બેલગ્રેડઃ 14 વર્ષના એક સ્કૂલ વિદ્યાર્થીએ આ રાષ્ટ્રીય પાટનગર શહેરની એક પ્રાથમિક શાળામાં ગોળીબાર કરતાં આઠ બાળકો માર્યા ગયા છે. કિશોરે કરેલા ગોળીબારમાં એક સુરક્ષા ચોકિયાતનું પણ મરણ નિપજ્યું છે. બીજાં છ બાળકો અને એક શિક્ષક જખ્મી થયાં છે અને એમને સારવાર માટે હોસ્પિટલમાં દાખલ કરવામાં આવ્યાં છે. હુમલાખોર કિશોરની ધરપકડ કરવામાં આવી છે.
આ ઘટના બેલગ્રેડના વ્રેકાર ઉપનગરમાં આવેલી વ્લાડિસ્લાવ રિબનીકાર એલીમેન્ટ્રી સ્કૂલમાં સ્થાનિક સમય મુજબ આજે સવારે 8.40 વાગ્યે બની હતી.
હુમલાખોર કિશોર એ જ શાળામાં સાતમા ધોરણમાં ભણે છે. એ એના પિતાની હેન્ડગન સહિત બે બંદૂક અને બે પેટ્રોલ બોમ્બ લઈને શાળામાં ગયો હતો. કયા સાથી વિદ્યાર્થીઓને મારી નાખવા એમનાં નામની યાદી પણ એણે અગાઉથી તૈયાર કરી હતી.
