સૂર્યકુમાર યાદવની કેપ્ટનશીપ હેઠળ ભારતીય ટીમે 5 મેચની T20 સીરિઝમાં ઇંગ્લેન્ડને 4-1થી હરાવ્યું છે. ત્યારબાદ હવે રોહિત શર્માની કેપ્ટનશીપમાં ઇંગ્લિશ ટીમ સામે 3 મેચની ODI સીરિઝ રમવાની છે. આ પહેલા ભારતીય ટીમમાં મોટો ફેરફાર થયો છે. ભારતીય ક્રિકેટ કંટ્રોલ બોર્ડ (BCCI) એ ફિટનેસના કારણે ફાસ્ટ બોલર જસપ્રીત બુમરાહને ટીમમાંથી બહાર કરી દીધો છે. તેમના સ્થાને સ્ટાર સ્પિનર વરુણ ચક્રવર્તીને ભારતીય ટીમમાં સામેલ કરવામાં આવ્યો છે.
ઈંગ્લેન્ડ સામેની ODI સીરિઝ પછી ભારતીય ટીમને આ મહિને ICC ચેમ્પિયન્સ ટ્રોફી 2025 પણ રમવાની છે. આવી સ્થિતિમાં, ભારતીય ટીમ માટે આ એક મોટો ફટકો હોઈ શકે છે. બુમરાહ પોતાની ફિટનેસ સાબિત કરી શક્યો નહીં. આવી સ્થિતિમાં, તેમને બાકાત રાખવામાં આવ્યા છે. તમને જણાવી દઈએ કે વરુણને પ્રેક્ટિસ માટે ટીમમાં સામેલ કરવામાં આવ્યો હતો. એ સમયથી એવા અહેવાલો ફરી રહ્યા હતા કે, તેને ઇંગ્લેન્ડ સામેની ODI સીરિઝ માટે ટીમમાં સામેલ કરવામાં આવશે. ચેમ્પિયન્સ ટ્રોફી માટે ભારતીય ટીમમાં ફાસ્ટ બોલર જસપ્રીત બુમરાહનો સમાવેશ કરવામાં આવ્યો છે. જોકે, હજુ સુધી એ સ્પષ્ટ નથી કે બુમરાહ આ ટુર્નામેન્ટમાં રમશે કે નહીં. આ મહિને ઓસ્ટ્રેલિયા સામેની સિડની ટેસ્ટ દરમિયાન બુમરાહને કમરના સ્નાયુઓમાં ખેંચાણનો સામનો કરવો પડ્યો હતો.
