દુનિયાનો કયો દેશ નવું વર્ષ ક્યારે ઉજવે છે ? જાણો..

31મી ડિસેમ્બરની મધ્યરાત્રિએ, વિશ્વભરના વિવિધ દેશોમાં નવા વર્ષની ઉજવણીથાય છે. પરંતુ એવું નથી કે આખી દુનિયા એક જ દિવસે નવું વર્ષ ઉજવે છે. હવે સવાલ એ થાય કે એવા કયા દેશો છે. જ્યાં 1 જાન્યુઆરીથી નવું વર્ષ શરૂ નથી થતું? એ દેશોમાં નવું વર્ષ ક્યારે ઉજવવામાં આવે છે? અન્ય કોઈ દિવસે નવું વર્ષ ઉજવવાના કારણો શું છે?

તમને જાણીને નવાઈ લાગશે કે વિશ્વમાં જુદા-જુદા દેશોમાં નવુ વર્ષ જુદા-જુદા સમયે ઉજવવામાં આવે છે. એ પ્રમાણે વર્ષમાં લગભગ 58 દિવસ નવા વર્ષની ઉજવણી થાય છે.

તો ચાલો જાણીએ કે દુનિયાનો કયો દેશ નવું વર્ષ ક્યારે ઉજવે છે ?

ચીન

ચીનમાં ચંદ્ર કેલેન્ડર (ચંદ્ર આધારિત કેલેન્ડર) ગણવામાં આવે છે. જે દર ત્રણ વર્ષે સૂર્ય-આધારિત કેલેન્ડર સાથે સંરેખિત થાય છે. આ પ્રમાણે ચીનનું નવું વર્ષ 20 જાન્યુઆરીથી 20 ફેબ્રુઆરીની વચ્ચે આવે છે. ચીની વર્ષ અને રાશિયોંના નામ જુદા જુદા પ્રાણીઓના નામ પરથી રાખવામાં આવ્યા છે. ચીનમાં ડ્રેગન સારા નસીબનું ચિની પ્રતીક હોવાથી, નવા વર્ષની ઉજવણીના ભાગરૂપે ત્યાં ડ્રેગન નૃત્ય કરવામાં આવે છે. જુદા-જુદા શહેરોમાં ડ્રેગનની પરેડ પણ થાય છે જેમાં નર્તકો લાંબા અને રંગબેરંગી ડ્રેગન  લઈને નીકળે છે.

જાપાન

જાપાનમાં પણ નવું વર્ષ ચંદ્ર કેલેન્ડર મુજબ ઉજવવામાં આવતુ હતું.. અહીંના લોકો ચાઈનીઝ ચંદ્ર કેલેન્ડર અનુસાર નવા વર્ષનો પહેલો દિવસ નક્કી કરતા હતા. જો કે, 1873થી, અહીંના લોકો ગ્રેગોરિયન કેલેન્ડર અનુસાર નવા વર્ષની ઉજવણી કરે છે. એટલે કે 1 જાન્યુઆરીએ નવા વર્ષની ઉજવણી થાય છે. આ ખાસ દિવસે જાપાનના લોકો મંદિરમાં જાય છે. અને પરિવારને મુશ્કેલીમાંથી બચાવવા માટે, 108 વાર ઘંટડી વગાડે છે. આ જાપાનની અનોખી પરંપરા છે.

કંબોડિયા

અહીં નવા વર્ષની શરૂઆત પરંપરાગત રમતો અને ધાર્મિક વિધિ સાથે કરવામાં આવે છે. અહીં નવું વર્ષ 13 કે 14 એપ્રિલે ઉજવવામાં આવે છે. આ દિવસે કંબોડિયાના લોકો વિવિધ ધાર્મિક સ્થળોની મુલાકાત લે છે.

કોરિયા

કોરિયામાં નવું વર્ષ બે અલગ અલગ તારીખે ઉજવવામાં આવે છે. પ્રથમ, સૌર નવું વર્ષ (સિંજોંગ), 1 જાન્યુઆરીએ ગ્રેગોરિયન કેલેન્ડર મુજબ ઉજવાય છે, જે પશ્ચિમી દેશોની પરંપરાની જેમ મનાવવામાં આવે છે. આ દિવસે લોકો પરસ્પર શુભેચ્છા પાઠવે છે અને નવું વર્ષ ઉજવવા માટે વિવિધ કાર્યક્રમોમાં ભાગ લે છે. બીજું છે ચંદ્ર નવું વર્ષ (સિઓલાલ), જે ચંદ્ર કેલેન્ડરના પ્રથમ મહિનાના પહેલા દિવસે આવે છે. આ પરંપરાગત તહેવાર સામાન્ય રીતે જાન્યુઆરીના અંતમાં અથવા ફેબ્રુઆરીની શરૂઆતમાં હોય છે. ચંદ્ર નવું વર્ષ દક્ષિણ કોરિયામાં ખાસ મહત્વ ધરાવે છે, જ્યાં પરિવારના સભ્યો ભેગા થાય છે, પરંપરાગત વસ્ત્રો (હેનબોક) પહેરે છે અને સાંસ્કૃતિક પ્રવૃત્તિઓમાં ભાગ લે છે. જે પરંપરાગત મૂલ્યોને જીવંત રાખે છે.

થાઈલેન્ડ

અહીં લોકો એકબીજાને ઠંડા પાણીથી નવા વર્ષની શુભેચ્છા પાઠવે છે. અહીં નવું વર્ષ 13 અથવા 14 એપ્રિલે ઉજવવામાં આવે છે. સ્થાનિક ભાષામાં આ દિવસને ‘સોંગક્રાન’ કહેવામાં આવે છે.

વિયેતનામ

નવું વર્ષ ચાઈનીઝ કેલેન્ડર એટલે કે ચંદ્ર કેલેન્ડર મુજબ ઉજવવામાં આવે છે. અહીં નવું વર્ષ 20 જાન્યુઆરીથી 20 ફેબ્રુઆરીની વચ્ચે આવે છે. વિયેતનામમાં નવા વર્ષને એક મહત્વપૂર્ણ તહેવાર માનવામાં આવે છે કારણ કે આ દિવસ સ્થાનિક લોકોની સૌથી પ્રિય રજા છે.

શ્રીલંકા

નવા વર્ષના પ્રથમ દિવસને અલુથ અવરુદ્દા કહેવામાં આવે છે. જે એપ્રિલના મધ્યમાં આવે છે. નવા વર્ષ નિમિત્તે શ્રીલંકાના લોકો કુદરતી વસ્તુઓથી સ્નાન કરે છે. કહેવાય છે કે આની પાછળની પરંપરા દુષ્ટતાથી બચવા અને ભૂલોનું પ્રાયશ્ચિત કરવા માટેની છે.

બ્રિટન

ગ્રેગોરિયન કેલેન્ડર પ્રચલિત છે. પરંતુ પરંપરાગત રીતે પેમ્બ્રોકશાયર કાઉન્ટીમાં ગ્વાન વેલીના લોકો 13 જાન્યુઆરીએ નવું વર્ષ ઉજવે છે. જે જુલિયન કેલેન્ડરનો પ્રથમ દિવસ હોય છે.

યુરેશિયા

રશિયા અને જ્યોર્જિયામાં લાખો લોકો (જે યુરોપ અને એશિયા બંનેમાં રહે છે) જુલિયન કેલેન્ડર અનુસાર નવા વર્ષની ઉજવણી કરે છે. અહીંના લોકો 13 જાન્યુઆરીએ નવું વર્ષ ઉજવે છે.

ઇથોપિયા

ઇથોપિયા પૂર્વ આફ્રિકામાં આવેલું દુનિયાના સૌથી જૂના દેશોમાંનું એક માનવામાં આવે છે. જ્યાં નવા વર્ષને ‘એન્કુટાશ’ કહેવામાં આવે છે. અહીંના લોકો 11મી સપ્ટેમ્બરે નવું વર્ષ ઉજવે છે. જ્યારે લીપ વર્ષમાં 12 સપ્ટેમ્બરના રોજ નવું વર્ષ ઉજવવામાં આવે છે. ઇથોપિયા પ્રાચીન ગીઝ કેલેન્ડરને અનુસરે છે, જે ગ્રેગોરિયન કેલેન્ડર કરતાં લગભગ 7-8 વર્ષ પાછળ છે.

પેન્સિલવેનિયા

અમેરિકાના પેન્સિલવેનિયામાં ‘ઓડુન્ડે’ નામનો તહેવાર ઉજવવામાં આવે છે, જેને આફ્રિકન ન્યૂ યર તરીકે પણ ઓળખવામાં આવે છે. એ જૂનના બીજા સપ્તાહમાં આવે છે. જે અમેરિકામાં આફ્રિકન સમુદાય દ્વારા ઉજવવામાં આવતા સૌથી મોટા તહેવારોમાંનો એક છે.

નેપાળ

રંપરા અનુસાર અહીં દર વર્ષે 14 એપ્રિલે નવું વર્ષ ઉજવવામાં આવે છે. આ દિવસે નેપાળમાં રજા હોય છે. અહીંના લોકો આ દિવસે પરંપરાગત વસ્ત્રો પહેરી એકબીજાને શુભેચ્છા આપે છે.

હેતલ રાવ