અમદાવાદઃ દહેરાદૂનના એક નાના શહેરનો રહેવાસી જુબિન એવા કલાકારોમાંનો એક છે જેણે પોતાના મંત્રમુગ્ધ અવાજ અને ભાવપૂર્ણ સંગીતથી લોકોનાં દિલ જીત્યા છે. દહેરાદૂનના ગાયક અને ગીતકાર, જુબિન નૌટિયાલનો સંગીત પ્રત્યેનો પ્રેમ ચાર વર્ષની ઉંમરે શરૂ થયો હતો અને તેણે ગાયક બનવાનું પોતાનું સપનું સાકાર કર્યું હતું.
પ્રસિદ્ધ ગાયક જુબીન નૌટિયાલ સંખ્યાબંધ સફળ ગીતો સાથે એક અનુભવી કલાકાર છે. ફોર્બ્સની 30 અંડર 30ની યાદીમાં સામેલ થયેલા જુબિન નૌટિયાલે તેની એક દાયકાની સંગીત સફર દ્વારા પોતાનું એક વિશિષ્ટ સ્થાન બનાવ્યું છે. તેણે ‘રાતા લંબિયાં’, ‘લૂંટ ગયે’, ‘મેરી આશિકી’, ‘તુઝે કિતને ચાહને લગે હમ’, ‘તુમ હી આના’, ‘બેવફા તેરા મસૂન ચેહરા’, ‘કુછ તો બાતા’ (બજરંગી ભાઇજાન), ‘ઈક વારી આ’ (રાબતા) અને ‘કાબિલ હું’ (કાબિલ), અખ લડ જાવે (લવયાત્રી), હમનવા મેરે (સિંગલ), વગેરે જેવાં હિટ ગીતો સાથે ભારતીય મ્યુઝિક ઇન્ડસ્ટ્રી પર પોતાને નિશ્ચિતપણે સ્થાપિત કરી છે.
તેમણે તેમના કોલેજના દિવસોથી જ શાસ્ત્રીય સંગીતમાં પોતાનો એક આધાર બનાવ્યો એટલું જ નહીં, પરંતુ ગિટાર, પિયાનો, હાર્મોનિયમ અને ડ્રમ જેવા વાદ્યો વગાડવાનું પણ શીખ્યા. ભારતીય સંગીત ઇન્ડસ્ટ્રીમાં તેમની સફર શરૂ કરતાં પહેલા, 32 વર્ષીય ગાયકે ચાર વર્ષ સંગીતમાં તેમની કુશળતાને નિખારવા અને દેશભરના વિવિધ સંગીતકારો સાથે યાત્રા કરવામાં ગાળ્યા હતા.
જુબિને એ.આર. રહેમાન, પ્રીતમ, મિથુન, તનિષ્ક બાગચી, રોચક કોહલી જેવા ભારતના સૌથી પ્રખ્યાત સંગીત દિગ્દર્શકો માટે ગાયું છે અને મેગા ચાર્ટબસ્ટર આપ્યા છે. લાઇવ પર્ફોર્મન્સમાં ગાયક જુબિન નૌટિયાલ સૌથી મોટા કલાકારોમાંનો એક છે.
તેમનું “લૂંટ ગયે” ગ્લોબલ યુટ્યુબ સોંગ્સ ચાર્ટમાં નંબર 1 પર છે, 2022માં ‘શેરશાહ’ ફિલ્મનું તેમનું ગીત ‘રાતા લંબિયા’ ઇન્ટરનેટ પર એટલું હિટ હતું કે તે માત્ર ભારતમાં જ નહીં, પરંતુ વિશ્વના અન્ય ભાગોમાં પણ લોકપ્રિય રીલ ઓડિયો બની ગયું હતું. ‘હમનવા મેરે, દિલ ગલતી કર બેઠા હૈ, ઓ આસમાન વાલે’, ‘કુછ બાતેં, બેવફા તેરા મુસ્કુરાના, વફા ના રહા, મૈં જિસ દિન ભૂલા દું’ અને ‘દિલ પે ઝકમ’ જેવાં તેમનાં ઇન્ડિપેન્ડેન્ટ ગીતો તેમના હૃદયસ્પર્શી અવાજથી દેશભરના દિલો પર રાજ કરી રહ્યા છે.
