SC એ NCWની ‘તમામ ધર્મની છોકરીઓની લગ્નની ઉંમર 18 વર્ષ કરવાની’ માંગણી પર કેન્દ્રનો જવાબ માંગ્યો

મુસ્લિમ મહિલાઓ માટે લગ્નની લઘુત્તમ વય 18 વર્ષ કરવાની માંગ પર સુપ્રીમ કોર્ટે કેન્દ્ર સરકારને નોટિસ પાઠવી છે. રાષ્ટ્રીય મહિલા આયોગ (NCW)ની અરજી પર કોર્ટે આ નોટિસ જારી કરી છે. મુસ્લિમ પર્સનલ લો હેઠળ છોકરીના લગ્ન તરુણાવસ્થા અથવા 15 વર્ષની ઉંમરે થઈ શકે છે.

મહિલા આયોગે એમ પણ કહ્યું છે કે બળાત્કાર, પોક્સો એક્ટ જેવા મામલામાં 18 વર્ષથી ઓછી ઉંમરની તમામ મહિલાઓને સગીર ગણવામાં આવે છે, પરંતુ મુસ્લિમ પર્સનલ લોને કારણે તેના અમલમાં સમસ્યા છે. 17 ઓગસ્ટે દિલ્હી હાઈકોર્ટે 15 વર્ષની મુસ્લિમ યુવતી અને 25 વર્ષના મુસ્લિમ યુવકના લગ્નને યોગ્ય ઠેરવ્યું હતું. આ મામલામાં યુવતીના પરિવારે યુવક વિરુદ્ધ બળાત્કાર અને પોક્સો એક્ટની કલમો હેઠળ કેસ દાખલ કર્યો હતો, પરંતુ કોર્ટના આદેશ બાદ યુવકને રાહત મળી છે. રાષ્ટ્રીય મહિલા આયોગે પોતાની અરજીમાં આ બાબતનો ઉલ્લેખ કર્યો છે.
મહિલા આયોગે શું કરી માંગ?
મહિલા આયોગે માંગણી કરી છે કે ફોજદારી કાયદાની તમામ કલમો તમામ ધર્મના લોકો પર લાગુ થવી જોઈએ. અરજીમાં એમ પણ કહેવામાં આવ્યું છે કે સામાન્ય કાયદામાં છોકરીઓની પુખ્ત બનવા અને લગ્ન કરવાની ઉંમર 18 વર્ષ છે. અન્ય તમામ ધર્મોના કાયદા આ ઉંમરે લગ્નની મંજૂરી આપે છે, પરંતુ મુસ્લિમ પર્સનલ લોમાં પરિસ્થિતિ અલગ છે.

 

કેન્દ્ર પાસેથી જવાબ માંગ્યો

વરિષ્ઠ વકીલ ગીતા લુથરા અરજીની દલીલ કરવા માટે કોર્ટમાં હાજર થયા હતા, પરંતુ તેમના વતી દલીલો શરૂ કરતા પહેલા જ મુખ્ય ન્યાયાધીશ ડીવાય ચંદ્રચુડ અને ન્યાયમૂર્તિ પીએસ નરસિમ્હાની બેન્ચે આ મામલે નોટિસ જારી કરી હતી. કોર્ટે કેન્દ્ર સરકારને જવાબ આપવા માટે 4 અઠવાડિયાનો સમય આપ્યો છે. અગાઉ નેશનલ કમિશન ફોર પ્રોટેક્શન ઓફ ચાઈલ્ડ રાઈટ્સ (NCPCR) એ પંજાબ અને હરિયાણા હાઈકોર્ટના સમાન નિર્ણયને ટાંકીને સ્પષ્ટતા માંગી હતી. આ મામલે પણ સુપ્રીમ કોર્ટની અન્ય બેન્ચે નોટિસ જારી કરી છે. આશા છે કે ભવિષ્યમાં બંને કેસની સુનાવણી એકસાથે થઈ શકે છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]