અમદાવાદ: ગુજરાતમાં આકરા ઉનાળાની શરૂઆત થઈ ગઈ છે. લોકો અસહ્ય ગરમીનો ત્રાસ સહન કરી રહ્યા છે. કામ વગર ઘરમાંથી નીકળવાનું ટાળી રહ્યા છે. હવામાન વિભાગ અનુસાર, રાજ્યમાં આગામી ત્રણ દિવસ સુધી ગરમીનો પ્રકોપ વધુ વધવાનો છે. વેસ્ટર્ન ડિસ્ટર્બન્સ સક્રિય થવાને કારણે તાપમાનમાં ઉછાળો જોવા મળી રહ્યો છે.
સૌરાષ્ટ્રમાં ગરમીનો પારો સૌથી ઊંચો
તાપમાનની વાત કરીએ તો સૌરાષ્ટ્રના અમરેલી, રાજકોટ અને સુરેન્દ્રનગરમાં સૌથી વધુ ગરમી નોંધાઈ શકે છે, જ્યાં તાપમાન ૪૩ ડિગ્રી સુધી પહોંચવાની સંભાવના છે. લોકોએ બપોરના સમયે બિનજરૂરી બહાર ન નીકળવા સલાહ પણ તંત્ર દ્વારા આપવામાં આવી છે.
વિવિધ શહેરોમાં તાપમાનનો અંદાજ
રાજ્યના અન્ય મુખ્ય શહેરોમાં પણ ગરમીનો પારો ઊંચો રહેશે. અમદાવાદ, કંડલા અને કેશોદમાં ગરમીનો પારો 42 ડિગ્રીની આસપાસ રહેશે. ગાંધીનગર, ભુજ અને વડોદરામાં 41 ડિગ્રી તાપમાન નોંધાશે. ડીસા, સુરત અને વિદ્યાનગરમાં પણ પારો 40 ડિગ્રીને સ્પર્શી શકે છે. વધતી ગરમીને પગલે તંત્ર દ્વારા નાગરિકોને પુષ્કળ પાણી પીવા અને સુરક્ષિત રહેવા અપીલ કરવામાં આવી છે.
