વડા પ્રધાન નરેન્દ્ર મોદીએ બુધવારે અમેરિકામાં ખાલિસ્તાની અલગતાવાદી ગુરપતવંત સિંહ પન્નુનની હત્યાના કાવતરાના આરોપો પર પ્રતિક્રિયા આપી હતી. એક ઈન્ટરવ્યુમાં પીએમ મોદીએ કહ્યું કે, જો કોઈ અમને કોઈ માહિતી આપશે તો અમે ચોક્કસપણે તેની તપાસ કરીશું. વાતચીત દરમિયાન પીએમ નરેન્દ્ર મોદીએ આ સંદર્ભમાં રજૂ કરેલા કોઈપણ પુરાવાની તપાસ કરવાની વાત કરી હતી. તેમણે એમ પણ કહ્યું કે અલગ-અલગ ઘટનાઓ યુનાઇટેડ સ્ટેટ્સ અને ભારત વચ્ચેના મજબૂત સંબંધોને વિક્ષેપિત કરશે નહીં.
અમે કાયદો અને વ્યવસ્થા જાળવવા માટે સમર્પિત છીએ
ઈન્ટરવ્યુમાં પીએમ મોદીએ કહ્યું કે, જો કોઈ અમને માહિતી આપશે તો અમે ચોક્કસ તેની તપાસ કરીશું. ભલે આપણા નાગરિકો સકારાત્મક કે નકારાત્મક કાર્યોમાં સામેલ હોય, અમે આ બાબતની તપાસ કરવા તૈયાર છીએ. અમે ગમે ત્યાં કાયદો અને વ્યવસ્થા જાળવવા માટે સમર્પિત છીએ. અમેરિકા અને ભારત વચ્ચેના મજબૂત સંબંધોનો આધાર દ્વિપક્ષીય સમર્થન છે, જે પરિપક્વ અને સ્થિર ભાગીદારીનું સ્પષ્ટ સૂચક છે. સુરક્ષા અને આતંકવાદ વિરોધી સહયોગ અમારી ભાગીદારીનો મુખ્ય ઘટક રહ્યો છે. મને નથી લાગતું કે કેટલીક ઘટનાઓને બંને દેશો વચ્ચેના રાજદ્વારી સંબંધો સાથે જોડવી યોગ્ય છે.
શું છે સમગ્ર મામલો
આ આખો મામલો બ્રિટિશ અખબારના એક અહેવાલથી શરૂ થયો હતો, જેમાં ગયા મહિને કહેવામાં આવ્યું હતું કે ખાલિસ્તાની આતંકવાદી ગુરપતવંત સિંહ પન્નુની હત્યા માટે અમેરિકામાં કાવતરું ઘડવામાં આવ્યું હતું, પરંતુ અમેરિકાએ આ ષડયંત્રને નિષ્ફળ બનાવ્યું હતું. પન્નુની હત્યાના કાવતરામાં સામેલ હોવાના આરોપીઓ વિરુદ્ધ ન્યૂયોર્ક ડિસ્ટ્રિક્ટ કોર્ટમાં સીલબંધ કેસ પણ દાખલ કરવામાં આવ્યો છે.
