મુંબઈઃ બોલીવુડ સુપરસ્ટાર અક્ષય કુમાર દિગ્દર્શક રોહિત શેટ્ટીની ‘સિંઘમ અગેન’ ફિલ્મમાં મહત્ત્વની ભૂમિકામાં છે. શેટ્ટીએ અક્ષયના શૂટિંગનું ફર્સ્ટ લુક રિલીઝ કર્યું છે. એમાં અક્ષય એક હેલિકોપ્ટરમાંથી બંને હાથમાં મશીન ગન પકડીને છલાંગ લગાવતો દેખાય છે. આ ફિલ્મમાં અક્ષય કુમાર એટીએસ વડા ‘વીર સૂર્યવંશી’નું પાત્ર ભજવે છે. ઉલ્લેખનીય છે કે, અક્ષય બે વર્ષ પહેલાં ‘સૂર્યવંશી’ ફિલ્મમાં ચમક્યો હતો.
રોહિત શેટ્ટીએ બહાદુર પોલીસ અધિકારીના વિષયવાળી 3 મોટી ફિલ્મ બનાવી છે – ‘સિંઘમ’, ‘સિમ્બા’ અને ‘સૂર્યવંશી’. ‘સિંઘમ’માં અજય દેવગન, ‘સિમ્બા’માં રણવીર સિંહ અને ‘સૂર્યવંશી’માં અક્ષય કુમારને ચમકાવ્યો હતો. ‘સિંઘમ અગેન’નું શૂટિંગ ગયા સપ્ટેમ્બરમાં શરૂ કરાયું હતું. એમાં દીપિકા પદુકોણ અને કરીના કપૂર-ખાન બે અભિનેત્રીઓ તરીકે છે.
