નવી દિલ્હીઃ છેલ્લા 20 વર્ષ કરતા પણ વધારે સમયથી VIP સીટ રહેલી નવી દિલ્હી વિધાનસભાના ચૂંટણી પરિણામો પર માત્ર દિલ્હી જ નહી પરંતુ આખા દેશની નજર રહેશે. કારણ કે આ સીટ પરથી આમ આદમી પાર્ટીના વડા અરવિંદ કેજરીવાલ ચૂંટણી મેદાને છે. જો આ સીટ પર અરવિંદ કેજરીવાલે ત્રીજી વાર પણ જીત મેળવી લીધો તો, તેઓ શીલા દીક્ષિતનો રેકોર્ડ તોડી નાંખશે. શીલા દીક્ષીત સતત આ સીટ પરથી ત્રણવાર જીતી છે. અરવિંદ કેજરીવાલ 2013 અને 2015 માં થયેલી વિધાનસભા ચૂંટણીમાં નવી દિલ્હી સીટ પરથી જીત મેળવી ચૂક્યા છે.
દિલ્હી વિધાનસભા ચૂંટણી 2013 માં અરવિંદ કેજરીવાલે રાજનૈતિક જીવનની પ્રથમ ચૂંટણી આ સીટ પરથી લડતા 15 વર્ષ સુધી દિલ્હીના મુખ્યમંત્રી રહેલા શીલા દીક્ષિતને મોટા અંતરથી હરાવ્યા હતા. બાદમાં દિલ્હી વિધાનસભા ચૂંટણી 2015 માં અરવિંદ કેજરીવાલે ભાજપના નૂપુર શર્માને પણ ખાસ્સા વોટથી હરાવ્યા હતા. બાદમાં આ સીટ અરવિંદ કેજરીવાલની માનવામાં આવે છે. આ વિધાનસભા વિસ્તારમાં મોટાભાગના સરકારી કર્મચારીઓ રહે છે.
આ વખતે અરવિંદ કેજરીવાલ સામે ભાજપમાંથી સુનીલ યાદવ અને કોંગ્રેસમાંથી રમેશ સભરવાલ ઉમેદવાર છે. બંન્ને પોતાના જોરદાર પ્રચાર દ્વારા કેજરીવાલ સામે પડકાર ફેંકી રહ્યા છે, એક બાજુ આમ આદમી પાર્ટી આશ્વસ્ત છે કે કેજરીવાલ જીતશે, તો ભાજપના ઉમેદવાર સુનીલ યાદવ અને કોંગ્રેસના રમેશ સભરવાલનું કહેવું છે કે અમે જીતીશું. આજે મતદાન બાદ 11 ફેબ્રુઆરીના રોજ પરિણામો આવશે, ત્યારે આવામાં કોઈપણ પાર્ટીના ઉમેદવાર જીતે પરંતુ એ વાત તો ચોક્કસ છે આ પરિણામ પર સહુકોઈની નજર રહેશે.
મહત્વનું છે કે, નવી દિલ્હી વિધાનસભા સીટ બે દશક કરતા પણ વધારે સમયથી વીવીઆઈપી સીટ છે. વર્ષ 2008 માં નવી દિલ્હી સીટ અસ્તિત્વમાં આવી હતી.
