નવી દિલ્હીઃ ઓપરેશન સિંદૂર બાદ કોંગ્રેસ નેતા શશિ થરૂરના નેતૃત્વમાં ભારતીય ડેલિગેશન બ્રાઝિલના બ્રાસીલિયામાં છે. ત્યાર બાદ આ ડેલિગેશન અમેરિકા જશે. જોકે આ પહેલાં જ થરૂરે અમેરિકન પ્રમુખ ડોનાલ્ડ ટ્રમ્પને સ્પષ્ટ સંદેશ આપ્યો છે કે ભારત યુદ્ધ નથી ઈચ્છતું અને તેને સમજાવવા માટે કોઈની જરૂર નથી. ટ્રમ્પ સતત કહી રહ્યા છે કે ભારત-પાકિસ્તાન વચ્ચે સીઝફાયર કરવા માટે મધ્યસ્થી કરી છે. એટલેથી જ ન રોકાતા પણ એવું પણ કહે છે કે તેમણે બંને દેશના વેપારને બંધ કરવાની ચેતવણી પણ આપી હતી.
થરૂરે બ્રાસિલિયામાં પત્રકારો વાતચીત કરતાં કહ્યું હતું કે અમેરિકન પ્રમુખના પદ માટે અમારા મનમાં ખૂબ જ સન્માન છે અને અમે આ સન્માનને ધ્યાનમાં રાખીને નથી બોલતા, પરંતુ આ બાબતે અમારી સમજ થોડી અલગ છે. અમને રોકવા માટે કોઈને સમજાવવાની જરૂર નથી. જો અમેરિકન પ્રમુખ અથવા તેમના વરિષ્ઠ અધિકારીઓ તરફથી કોઈ સમજાવવાની જરૂર હોત તો તે પાકિસ્તાનીઓને સમજાવવાનું હતું. અમને સમજાવવાની જરૂર નથી કારણ કે અમે યુદ્ધ નથી ઈચ્છતા. અમે સતત કહ્યું હતું કે સંઘર્ષને લાંબો ખેંચવામાં અમારી રુચિ નથી. આ કોઈ પણ પ્રકારના યુદ્ધની શરૂઆત નથી. આ ફક્ત આતંકવાદીઓ સામેનો બદલો છે. જો પાકિસ્તાને પ્રતિક્રિયા ન આપી હોત, તો અમે પણ પ્રતિક્રિયા ન આપત.બ્રાસીલિયાની યાત્રા બાદ શશિ થરૂરના નેતૃત્વમાં ડેલિગેશન પોતાની યાત્રાના અંતિમ તબક્કામાં અમેરિકા જશે. કોંગ્રેસ નેતાએ કહ્યું હતું કે અમે વોશિંગ્ટનની જનતાનો અભિપ્રાય, સરકારી અધિકારી, ધારાસભ્યો, સેનેટરો અને કોંગ્રેસમેન, ગૃહ અને સેનેટમાં વિવિધ સમિતિઓ, વોશિંગ્ટનમાં ખૂબ જ પ્રભાવશાળી થિંક ટેન્કો, ખાસ કરીને વિદેશ નીતિ, મીડિયા અને કેટલાંક જાહેર સંબોધનો પર ધ્યાન કેન્દ્રિત કરતી સમિતિઓ સાથે બેઠકો કરીશું. મને છ અથવા સાત ઈન્ટરવ્યુ આપવા માટે કહેવામાં આવ્યું છે. આ ઈન્ટરવ્યુ વ્યક્તિગત અમેરિકન ચેનલ અને બ્રોડકાસ્ટર્સ, પોડકાસ્ટરોની દેન છે.
થરૂરે જણાવ્યું હતું કે કાલે અમેરિકામાં ભારત અને પાકિસ્તાન બંનેનાં ડેલિગેશન હાજર રહેવાના છે. જોકે આ એક રસપ્રદ વાત છે. કદાચ આ વિશે રસ વધશે, કારણ કે એક જ શહેર વોશિંગ્ટનમાં બે હરીફ પ્રતિનિધમંડળ હાજર રહેશે.
