હેમંત સોરેને ચોથી વખત ઝારખંડના મુખ્યમંત્રી તરીકે શપથ લીધા

હેમંત સોરેને ગુરુવારે ઝારખંડના મુખ્યમંત્રી તરીકે ફરી એકવાર રાજ્યનો હવાલો સંભાળ્યો. તેમણે રાંચીમાં આયોજિત ભવ્ય સમારોહમાં રાજ્યના 14મા મુખ્યપ્રધાન તરીકે શપથ લીધા. રાજ્યપાલ સંતોષ કુમાર ગંગવારે સોરેનને પદ અને ગુપ્તતાના શપથ લેવડાવ્યા હતા. સીએમ તરીકે ઝારખંડ મુક્તિ મોરચા (જેએમએમ) નેતાની આ ચોથી ટર્મ છે.

આ દરમિયાન કોંગ્રેસ અધ્યક્ષ મલ્લિકાર્જુન ખડગે, લોકસભામાં વિરોધ પક્ષના નેતા રાહુલ ગાંધી, AAPના રાષ્ટ્રીય સંયોજક અને દિલ્હીના પૂર્વ સીએમ અરવિંદ કેજરીવાલ, પંજાબના સીએમ ભગવંત માન, પશ્ચિમ બંગાળના મુખ્યમંત્રી મમતા બેનર્જી હાજર રહ્યા હતા. આ સાથે JMMના રાષ્ટ્રીય અધ્યક્ષ શિબુ સોરેન અને તેમની પત્ની રૂપી સોરેન પણ શપથ ગ્રહણ દરમિયાન હાજર રહ્યા હતા.

આ સિવાય સમાજવાદી પાર્ટીના પ્રમુખ અને યુપીના પૂર્વ સીએમ અખિલેશ યાદવ, આરજેડી નેતા અને બિહારના પૂર્વ ડેપ્યુટી સીએમ તેજસ્વી યાદવ, ઝારખંડ કોંગ્રેસના રાજ્ય પ્રભારી ગુલામ અહેમદ મીર, કોંગ્રેસ નેતા તારિક અનવર, અપક્ષ સાંસદ પપ્પુ યાદવ, તમિલનાડુના ડેપ્યુટી સીએમ અને ડીએમકે નેતા ઉધયનિધિ સ્ટાલિન, કર્ણાટકના ડેપ્યુટી સીએમ ડીકે શિવકુમાર અને અન્ય ઘણા નેતાઓ હાજર હતા.

ઝારખંડમાં તાજેતરમાં યોજાયેલી વિધાનસભાની ચૂંટણીમાં હેમંત સોરેને બરહૈત બેઠક પર ભાજપના ગમાલીએલ હેમરામને 39,791 મતોના માર્જિનથી હરાવીને જીત મેળવી હતી. જેએમએમની આગેવાની હેઠળના INDIA ગઠબંધને 81 સભ્યોની વિધાનસભામાં 56 બેઠકો જીતીને બહુમતી જાળવી રાખી હતી, જ્યારે ભાજપના નેતૃત્વ હેઠળના એનડીએએ 24 બેઠકો જીતી હતી.

RELATED ARTICLESMORE FROM AUTHOR