બોલીવૂડમાં અભિનેત્રી તરીકે દસકો પૂરોઃ દીપિકાને અભિનંદન…

દીપિકા પદુકોણ આજે હિન્દી ફિલ્મ ઉદ્યોગમાં મોખરાની અભિનેત્રીઓમાંની એક છે. આજથી બરાબર દસ વર્ષ પહેલાં દીપિકાએ બોલીવૂડમાં પ્રવેશ કર્યો હતો. એની પહેલી ફિલ્મ હતી ‘ઓમ શાંતિ ઓમ’. દર્શકોને દીપિકાના સ્વરૂપમાં એક દિગ્ગજ અભિનેત્રીની ભેટ આપનાર છે ફરાહ ખાન, જેમણે ૨૦૦૭માં ‘ઓમ શાંતિ ઓમ’ ફિલ્મમાં દીપિકાને બ્રેક આપ્યો હતો. એ ફિલ્મમાં દીપિકાનો હીરો શાહરૂખ હતો.

જાણે આંખના એક પલકારામાં એણે દાયકો પૂરો કરી લીધો હોય એવું લાગે છે. આ દસ વર્ષમાં એ જોતજોતામાં ટોચની અભિનેત્રીઓમાં પોતાનું સ્થાન જમાવવામાં સફળ થઈ છે.

દીપિકાને પગલે રણબીર કપૂર, સોનમ કપૂર જેવા યુવા કલાકારોએ પણ બોલીવૂડમાં એન્ટ્રી કરી હતી.

આજ સુધીમાં દીપિકા ૨૧ હિન્દી ફિલ્મોમાં કામ કરી ચૂકી છે.

અભિનયની કારકિર્દીમાં દીપિકાની પહેલી ફિલ્મ એક કન્નડ. ૨૦૦૬માં આવેલી એ ફિલ્મનું નામ હતું ‘ઐશ્વર્યા’. એ ફિલ્મ બનાવનાર હતા ઈન્દ્રજિત લંકેશ, જે તાજેતરમાં હત્યા કરાયેલા કર્ણાટકના મહિલા પત્રકાર ગૌરી લંકેશનાં ભાઈ છે.

૩૧ વર્ષીય દીપિકાને હવે રાજપૂત રાણી પદ્માવતી પર આધારિત ઐતિહાસિક વિષયવાળી આગામી હિન્દી ફિલ્મ ‘પદ્માવતી’ પર ઘણો મદાર છે, જે આવતી ૧ ડિસેમ્બરે રિલીઝ થવાની છે. એમાં તેના સહ-કલાકારો છે – રણવીર સિંહ અને શાહિદ કપૂર.