રાજકોટઃ રાજકોટમાં લાડાણી જૂથ નામે એક રિયલ એસ્ટેટ કંપની દ્વારા ઇન્કમટેક્સની ચોરી કરવામાં આવી છે અને તેનો બધો ડેટા એક એવી જગ્યાએ રાખવામાં આવ્યો હતો જેના વિશે કોઈને શંકા પણ ન જાય. જેનું પગેરું રાજકોટમાં ઝૂંપડપટ્ટી જેવા વિસ્તારમાં આવેલા એક ઘર સુધી પહોંચ્યું છે.
IT વિભાગે પોલીસની મદદથી લગભગ 450 CCTV કેમેરા ચેક કર્યા અને પછી યુનિવર્સિટી રોડ પર PGVCLની મેઈન ઓફસની પાછળ આવેલા ઝૂંપડપટ્ટી જેવા વિસ્તારમાં અધિકારીઓ પહોંચી ગયા હતા. અહીં તેમણે એક રૂમમાં તપાસ કરી ત્યારે ઈન્કમટેક્સ ચોરીના તમામ પુરાવા મળ્યા હતા.
કંપનીના કાળાં નાણાંને સાચવવાનું તથા તેને હેન્ડલ કરવાનું કામ કંપનીના એકાઉન્ટન્ટ અંકિત શિરા અને રાજ સિસોદિયા દ્વારા કરવામાં આવતું હતું. કોઈને આ વાતના પુરાવા ન મળે તે માટે એકદમ ભંગાર હાલતમાં હોય તેવી જગ્યા પસંદ કરવામાં આવી હતી.
લાડાણી ગ્રૂપે જંગી ટેક્સ ચોરી કરી છે તેવી ચોક્કસ બાતમી મળ્યા પછી ઈન્કમટેક્સ વિભાગે 27 ફેબ્રુઆરીએ લાડાણી જૂથ અને તેના નિકટના લોકોના 30 સ્થળો પર સર્ચ ઓપરેશન કર્યું હતું. જોકે તેમને બ્લેકમની વિશે કોઈ ચોક્કસ પૂરાવા અથવા ડેટા મળ્યો ન હતો. ટ્રાન્ઝેક્શનનો બધો ડેટા લેપટોપમાં અને ફાઈલોમાં સ્ટોર કરવામાં આવ્યો હતો.
ત્યાર પછી CCTV ફૂટેજ ચેક કરવામાં આવતા જાણવા મળ્યું કે લાડાણીના કેટલાક વિશ્વાસુ લોકો PGVCLની ઓફિસ પાછળ આવેલા એક ઝૂંપડી જેવા રૂમમાં જતા હતા અને પાંચ-દશ મિનિટમાં બહાર નીકળતા હતા. આ રૂમની તપાસ કરવામાં આવી તો ત્યાંથી લેપટોપ અને ફિઝિકલ ફાઇલો મળી હતી અને તેમાંથી રૂ. 500 કરોડની ટેક્સ ચોરીની ડિટેલ મળી આવી હતી. રિયલ્ટી કંપનીએ સાવ સાધારણ કહી શકાય તેવો રૂમ રૂ. 4000ના ભાડે રાખ્યો હતો. આ રૂમ ક્યાં આવેલો છે અને તેમાં કયો ડેટા રખાયો છે તેની માહિતી ફક્ત અંકિત શિરા અને રાજ સિસોદિયા પાસે જ હતી. તેઓ દર ચાર મહિને પોતાનું લોકેશન બદલતા રહેતા હતા.
