ભારતે ફ્રાન્સ પાસેથી 26 રાફેલ મરીન ફાઇટર જેટ ખરીદવાના મેગા ડીલને મંજૂરી આપી દીધી છે. 63,000 કરોડ રૂપિયાથી વધુના આ સરકારી સોદા પર ટૂંક સમયમાં હસ્તાક્ષર થઈ શકે છે. આ સોદા હેઠળ, ભારતીય નૌકાદળને 22 સિંગલ-સીટર અને ચાર ટ્વીન-સીટર વિમાન મળશે. સમાચાર એજન્સીએ સરકારી સૂત્રોને ટાંકીને આ દાવો કર્યો છે. આ સોદો ભારતીય વાયુસેનાના રાફેલ વિમાનોની ક્ષમતાઓને અપગ્રેડ કરવામાં પણ મદદ કરશે. રાફેલ-એમ જેટને ભારતીય નૌકાદળના વિમાનોના કાફલામાં સામેલ કરવામાં આવશે.
સૂત્રોના જણાવ્યા અનુસાર, આ મેગા ખરીદી પ્રોજેક્ટને વડા પ્રધાન નરેન્દ્ર મોદીના નેતૃત્વ હેઠળની સુરક્ષા અંગેની કેબિનેટ સમિતિ દ્વારા મંજૂરી આપવામાં આવી છે. જુલાઈ 2023 માં, સંરક્ષણ મંત્રાલયે ફ્રાન્સ પાસેથી 26 રાફેલ મેરીટાઇમ જેટ ખરીદવાની મંજૂરી આપી. તેને સ્વદેશી વિમાનવાહક જહાજ INS વિક્રાંત પર તૈનાત કરવામાં આવશે. મંત્રાલયે ફ્રાન્સ પાસેથી ત્રણ સ્કોર્પિયન સબમરીન ખરીદવાને પણ મંજૂરી આપી હતી. જોકે, CCS એ હજુ સુધી આ પ્રોજેક્ટને મંજૂરી આપી નથી. ભારતીય વાયુસેનાએ 36 રાફેલ ફાઇટર જેટ ઉડાન ભરી શકે તેવી સ્થિતિમાં ખરીદ્યા છે.
રાફેલ-એમ જેટ ફ્રાન્સની દસોલ્ટ એવિએશન કંપની દ્વારા ઉત્પાદિત ભારતીય વાયુસેનાના રાફેલ વિમાન જેવી અત્યાધુનિક ટેકનોલોજી અને ક્ષમતાઓથી સજ્જ હશે. આ વિમાનો ભારતીય નૌકાદળ માટે ગેમ-ચેન્જર સાબિત થશે, જે સમુદ્રમાં સંચાલન કરવાની તેની ક્ષમતાઓમાં વધારો કરશે. આ જેટનો ઉપયોગ એરક્રાફ્ટ કેરિયર્સ પર પણ કરવામાં આવશે, જે ભારતીય નૌકાદળની વ્યૂહાત્મક શક્તિમાં ઘણો વધારો કરશે.
