નવી દિલ્હીઃ વકફ સંશોધન બિલ સંસદનાં બંને ગૃહોમાંથી પાસ થઈ ગયું છે. એ પછી ઉત્તર પ્રદેશની યોગી સરકાર એક્શનમાં આવી છે. સરકારે બધા જિલ્લાના DMને નિર્દેશ આપ્યો છે કે તેઓ ઝુંબેશ ચલાવીને એવી વકફ સંપત્તિઓની ઓળખ કરે, જે રેવેન્યુ રેકોર્ડમાં ના નોંધાયેલી છે અને જેને નિયમોને નજરઅંદાજ કરીને વકફ ઘોષિત કરવામાં આવી છે. આ સંપત્તિઓની ઓળખ કરીને એને જપ્ત કરવામાં આવશે.
હવે યોગી સરકારે વક્ફ બોર્ડ દ્વારા ગેરકાયદે જાહેર કરેલી મિલકતો સામે કડક વલણ અપનાવવાનું શરૂ કરી દીધું છે. મહેસૂલ વિભાગના જણાવ્યા અનુસાર UPમાં વક્ફ બોર્ડ દ્વારા દાવો કરવામાં આવેલી મોટા ભાગની મિલકતોનો કોઈ સત્તાવાર રેકોર્ડ નથી. રેવન્યુ રેકોર્ડ મુજબ સુન્ની વક્ફ બોર્ડની 2533 મિલકતો અને શિયા વક્ફ બોર્ડની માત્ર 430 મિલકતો સત્તાવાર રીતે નોંધાયેલી છે. જ્યારે વક્ફ બોર્ડ દ્વારા જાહેર કરાયેલા આંકડા આના કરતાં ઘણા વધારે છે. સુન્ની વક્ફ બોર્ડ પાસે 1,24,355 મિલકતો છે અને શિયા વક્ફ બોર્ડ પાસે 7785 મિલકતો છે.
રાજ્યમાં મોટા પાયે તળાવ, કોઠાર અને ગ્રામ્ય સમાજની જમીનોને પણ વક્ફ તરીકે જાહેર કરવામાં આવી છે, જેને સરકારે સંપૂર્ણપણે ગેરકાયદે ગણાવી છે. અધિકારીઓનું કહેવું છે કે સરકારી જમીન, ગામની સામુદાયિક જમીન અને જાહેર મિલકતોને કોઈ પણ સંજોગોમાં વક્ફ જાહેર કરી શકાય નહીં. ફક્ત તે જ મિલકતોને વક્ફ તરીકે ગણવામાં આવશે જે વ્યક્તિ દ્વારા સ્પષ્ટપણે દાન કરવામાં આવી હોય.
ઘણા જિલ્લાઓમાં તળાવ, ગોચર, કોઠાર અને જાહેર ઉપયોગની જમીનોને વક્ફ જાહેર કરીને કબજે કરવામાં આવી હતી. હવે આવા કેસોમાં કડક તપાસ બાદ જમીનને સરકારી મિલકત જાહેર કરીને પરત આપવામાં આવશે. સરકારે સ્પષ્ટ કર્યું છે કે વક્ફને ગેરકાયદે જાહેર કરવામાં આવેલી દરેક મિલકત સામે કાયદેસરની કાર્યવાહી કરવામાં આવશે, અને દોષિતોને પણ જવાબદાર ગણવામાં આવશે,એમ સૂત્રોએ જણાવ્યું હતું.
