નવી દિલ્હીઃ બોલીવુડ એક્ટ્રેસ તાપસી પન્નુની આગામી ફિલ્મ “થપ્પડ” નો ફર્સ્ટ લૂક રિલીઝ કરી દેવામાં આવ્યો છે. તાપસીએ પોતાના સોશિયલ મીડિયા અકાઉન્ટ ટ્વીટર અને ઈન્સ્ટાગ્રામ પર ફિલ્મનું પોસ્ટર રિલીઝ કર્યું છે. આ પોસ્ટરમાં તાપસીનો માત્ર ચહેરો દેખાઈ રહ્યો છે જેને જોતા લાગી રહ્યું છે કે જાણે કોઈ તાપસીના ગાલ પર લાફો મારી રહ્યું હોય. પોસ્ટર શેર કરતા તાપસીએ એક દમદાર કેપ્શન પણ લખી છે. તાપસીએ લખ્યું કે, શું આ સામાન્ય વાત છે? શું પ્રેમમાં આ યોગ્ય છે? આ થપ્પડની પ્રથમ ઝલક છે. 
પોસ્ટરમાં એ વાતની પણ જાણકારી આપવામાં આવી છે કે ફિલ્મનું ટ્રેલર આવતીકાલે એટલે કે 31 જાન્યુઆરીના રોજ રિલીઝ કરવામાં આવશે. ફિલ્મ 28 ફેબ્રુઆરીના રોજ રિલીઝ થશે. ફિલ્મનું ડિરેક્શન અનુભવ સિન્હા કરી રહ્યા છે. આ પહેલા વર્ષ 2019 માં અનુભવ સિન્હાની “આર્ટિકલ 15” ફિલ્મ રિલીઝ થઈ હતી જેને લોકોએ ખૂબ વખાણી હતી. તાપસી પણ અનુભવ સિન્હા સાથે બીજીવાર કામ કરી રહી છે. આ પહેલા તેણે “મુલ્ક” ફિલ્મમાં તેમની સાથે કામ કર્યું હતું.
થપ્પડ સિવાય આ વર્ષે તાપસી “શાબાશ મિટ્ઠૂ” નામની ફિલ્મમાં પણ દેખાશે. આ ફિલ્મ મહિલા ક્રિકેટ ટીમની કેપ્ટન મિતાલી રાજના જીવન પર આધારિત હશે. આ ફિલ્મનું પોસ્ટર પણ રિલીઝ કરી દેવામાં આવ્યું છે. પોસ્ટરમાં તાપસી પોતાના માથા પર હેટ લગાવીને હાથમાં બેટ લઈને શોટ મારવાનો પ્રયત્ન કરી રહી છે. પોસ્ટર શેર કરતા તાપસીએ લખ્યું હતું કે, મને હંમેશા પૂછવામાં આવ્યું કે આપનો ગમતો ક્રિકેટર કોણ છે. પરંતુ તમારે પૂછવું જોઈએ કે તમારી ગમતી મહિલા ક્રિકેટર કોણ છે? આ નિવેદનથી ખ્યાલ આવે કે ક્રિકેટ લવર હકીકતમાં ક્રિકેટને પ્રેમ કરે છે કે પછી એ જેન્ડરને કે જે રમી રહ્યા છે. મિતાલી રાજ તમે એક ગેમ ચેન્જર છો.
