

View this post on Instagram

 

A post shared by Viral Bhayani (@viralbhayani)

શું રણવીર અને દીપિકા શાહરુખના પાડોશી છે?
આ વાયરલ વીડિયોમાં શાહરૂખ ખાનનો બંગલો મન્નત પણ બતાવવામાં આવ્યો છે, જે રણવીર અને દીપિકાના ઘરની ખૂબ નજીક છે.

દીપિકા-રણવીરની કારકિર્દી
દીપિકા છેલ્લે ફિલ્મ ‘સિંઘમ અગેન’માં ડીસીપી શક્તિ શેટ્ટીની ભૂમિકામાં જોવા મળી હતી. દરમિયાન, રણવીર સિંહ આ દિવસોમાં ફિલ્મ ‘ધુરંધર’ના શૂટિંગમાં વ્યસ્ત છે. આ ઉપરાંત તે ‘ડોન 3’માં પણ જોવા મળશે.

ગુજરાત સરકારનો મહત્વનો નિર્ણય, કર્મચારીઓ અને પેન્શનરો માટે મોંઘવારી ભથ્થામાં વધારો

ગુજરાતના મુખ્યમંત્રી ભૂપેન્દ્ર પટેલના અધ્યક્ષસ્થાને તાજેતરમાં યોજાયેલી રાજ્ય મંત્રીમંડળની બેઠકમાં રાજ્ય સરકારના કર્મચારીઓ અને પેન્શનરોના હિતમાં એક મહત્વપૂર્ણ નિર્ણય લેવાયો છે. આ નિર્ણય મુજબ, છઠ્ઠા અને સાતમા પગાર પંચનો લાભ મેળવતા રાજ્યના કર્મચારીઓને કેન્દ્ર સરકારના ધોરણો મુજબ મોંઘવારી ભથ્થામાં વધારો 1 જાન્યુઆરી, 2025થી આપવામાં આવશે. આ નિર્ણયની જાહેરાત રાજ્યના આરોગ્ય મંત્રી અને સરકારના પ્રવક્તા ઋષિકેશ પટેલે કરી હતી.

આરોગ્ય મંત્રીએ જણાવ્યું કે, સાતમા પગાર પંચ હેઠળ લાભ મેળવતા કર્મચારીઓના મોંઘવારી ભથ્થામાં 2 ટકાનો વધારો કરવામાં આવ્યો છે, જ્યારે છઠ્ઠા પગાર પંચનો લાભ મેળવતા કર્મચારીઓ માટે આ વધારો 6 ટકા રાખવામાં આવ્યો છે. આ વધારાને કારણે થનારી મોંઘવારી ભથ્થાની તફાવતની રકમ, એટલે કે 1 જાન્યુઆરી, 2025થી 31 માર્ચ, 2025 સુધીના ત્રણ મહિનાની બાકી રકમ, એક હપ્તામાં એપ્રિલ 2025ના પગાર સાથે ચૂકવવામાં આવશે.

આ નિર્ણયનો લાભ રાજ્ય સરકારના લગભગ 4.78 લાખ કર્મચારીઓ, જેમાં રાજ્ય સરકાર, પંચાયત સેવા અને અન્ય વિભાગોના કર્મયોગીઓનો સમાવેશ થાય છે, તેમજ અંદાજે 4.81 લાખ નિવૃત્ત કર્મચારીઓ (પેન્શનરો)ને મળશે. આ નિર્ણયના અમલીકરણ માટે રાજ્ય સરકાર એરિયર્સના ચુકવણી પેટે 235 કરોડ રૂપિયા અને વધારાના વાર્ષિક પગાર ભથ્થા તથા પેન્શન માટે 946 કરોડ રૂપિયાનું બજેટ ફાળવશે.

રાજ્ય મંત્રીમંડળની બેઠકમાં આ નિર્ણયને અમલમાં મૂકવા માટે નાણાં વિભાગને જરૂરી આદેશો જારી કરવાની સૂચનાઓ પણ આપવામાં આવી છે. આ નિર્ણય રાજ્યના કર્મચારીઓ અને પેન્શનરોના આર્થિક હિતોને મજબૂત કરવાની દિશામાં એક મહત્વનું પગલું ગણાવામાં આવી રહ્યું છે.

1...1,0001,0011,002...5,175Page 1,001 of 5,175