શત્રુઘ્ન સિંહાની પુત્રી અને બોલીવુડની ‘દબંગ ગર્લ’ સોનાક્ષી સિંહા આજે પોતાનો 38મો જન્મદિવસ ઉજવી રહી છે. સોનાક્ષીએ પોતાના અભિનય અને અલગ શૈલીથી ફિલ્મ જગતમાં પોતાનું નામ બનાવ્યું છે. આજે અભિનેત્રી સોનાક્ષી સિન્હાનો જન્મદિવસ (Sonakshi Sinha Birthday) છે.
બૉલિવૂડમાં અત્યારે સોનાક્ષી એક જાણીતું નામ બની ગયુ છે. પરંતુ એક સમય હતો જ્યારે તેણીને ઘણી ટીકાઓનો સામનો કરવો પડ્યો હતો, ખાસ કરીને તેના વધેલા વજન માટે. સોનાક્ષી સિંહા બોલીવુડમાં પ્રવેશ કરતા પહેલા કોસ્ચ્યુમ ડિઝાઇનર તરીકે કામ કરતી હતી. આ દરમિયાન તેણીએ તેના પિતા શત્રુઘ્ન સિંહાની જેમ અભિનેતા બનવાનું નક્કી કર્યું, પરંતુ સ્થૂળતાને કારણે, તેણીને દર વખતે અસ્વીકારનો સામનો કરવો પડ્યો. ઘણા નિર્માતાઓ સ્ટાર કિડ હોવા છતાં પણ સોનાક્ષીને કામ આપવાનો સ્પષ્ટ ઇનકાર કરી દીધો. રેમ્પ વોક દરમિયાન તેણીની મજાક પણ ઉડાવવામાં આવી હતી. સોનાક્ષી સિંહાએ પોતે આ કિસ્સો શેર કર્યો હતો.
સેલિબ્રિટી મોડેલે કહ્યું ‘ગાય’
નેહા ધૂપિયાના ચેટ શો BFFs With Vogue માં વાતચીત દરમિયાન સોનાક્ષી સિંહાએ રેમ્પ વોક સાથે જોડાયેલી એક વાત શેર કરી અને જણાવ્યું કે કેવી રીતે એક પ્રખ્યાત સેલિબ્રિટી મોડેલે તેને ‘ગાય’ કહી. નેહા ધૂપિયા સાથે તેના વજન અને જર્ની વિશે વાત કરતા સોનાક્ષીએ કહ્યું,’રેમ્પ વોક દરમિયાન, એક સેલિબ્રિટી મોડેલે મારા શરીરની મજાક ઉડાવી. જ્યારે હું રેમ્પ વોક કરી રહી હતી, ત્યારે તે મોડેલે મને જોઈને ગાય કહી. તેણે કહ્યું, આ શું છે, શું હવે ગાય પણ રેમ્પ વોક કરશે?’ સોનાક્ષીની વાત સાંભળ્યા પછી, નેહા ધૂપિયાએ અભિનેત્રીને સેલિબ્રિટી મોડેલનું નામ પૂછ્યું, પરંતુ સોનાક્ષીએ કંઈ કહ્યું નહીં.
વધારે વજન હોવાને કારણે ફિલ્મ ન મળી
સોનાક્ષીએ હોટરફ્લાયને આપેલા ઇન્ટરવ્યુમાં પણ પોતાના જીવન સાથે જોડાયેલી તે ઘટનાઓ શેર કરી હતી, જ્યારે તેને વજનના કારણે કામ કરવામાં મુશ્કેલી પડી હતી. વધારે વજન હોવાને કારણે તેને ઘણી ફિલ્મો મળી શકી ન હતી. સોનાક્ષીએ પોતાની કારકિર્દીના શરૂઆતના દિવસોને યાદ કરતી એક ઘટના શેર કરી અને જણાવ્યું કે કેવી રીતે એક ટિપ્પણીએ તેને સંપૂર્ણપણે હચમચાવી નાખી હતી. સોનાક્ષીએ કહ્યું હતું કે- ‘વધારે વજન હોવાને કારણે મને કોઈ ફિલ્મમાં મુખ્ય ભૂમિકા ન મળી. મને કહેવામાં આવ્યું હતું કે તું આ ભૂમિકામાં સારી નહીં દેખાઈશ. પછી મને સાઈડ રોલ ઓફર કરવામાં આવ્યો. એવું કહેવામાં આવ્યું હતું કે તને નાનો રોલ આપવામાં આવી રહ્યો છે. આ સાંભળીને મને ખૂબ ખરાબ લાગ્યું.’
સોનાક્ષીએ આગળ કહ્યું,’જ્યારે હું ઘરે આવી ત્યારે મેં મારી માસીને ગળે લગાવીને રડવા લાગી. મારા મનમાં એક જ પ્રશ્ન હતો કે મારી સાથે આવું કેમ થઈ રહ્યું છે? ભગવાને મને આવી કેમ બનાવી? હું મારી જાતને પ્રશ્ન કરી રહી હતી અને રડી રહી હતી.’ આ ઘટના પછી, સોનાક્ષીએ વજન ઘટાડવાની સફર શરૂ કરી અને થોડા મહિનામાં 30 કિલો વજન ઘટાડ્યું. વજન ઘટાડ્યા પછી તેણે સુપરસ્ટાર સલમાન ખાનની ‘દબંગ’ ફિલ્મથી બોલિવૂડમાં પ્રવેશ કર્યો અને તેની પહેલી ફિલ્મથી જ તે પ્રખ્યાત થઈ. આ ફિલ્મ સુપર-ડુપર હિટ રહી અને સોનાક્ષીની કારકિર્દી પણ ઝડપથી આગળ વધી.
તેણીને દબંગ કેવી રીતે મળી?
સોનાક્ષી સિંહાએ કરીના કપૂર ખાનના પોડકાસ્ટ ‘વોટ વુમન વોન્ટ સીઝન 5’ માં ભાગ લીધો અને સલમાન ખાનની ફિલ્મ ‘દબંગ’ માં તેની એન્ટ્રી વિશે વાત કરી. તેણીએ કહ્યું હતું – ‘સલમાન ખાન અને અરબાઝ ખાને મને અમૃતાના લગ્નમાં જોઈ હતી. ત્યાં સુધીમાં મેં ઘણું વજન ઘટાડી દીધું હતું. તે સમય દરમિયાન, અરબાઝે મને કહ્યું કે તે કંઈક લખી રહ્યો છે અને હું તે ભૂમિકા માટે યોગ્ય છું. મને લાગ્યું કે તે મજાક હશે, પણ પછી એક દિવસ તે સ્ક્રિપ્ટ લઈને મારા ઘરે આવ્યો. આખો પરિવાર સાથે બેસીને સ્ક્રિપ્ટ સાંભળી રહ્યો હતો અને તે પછી હું દબંગના સેટ પર હતી. એવું લાગ્યું કે જાણે કોઈ અરેન્જ મેરેજ ચાલી રહ્યા હોય.
