અમદાવાદ: વિક્રમ એ. સારાભાઈ કોમ્યુનિટી સાયન્સ સેન્ટર (VASCSC) અને CEPT યુનિવર્સિટીના ફેકલ્ટી ઓફ ટેક્નોલોજીએ સાથે મળીને STEM સ્ટુડિયોનું બીજું સંસ્કરણ સફળતાપૂર્વક પૂર્ણ કર્યું. એક અઠવાડિયા સુધી ચાલેલા આ ઈમર્સિવ બૂટકેમ્પમાં ધોરણ 8 થી 12ના વિદ્યાર્થીઓએ ભાગ લીધો હતો. તેમણે સાયન્સ, ટેક્નોલોજી, એન્જિનિયરિંગ અને મૅથેમૅટિક્સ (STEM) વિષયનો રોચક અનુભવ આ બૂટકેમ્પમાં કર્યો.
આ કાર્યક્રમ બે બેચમાં યોજાયો હતો, જેમાં 50થી વધુ વિદ્યાર્થીઓએ ભાગ લીધો. આ કાર્યક્રમનું મુખ્ય ધ્યાન હેન્ડ્સ-ઓન લર્નિંગ અને 21મી સદીના કૌશલ્યો જેમ કે ડિઝાઇન થિંકિંગ, સમસ્યાઓનો ઉકેલ, સહકાર અને સમય વ્યવસ્થાપન પર કેન્દ્રિત હતું. વિદ્યાર્થીઓએ ટીમમાં કામ કરીને ઇમર્જિંગ ટેક્નોલોજી વિશે શીખ્યા. જેમાં વાસ્તવિક વિશ્વના પડકારોને હલ કરવા, ડિઝાઇન ચેલેન્જ દ્વારા સર્જનાત્મકતા અને નવીનતાને પ્રોત્સાહન આપવું, રોબોટિક્સ, 3D પ્રિન્ટિંગ અને લેસર કટિંગ જેવી રેપિડ પ્રોટોટાઈપિંગની પાયાની જાણકારી, GIS મેપિંગ, STEM ગેમ્સ (બોર્ડ ગેમ ડિઝાઇન, પેપર રોલર કોસ્ટર્સ), STEM ઉદ્યમશીલતાના આધારભૂત તત્વો સાથે એક ફિલ્ડ વિઝિટનો પણ સમાવેશ કરવામાં આવ્યો હતો.
સમગ્ર બૂટકેમ્પ VASCSC અને CEPT યુનિવર્સિટીની ફેકલ્ટી ઓફ ટેક્નોલોજીના અનુભવી શિક્ષકો દ્વારા સંચાલિત કરવામાં આવ્યા હતા. કાર્યક્રમનું સમાપન STEM ઉદ્યોગશીલતા સ્પર્ધા (STEM Entrepreneurship Challenge) સાથે થયું. જેમાં વિદ્યાર્થીઓએ વાસ્તવિક જીવનની સમસ્યાઓનો ઉકેલ લાવતા નવીન વિચારો પર કામ કર્યું અને સ્પર્ધાના જજ સમક્ષ રજૂઆત કરી.
