ફ્રાન્સે સ્વાસ્થ્ય ઈમરજન્સીની મુદત 24 જુલાઈ સુધી લંબાવી

પેરિસઃ ફ્રાન્સે કોરોના વાઈરસના ફેલાવાને રોકવા માટે આદરેલી લડાઈ માટે લાગુ કરેલી સ્વાસ્થ્ય ઈમરજન્સીને 24 જુલાઈ સુધી લંબાવી દીધી છે. આ જાહેરાત આરોગ્ય પ્રધાન ઓલિવીઅર વેરાને કરી છે.

આ વિશેનો પ્રસ્તાવ આવતા સોમવારે સંસદમાં રજૂ કરવામાં આવશે.

ફ્રાન્સમાં હેલ્થ ઈમરજન્સી ગઈ 24 માર્ચથી લાગુ કરવામાં આવી છે અને તે 23 મેએ ઉઠાવી લેવામાં આવશે એવી વાતો સંભળાતી હતી, પરંતુ હવે પ્રસ્તાવમાં એમ કહેવામાં આવ્યું છે કે આ ઈમરજન્સી હાલને તબક્કે ઉઠાવી લેવી એ કસમયની ગણાશે અને એવા સંજોગોમાં કોરોના વાઈરસનો રોગચાળો તીવ્ર બનવાનું જોખમ ઊભું થશે.

ફ્રાન્સમાં દોઢ મહિનાથી લોકડાઉન લાગુ છે. લોકડાઉન નિયંત્રણોને 11 મેથી ધીમે ધીમે હળવા કરવાની સરકારની યોજના છે, પરંતુ હેલ્થ ઈમરજન્સીને 24 જુલાઈ સુધી લંબાવવામાં આવી હોવાથી લોકડાઉન નિયંત્રણોને હળવા કરવામાં અડચણ ઊભી થશે કે કેમ તે કહી શકાય એમ નથી.

ફ્રાન્સના પ્રમુખ ઈમેન્યુઅલ મેક્રોએ કહ્યું છે કે દેશમાં હાલને તબક્કે જનજીવન રાબેતા મુજબનું કરાશે નહીં. દેશને તબક્કાવાર લોકડાઉન-મુક્ત કરવામાં આવશે.

ફ્રાન્સમાં કોરોનાવાઈરસના 1 લાખ 30 હજારથી વધારે કેસો નોંધાયા છે અને મરણનો આંક 24,594 છે.

દુનિયાભરમાં કોરોના વાઈરસના દર્દીઓનો આંકડો વધીને 34 લાખ પર પહોંચી ગયો છે. મૃત્યુ પામેલાઓનો આંકડો 2 લાખ 39 હજારથી વધારેનો છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]