વોર ડ્રામા ફિલ્મ ‘પિપ્પા’માં ઈશાન ખટ્ટર-મૃણાલ ઠાકુર મુખ્ય ભૂમિકામાં

1971ના ભારત-પાકિસ્તાન યુદ્ધ સમયની એક વાર્તાને હિન્દી ફિલ્મ ‘પિપ્પા’માં દર્શાવવામાં આવી છે. આ ફિલ્મ આવતી 10 નવેમ્બરે OTT પ્લેટફોર્મ પર – પ્રાઈમ વીડિયો પર રજૂ કરવામાં આવશે. ફિલ્મના નિર્માતાઓએ 6 નવેમ્બર, સોમવારે મુંબઈમાં જે.ડબલ્યુ. મેરિયટ હોટેલ ખાતે યોજેલા એક પ્રમોશનલ કાર્યક્રમ વખતે ફિલ્મના મુખ્ય કલાકારો – ઈશાન ખટ્ટર અને મૃણાલ ઠાકુરે પોઝ આપ્યાં હતાં. RSVP મૂવીઝ અને રોય કપૂર ફિલ્મ્સ દ્વારા નિર્મિત અને રાજા કૃષ્ણ મેનન દ્વારા દિગ્દર્શિત આ ફિલ્મમાં ઈશાન અને મૃણાલ ઉપરાંત પ્રિયાંશૂ પૈન્યુલી અને સોની રાઝદાનની પણ મહત્ત્વની ભૂમિકા છે. (તસવીર અને વીડિયોઃ માનસ સોમપુરા)

‘પિપ્પા’ ભારતીય સેનાની 45-કેવેલરી રેજિમેન્ટના કેપ્ટન બલરામ સિંહ મેહતાનાં વાસ્તવિક જીવનની કથા પર આધારિત છે. તેઓ 1971માં ભારત-પાકિસ્તાન યુદ્ધ વખતે બાંગ્લાદેશની મુક્તિ માટે પૂર્વ ભારતના મોરચે પાકિસ્તાની સૈનિકો સામે લડ્યા હતા. ‘પિપ્પા’ નામ રશિયાની જમીન અને પાણીની સપાટી, બંને પર ચાલતી યુદ્ધ ટેન્ક ‘PT-76’ પરથી આપવામાં આવ્યું છે. ‘પિપ્પા’ એટલે ઘીનો ખાલી ટિનનો ડબ્બો. ફિલ્મમાં ઈશાને કેપ્ટન બલરામ સિંહ મેહતાની ભૂમિકા ભજવી છે.