નવી દિલ્હીઃ દિગ્ગજ મનોરંજન કંપની ડિઝની (Disney)માં ફરી એક વાર મોટા પાયે કર્મચારીઓની છટણી કરવાની તૈયારી ચાલી રહી છે. કંપની પોતાના ખર્ચમાં ઘટાડો કરવા માટે કર્મચારીઓની સંખ્યા ઓછી કરવાનું વિચારી રહી છે. અનેક અહેવાલો અનુસાર કેટલાક મેનેજર્સને વાર્ષિક ખર્ચમાં 20 ટકા સુધીની બચત કરવાનો લક્ષ્યાંક આપવામાં આવ્યો છે. જોકે કંપનીએ હજુ સુધી સ્પષ્ટ કર્યું નથી કે આ યોજના હેઠળ કેટલા કર્મચારીઓની નોકરી જઈ શકે છે. જો આ યોજના અમલમાં આવશે તો હજારો કર્મચારીઓ પર તેની અસર પડી શકે છે.
અહેવાલો અનુસાર ડિઝનીના કેટલાક મેનેજર્સને એવા ઉપાયો શોધવા માટે કહેવામાં આવ્યું છે, જેના દ્વારા કંપનીના વાર્ષિક ખર્ચમાં 20 ટકા સુધીનો ઘટાડો કરી શકાય. આ માટે અલગ-અલગ બિઝનેસ યુનિટમાં કર્મચારીઓની સંખ્યા ઘટાડવાથી લઈને કામકાજની વ્યવસ્થામાં ફેરફાર કરવા સુધીના વિકલ્પો પર વિચાર કરવામાં આવી રહ્યો છે. જોકે છટણીની અસર કંપનીના તમામ વિભાગો પર એકસરખી નહીં હોય. કેટલાક વિભાગોમાં વધુ કર્મચારીઓની છટણી થઈ શકે છે, જ્યારે અન્ય વિભાગોને તેમાંથી રાહત મળી શકે છે.
AI અને સ્ટ્રીમિંગથી વધી રહ્યા છે પડકારો
ડિઝનીના નવા CEO જોશ ડી’અમારો સામે અનેક પડકારો છે. મનોરંજન ઉદ્યોગમાં આર્ટિફિશિયલ ઇન્ટેલિજન્સ (AI)નો ઉપયોગ ઝડપથી વધી રહ્યો છે. આ ઉપરાંત ફિલ્મોનું બોક્સ ઓફિસ પરનું પ્રદર્શન અપેક્ષા મુજબ ન રહેવું, સ્ટ્રીમિંગ બિઝનેસમાં વધી રહેલી સ્પર્ધા અને આંતરરાષ્ટ્રીય થીમ પાર્કમાં મુલાકાતીઓની સંખ્યાની ધીમી વૃદ્ધિએ કંપની પર દબાણ વધાર્યું છે. કંપની ખર્ચ ઘટાડીને પોતાની આવક અને નફામાં સુધારો કરવા માગે છે.
બચાવેલી રકમનો ક્યાં ઉપયોગ કરશે ડિઝની?
ડિઝનીની યોજના માત્ર ખર્ચ ઘટાડવા પૂરતી મર્યાદિત નથી. અહેવાલો અનુસાર કર્મચારીઓની છટણી અને અન્ય ઉપાયો દ્વારા બચાવવામાં આવેલી રકમનો ઉપયોગ કંપની પોતાના વિકાસ સાથે જોડાયેલા બિઝનેસમાં કરી શકે છે. તેમાં ફિલ્મ અને ટીવી કન્ટેન્ટ, ટેક્નોલોજી, થીમ પાર્ક અને ઝડપથી વિસ્તરી રહેલા ક્રૂઝ બિઝનેસને પ્રાથમિકતા આપવામાં આવી શકે છે. આ પહેલાં ભૂતપૂર્વ CEO બોબ આઇગરના નેતૃત્વમાં કંપનીએ મોટા પુનર્ગઠન કાર્યક્રમ હેઠળ આશરે 7000 કર્મચારીઓની છટણી કરી હતી. તે સમયે ડિઝનીએ 5.5 અબજ ડોલરની બચત કરવાનો લક્ષ્યાંક રાખ્યો હતો.
