હવામાન વિભાગની નવી આગાહી મુજબ, આગામી 24 કલાક પછી ગુજરાતમાં ફરી ગરમીનો પ્રકોપ વધશે. રાજ્યમાં લઘુત્તમ અને મહત્તમ તાપમાનમાં 2થી 3 ડિગ્રી સેલ્સિયસનો વધારો થવાની શક્યતા છે, જેના કારણે લોકોને તીવ્ર ગરમીનો સામનો કરવો પડી શકે છે. આ સ્થિતિ આગામી પાંચ દિવસ સુધી ચાલુ રહેવાની સંભાવના છે. દરિયાકાંઠાના વિસ્તારોમાં ગરમ અને ભેજવાળા પવનોને કારણે બફારાનો અનુભવ થશે, જોકે છેલ્લા કેટલાક દિવસોથી રાજ્યમાં ગરમીથી લોકોને આંશિક રાહત મળી હતી.
હવામાન વિભાગ પ્રમાણે, હાલમાં ગુજરાત પર ઉત્તર-પશ્ચિમ અને ઉત્તર દિશામાંથી પવનો ફૂંકાઈ રહ્યા છે, જે આગામી 24 કલાક સુધી યથાવત્ રહેશે. પરંતુ 24 માર્ચે ઉત્તર ભારતમાં એક વેસ્ટર્ન ડિસ્ટર્બન્સની અસર થશે, જેના પરિણામે ગુજરાતમાં તાપમાનમાં વધારો જોવા મળશે. અમદાવાદ અને ગાંધીનગરમાં આજે વાતાવરણ શુષ્ક રહેશે, અને મહત્તમ તાપમાન 37 ડિગ્રી સેલ્સિયસ આસપાસ રહેવાની શક્યતા છે. ગઈકાલે અમદાવાદમાં તાપમાનમાં થોડો ઘટાડો નોંધાયો હતો, પરંતુ 24 કલાક બાદ ફરીથી 2થી 3 ડિગ્રીનો વધારો થશે. આ ગરમીના મોજાથી રાજ્યના રહેવાસીઓએ સાવચેત રહેવું પડશે.
