ઈઝરાયલી સેનાના ગાઝા પર સતત પાંચ દિવસના ભયંકર હુમલાઓમાં 320 લોકોનાં મોત થયાં છે, જેમાં બાળકો અને મહિલાઓનો સમાવેશ થાય છે. શરણાર્થી શિબિરો અને હોસ્પિટલોને મોટું નુકસાન થયું છે. ઈઝરાયલના વડાપ્રધાન બેન્જામિન નેતન્યાહૂએ ગાઝા પર સંપૂર્ણ કબજાની ઘોષણા કરી, જેણે વૈશ્વિક સ્તરે ખળભળાટ મચાવ્યો છે. નેતન્યાહૂએ ટેલિગ્રામ પર વીડિયોમાં જણાવ્યું કે, “અમે ગાઝા પટ્ટીના તમામ વિસ્તારો પર કબજો કરીશું. અમે હાર નહીં માનીએ.”
ઈઝરાયલી સેના (IDF)એ દક્ષિણ ગાઝાના ખાન યુનુસ અને આસપાસના વિસ્તારોને તાત્કાલિક ખાલી કરવાનો આદેશ આપ્યો છે. આઈડીએફએ નવું મોટું અભિયાન શરૂ કર્યું, જે હમાસને નાબૂદ કરવા અને બંધકોને મુક્ત કરવા પર કેન્દ્રિત છે. ખાન યુનુસમાં યુરોપિયન હોસ્પિટલ અને નાસર હોસ્પિટલ પર હુમલાઓ થયા, જેમાં 28 અને 2 લોકો માર્યા ગયા.
જણાવી દઈએ કે, 14 મેના ઉત્તર અને દક્ષિણ ગાઝામાં હુમલાઓ થયા હતા, જેમાં બાળકો સહિત 70 લોકોના મોત થયા હતા. જ્યારે 15 મેના ખાન યુનુસમાં હુમલો કરવામાં આવ્યો હતો. જેમાં 54 લોકોના મોત થયા હતા. 16 મેના રોજ ગાઝામાં હુમલાઓ થયા હતા. જેમાં 93 લોકોના મોત થયા હતા. આ ઉપરાંત 17 અને 18 મેના રોજ 103 લોકોના મોત થયાના અહેવાલ મળ્યા હતા. નેતન્યાહૂએ યુદ્ધવિરામ માટે શરતો મૂકી: હમાસે તમામ બંધકો છોડવા, ગાઝાને હથિયારમુક્ત કરવું અને હમાસના આતંકવાદીઓએ ગાઝા છોડવું. તેમણે કહ્યું કે ગાઝાની વસ્તીને ભુખમરા તરફ ન જવા દેવા માટે ન્યૂનતમ ખાદ્ય સહાયની મંજૂરી આપવામાં આવશે.
યુએનના સેક્રેટરી-જનરલ એન્ટોનિયો ગુટેરેસે ઈઝરાયલના વિસ્તૃત અભિયાન પર ચિંતા વ્યક્ત કરી, કહ્યું કે આંતરરાષ્ટ્રીય કાયદાનું પાલન થવું જોઈએ. UNRWAના વડા ફિલિપ લાઝારિનીએ ગાઝામાં માનવતાવાદી સહાય પર નાકાબંધીની ટીકા કરી, ચેતવણી આપી કે ખોરાક બગડી રહ્યો છે અને અકાળનો ખતરો છે. નેતન્યાહૂના કબજાના નિવેદન અને હોસ્પિટલો પરના હુમલાઓએ વૈશ્વિક નિંદા ઉભી કરી. હ્યુમન રાઈટ્સ વૉચે ઈઝરાયલ અને હમાસ બંને પર યુદ્ધ અપરાધોનો આરોપ લગાવ્યો. આંતરરાષ્ટ્રીય ફોજદારી અદાલતે નેતન્યાહૂ વિરુદ્ધ યુદ્ધ અપરાધોના આરોપમાં ધરપકડ વોરંટ જારી કર્યું છે. આ હુમલાઓએ ગાઝાની માનવતાવાદી કટોકટીને વધુ ગંભીર બનાવી, જ્યાં 90% વસ્તી વિસ્થાપિત થઈ છે અને આવશ્યક સેવાઓ ખોરવાઈ છે.
