રાજસ્થાન: બિકાનેરમાં મહાજન ફિલ્ડ ફાયરિંગ રેન્જમાં તોપ પ્રેક્ટિસ દરમિયાન એક મોટો અકસ્માત થયો છે. પ્રાથમિક માહિતી અનુસાર બોમ્બ વિસ્ફોટની માહિતી સામે આવી છે. આ અકસ્માતમાં બે જવાનોના ઘટનાસ્થળે જ મોત થયા છે અને એક જવાન ગંભીર રીતે ઘાયલ થયો હોવાનું કહેવાય છે.
મળતી માહિતી મુજબ, આ દુર્ઘટના મહાજન ફીલ્ડ ફાયરિંગ રેન્જના નોર્થ કેમ્પમાં આવેલા ચાર્લી સેન્ટરમાં થઈ હતી. અકસ્માતમાં ગંભીર રીતે ઘવાયેલા સૈનિકને સુરતગઢની મિલિટરી હોસ્પિટલમાં દાખલ કરવામાં આવ્યો છે.
દુર્ઘટનાની માહિતી મળતા જ સેનાના વરિષ્ઠ અધિકારીઓ અને મહાજન પોલીસ સ્ટેશન ઘટના સ્થળે પહોંચી ગયા હતા. સમગ્ર વિસ્તારને સીલ કરી દેવામાં આવ્યો છે અને અકસ્માતની તપાસ શરૂ કરવામાં આવી છે. આ દુર્ઘટનાને લઈને સુરક્ષા પ્રોટોકોલ અને ઉપકરણોના પરીક્ષણ પર સવાલો ઉભા થઈ રહ્યા છે.
