મુંબઈઃ સાંતાક્રૂઝ પૂર્વમાં આવેલા વાકોલા વિસ્તારમાં આજે સવારે બનેલા એક ગમખ્વાર બનાવમાં એક પોલીસ ઈન્સ્પેક્ટર એમની મોટરસાઈકલ પર જતા હતા ત્યારે ‘બેસ્ટ’ની એક બેફામ સ્પીડમાં જતી બસે પાછળથી ટક્કર મારતાં ઈન્સ્પેક્ટરનું મૃત્યુ નિપજ્યું હતું.
તે ઈન્સ્પેક્ટરનું નામ પ્રવીણ અશોક દિનકર છે. તેઓ 43 વર્ષના હતા અને મરીન ડ્રાઈવ પોલીસ સ્ટેશનમાં ફરજ બજાવતા હતા. તેઓ આજે સવારે 9 વાગ્યે સાંતાક્રૂઝ પૂર્વમાં એમના સત્તાવાર ક્વાર્ટર્સમાંથી નીકળી એમના કામ પર જતા હતા ત્યારે ન્યૂ મોડર્ન સ્કૂલ નજીક એમની મોટરસાઈકલને ‘બેસ્ટ’ની એક બસે પાછળથી જોરદાર ટક્કર મારી હતી. એમને માથામાં ગંભીર ઈજા થઈ હતી. એમને વી.એન. દેસાઈ હોસ્પિટલમાં લઈ જવામાં આવ્યા હતા, પરંતુ ત્યાં ડોક્ટરોએ એમને મૃત લાવેલા ઘોષિત કર્યા હતા. તમામ વરિષ્ઠ પોલીસ અધિકારીઓએ હોસ્પિટલની મુલાકાત લીધી હતી. પોલીસે અકસ્માતનો કેસ નોંધ્યો છે.
