મુંબઈઃ દેશના અગ્રણી એક્સચેન્જ BSEના ઈક્વિટી ડેરિવેટિવ્ઝ સેગમેન્ટમાં ટર્નઓવરે એક લાખ કરોડ રૂપિયાની સપાટી વટાવી રૂ.1,02,503 કરોડનો વિક્રમ કર્યો હતો. આ અગાઉ 14 ઓગસ્ટ, 2020ના રોજ રૂ.96,821 કરોડનું મહત્તમ ટર્નઓવર થયું હતું. એ પૂર્વે ૧૦ ઓગસ્ટનારોજ રૂ.૭૧,૭૯૧ કરોડનું રેકોર્ડ ટર્નઓવર થયું હતું.
BSEએ સોમવારની એક્સપાયરી ધરાવતા S&P BSE સેન્સેક્સ 50 વીકલી ફ્યુચર્સ અને ઓપ્શન શરૂ કર્યા એ પછી એક્સચેન્જના ડેરિવેટિવ્ઝ સેગમેન્ટમાં ટર્નઓવર સતત વધી રહ્યું છે. આ કોન્ટ્રેક્ટમાં દેશની ટોચની 50 કંપનીઓની કામગીરીનો સમાવેશ હોવાથી સહભાગીઓને તેમના ઈક્વિટી રિસ્કને આવરી લેવા માટેના શ્રેષ્ઠ સાધન છે.
એક્સચેન્જના સિદ્ધિ વિશે BSEના ચીફ બિઝનેસ ઓફિસર સમીર પાટીલે કહ્યું કે, BSEના સેન્સેક્સ 50 ડેરિવેટિવ્ઝ કોન્ટ્રેક્ટ્સ બજારની અભૂતપૂર્વ સ્થિતિમાં અને અતિ વોલેટાઈલ હોય ત્યારે પણ વધુ લિક્વિડિટી અને ડેપ્થ ધરાવે છે.
