લોસ એન્જેલીસ/મુંબઈઃ બોલીવુડનો ‘કિંગ ખાન’, ‘બાદશાહ ખાન’, સુપરસ્ટાર શાહરૂખ ખાનને અમેરિકાના લોસ એન્જેલીસ શહેરમાં કોઈક શૂટિંગ કરતી વેળા ગંભીર ઈજા થઈ છે. અખબારી અહેવાલો અનુસાર, શાહરૂખ એના નાક પર પાટો બાંધેલી હાલતમાં દેખાયો હતો. એ હવે ભારત પાછો આવી ગયો છે અને મુંબઈસ્થિત એના ઘરમાં સ્વસ્થ થઈ રહ્યો છે. જોકે હજી સુધી શાહરૂખ કે એની ટીમ તરફથી તે અકસ્માત અંગે કોઈ નિવેદન બહાર પાડવામાં આવ્યું નથી.
(ફાઈલ તસવીર)
ETimesના અહેવાલ મુજબ, શાહરૂખ લોસ એન્જેલીસમાં કોઈક પ્રોજેક્ટ માટે શૂટિંગ કરવા ગયો હતો. ત્યાં એને નાક પર ઈજા થઈ હતી. એને લોહી વહેવા લાગ્યું હતું અને એને તત્કાળ હોસ્પિટલમાં લઈ જવામાં આવ્યો હતો. એની ટીમના સભ્યોને ડોક્ટરોએ જણાવ્યું હતું કે કોઈ ચિંતા કરવાની જરૂર નથી અને લોહી વહેતું રોકવા માટે શાહરૂખની મામુલી સર્જરી કરવાની જરૂર છે. બાદમાં શાહરૂખનું ઓપરેશન કરવામાં આવ્યું હતું. શાહરૂખ નાક પર પાટો બાંધેલી હાલતમાં જોવા મળ્યો હતો અને તે હવે ભારત પાછો ફર્યો છે.
હિન્દી ફિલ્મ ઉદ્યોગમાં 31 વર્ષ પૂરા કરનાર શાહરૂખ આ વર્ષના જાન્યુઆરીમાં પઠાણ ફિલ્મમાં જોવા મળ્યો હતો. તેની નવી ફિલ્મ આવી રહી છે જવાન, જે 7 સપ્ટેમ્બરે થિયેટરોમાં રિલીઝ થવાની છે. તે એક્શન-પેક્ડ ફિલ્મમાં એની સાથે દક્ષિણી ફિલ્મોની અભિનેત્રી નયનતારા અને અભિનેતા વિજય સેતુપતિ પણ છે. તદુપરાંત રાજકુમાર હિરાની દિગ્દર્શિત ફિલ્મ ડંકીમાં પણ શાહરૂખે મુખ્ય ભૂમિકા ભજવી છે. એમાં તેની હિરોઈન છે તાપસી પન્નૂ. ડંકીની રિલીઝ તારીખ હજી જાહેર કરવામાં આવી નથી.
