ભાવરનગર સહિત સમગ્ર રાજ્યમાં ધોધમાર વરસાદ વરસી રહ્યો છે. ભારે વરસાદના પગલે ઠેર ઠેર પાણી ભરાયા છે અને નદીઓમાં પૂર જેવી સ્થિતિ જોવા મળી રહી છે. ત્યારે આ વચ્ચે હવે મહુવાના તલગાજરડાથી એક મોટા સમાચાર સામે આવી રહ્યા છે. મહુવાના તલગાજરડામાં ભારે વરસાદના પગલે પાણી ભરાઈ જતા પરિસ્થિતિ વણસી ગઈ છે. જેમાં કેટલાક વિદ્યાર્થીઓ ફસાઈ ગયા હતા.
મહુવા પંથકમાં ધોધમાર વરસાદને પગલે નદીઓમાં ઘોડાપૂરની સ્થિતિ સર્જાઈ છે. ત્યારે તલગાજરડાની મોર્ડન સ્કૂલમાં અભ્યાસ કરીને રાતોલ ગામ જતાં 50 બાળકો નદીના પાણીમાં ફસાયા હતા. આ ઘટનાની ગંભીરતાને ધ્યાને લઈને તાબડતોબ તમામ બાળકોને એક મકાનમાં રાખવામાં આવ્યા છે. જેના દ્રશ્યો સામે આવ્યા છે. જેમાં જોઈ શકાય છે કે બાળકો મકાનની છત પર ચઢી ગયા છે.
અન્ય એક દ્રશ્યમાં જોઈ શકાય છે કે બાળકોના કેડ સુધીના પાણી જોવા મળી રહ્યા છે. બનાવ અંગેની જાણ થતાં જ મામલતદાર, ફાયર સહિતની રેસ્ક્યૂ ટીમ પહોંચી હતી અને યુદ્ધના ધોરણે રેસ્ક્યૂ કામગીરી હાથ ધરવામાં આવી છે.
