મુંબઈઃ બોલીવુડ સુપરસ્ટાર આમિર ખાનની પુત્રી ઈરા ખાન આવતા વર્ષના જાન્યુઆરીમાં ઉદયપુરમાં ખાનગી કાર્યક્રમમાં એનાં ફિયાન્સ નુપૂર શિખારે સાથે લગ્ન કરશે. સૂત્રોના જણાવ્યાનુસાર, ઈરા-નુપૂરનાં લગ્ન ઉજવણી કાર્યક્રમ ત્રણ-દિવસનો રહેશે, જેમાં માત્ર બે પરિવારનાં સભ્યો જ હાજર રહેશે. ઈરા અને નુપૂર ડિસેમ્બરના આખરી સપ્તાહમાં મુંબઈમાં કોર્ટમાં જઈને એમનાં લગ્ન રજિસ્ટર કરાવશે અને ત્યારબાદ ઉદયપુર જશે અને જાન્યુઆરીના પહેલા સપ્તાહમાં લગ્ન સમારોહ યોજશે. ઈરા આમિર ખાન અને તેની પહેલી પત્ની રીના દત્તાની પુત્રી છે. તેણે 2022ની 18 નવેમ્બરે નુપૂર સાથે સગાઈ કરી હતી. તે કાર્યક્રમમાં આમિર, રીના, કિરણ રાવ, આમિરનો પિતરાઈ ભાઈ ઈમરાન ખાન તથા યુગલનાં પરિવારનાં સભ્યો ઉપસ્થિત રહ્યાં હતાં. નુપૂર ફિટનેસ ટ્રેનર છે.
2022ના સપ્ટેમ્બરમાં ઈટાલીમાં એક ટ્રાયથ્લોન વખતે નુપૂરે ઈરા સમક્ષ લગ્નનો પ્રસ્તાવ મૂક્યો હતો. બંને જણ સોશિયલ મિડિયા પર એમનાં પ્રેમને પ્રદર્શિત કરવામાં ક્યારેય સંકોચ અનુભવતાં નથી.
