અમદાવાદ– શેરબજાર સતત છઠ્ઠા દિવસે નરમાઈ સાથે બંધ રહ્યું હતું. ગ્લોબલ માર્કેટના નેગેટિવ ન્યૂઝ પાછળ આજે સવારે શેરોની જાતે-જાતમાં પેનિક સેલીંગ ચાલુ રહ્યું હતું. નોર્થ કોરિયા અને અમેરિકા વચ્ચે તંગદિલી વધી છે. જેથી વિશ્વના સ્ટોક માર્કેટમાં ભારે ગભરાટ છવાયેલો રહ્યો હતો. જો કે ટ્રેડિંગ સેશનના મધ્યભાગ પછી બ્લુચિપ શેરોમાં નીચા મથાળે નવી લેવાલીનો ટેકો આવ્યો હતો. જેથી માર્કેટ ઘટયા મથાળેથી બાઉન્સબેક થયું હતું. ટ્રેડિંગ સેશનને અંતે બીએસઈ સેન્સેક્સ 26.87(0.08 ટકા) ઘટી 31,599.76 બંધ રહ્યો હતો. તેમજ નિફટી ઈન્ડેક્સ 1.10(0.01 ટકા) ઘટી 9871.50 બંધ થયો હતો.
આગામી ગુરુવારે સપ્ટેમ્બર એફ એન્ડ ઓ કોન્ટ્રેક્ટનો છેલ્લો દિવસ છે, જેથી આજે લેવાલી-વેચવાલીના બે તરફી કામકાજ રહ્યા હતા. બપોર પછી બેંક, ઓટો, મેટલ, ફાર્મા, રિયલ્ટી, ઓઈલ, ગેસ, કેપિટલ ગુડઝ સેકટરના શેરોમાં નીચા મથાળે ટેકારૂપી લેવાલી આવી હતી. એક સપ્તાહમાં સેન્સેક્સમાં 797 પોઈન્ટનો કડાકો બોલી ગયો છે, પરિણામે આજે નીચા મથાળે મંદીવાળા ખેલાડીઓની કાપણી આવી હતી. જેથી પણ માર્કેટમાં ઘટયા મથાળેથી સુધારો આવ્યો હતો.
- બપોર બાદ યુરોપિયન સ્ટોક માર્કેટ પ્લસ પર ટ્રેડ કરતાં હતા.
- એફએમસીજી અને ટેકનોલોજી સેકટરના ઈન્ડેક્સ માઈનસમાં બંધ હતા.
- રોકડાના શેરોમાં નવી લેવાલી આવી હતી. બીએસઈ મીડકેપ ઈન્ડેક્સ 67.52 પ્લસ બંધ હતો.
- બીએસઈ સ્મોલકેપ ઈન્ડેક્સમાં 173.15નો ઉછાળો આવ્યો હતો.
