મહારાષ્ટ્રમાં વિધાનસભા ચૂંટણી માટે મતદાન શરૂ થઈ ગયું છે, જે રાજ્યમાં સત્તાધારી અને વિરોધ પક્ષોના ભાવિનો નિર્ણય કરશે. સવારે 7 વાગ્યે મતદાન શરૂ થયું હતું. મુંબઈમાં શાહરૂખ ખાન, અક્ષય કુમાર, સલમાન ખાન, આમિર ખાન, રણવીર સિંહ, રણબીર કપૂર, આલિયા ભટ્ટ, દીપિકા પાદુકોણ અને અન્ય ઘણા લોકો જેવા બોલીવુડ સેલિબ્રિટીઓએ તેમના મત આપીને તેમની ફરજ બજાવવાની આશા વ્યક્ત કરી હતી.
આ સિવાય દિગ્ગજ અભિનેતા સલમી ખાન પરેશ રાવલ અને હેમા માલિનીએ પણ મતદાન કર્યુ હતું. આ સાથે જ તમામ સ્ટાર્સે મતાધિકારનો ઉપયોગ કરવાની અપીલ કરી હતી.
મહારાષ્ટ્ર અને ઝારખંડ વિધાનસભા ચૂંટણી માટે મતદાન ચાલુ છે. આ ચૂંટણીઓમાં શાસક ‘મહાયુતિ’ ગઠબંધન સત્તા જાળવી રાખવાનો પ્રયાસ કરી રહ્યું છે જ્યારે વિપક્ષી ગઠબંધન મહા વિકાસ અઘાડી (MVA) સત્તામાં પાછા ફરવાની આશા રાખી રહ્યું છે. તમામ 288 વિધાનસભા બેઠકો પર મતદાન સાંજે 6 વાગ્યા સુધી ચાલુ રહેશે. મતગણતરી 23 નવેમ્બરે થશે. ઝારખંડની 81 સભ્યોની વિધાનસભા ચૂંટણીના બીજા અને અંતિમ તબક્કામાં આજે 38 બેઠકો માટે મતદાન થઈ રહ્યું છે. શાસક ઝારખંડ મુક્તિ મોરચા (JMM)ના નેતૃત્વ હેઠળના વિપક્ષ ‘ભારત’ ગઠબંધન રાજ્યમાં ભારતીય જનતા પાર્ટી (BJP)ના નેતૃત્વ હેઠળના નેશનલ ડેમોક્રેટિક એલાયન્સ (NDA) સામે ચૂંટણી લડી રહ્યું છે. પ્રથમ તબક્કાનું મતદાન 13 નવેમ્બરે થયું હતું.
મહારાષ્ટ્રમાં 45 ટકા મતદાન
બપોરે 3 વાગ્યા સુધી મહારાષ્ટ્રમાં 45.53 ટકા મતદાન થયું હતું. અહીં સૌથી વધુ મતદાન ગઢચિરોલીમાં 62.99 ટકા અને સૌથી ઓછું 38.94 ટકા થાણેમાં થયું હતું. વોટ ફોર કેશ કેસમાં EDએ એક યુવકની ધરપકડ કરી છે. યુવક દુબઈ ભાગી જવાની યોજના બનાવી રહ્યો હતો.
મહારાષ્ટ્રમાં યોજાઈ રહેલી વિધાનસભાની ચૂંટણીમાં ફિલ્મ સ્ટાર્સ મતદાન કરવા આવી રહ્યા છે. ગીતકાર જાવેદ અખ્તર, અભિનેત્રી માધુરી દીક્ષિત, ડિઝાઇનર મનીષ મલ્હોત્રા, ગાયક રાહુલ વૈદ્ય અને તેની પત્ની દિશા પરમાર, ગાયક શંકર મહાદેવન, નિર્દેશક રોહિત શેટ્ટી, ટ્વિંકલ ખન્ના, અર્જુન કપૂર, એશા કોપ્પીકર, રણબીર કપૂરે મતદાન કર્યું હતું. ઉદ્ધવ ઠાકરેની આગેવાની હેઠળના શિવસેના સાંસદ સંજય રાઉત અને તેમના ભાઈ સુનીલ રાઉતે મતદાન કર્યું હતું. સુનીલ રાઉત શિવસેના યુબીટીના નેતા અને મુંબા દેવી સીટના ઉમેદવાર છે.
ભાજપના ઉમેદવાર સુનીલ સોરેને દુમકાથી પોતાનો મત આપ્યો
દુમકા વિધાનસભા મતવિસ્તારના ભાજપના ઉમેદવાર સુનીલ સોરેન અને જારમુન્ડી વિધાનસભાના ઉમેદવાર દેવેન્દ્ર કુંવરે પોતાના મતાધિકારનો ઉપયોગ કર્યો હતો. જેએમએમએ બસંત સોરેનને દુમકાથી ઉમેદવાર બનાવ્યા છે. જ્યારે કોંગ્રેસે બાદલ પત્રલેખને જારમુન્ડીથી ઉમેદવાર બનાવ્યા છે.
નવી દિલ્હીઃ બ્રાઝિલમાં આયોજિત G-20 શિખર સંમેલન દરમ્યાન PM મોદી અને બ્રિટનના PM કિર સ્ટાર્મરની વચ્ચે અનેક મહત્ત્વના મુદ્દાઓ પર ચર્ચા થઈ હતી, એમાં PM મોદીએ કિર સ્ટાર્મરને કહ્યું હતું કે માલ્યા અને નીરવ મોદીને હવે ભારતને સોંપવામાં આવવા જોઈએ. બંનેના પ્રત્યાર્પણના પહેલાં પણ પ્રયાસ થઈ ચૂક્યા છે, પણ સફળતા નથી મળી.
ભારતમાં આર્થિક કૌભાંડો કરીને ભાગી છૂટેલા ભાગેડુ ઉદ્યોગપતિઓ વિજય માલ્યા અને નીરવ મોદીને પાછા લાવવા માટે ભારતે બ્રિટિશ PM પર દબાણ કર્યું છે. G-૨૦ શિખર મંત્રણા વચ્ચે PM નરેન્દ્ર મોદીએ બ્રિટનના PM કિર સ્ટાર્મર સાથે દ્વિપક્ષી વાટાઘાટો કરી હતી.
Had an extremely productive meeting with Prime Minister Keir Starmer in Rio de Janeiro. For India, the Comprehensive Strategic Partnership with the UK is of immense priority. In the coming years, we are eager to work closely in areas such as technology, green energy, security,… pic.twitter.com/eJk6hBnDJl
— Narendra Modi (@narendramodi) November 18, 2024
PM નરેન્દ્ર મોદીએ સ્ટાર્મર સાથેની બેઠકને ખૂબ જ મહત્ત્વની ગણાવી હતી અને સોશિયલ મીડિયા પર લખ્યું હતું કે ભારત માટે બ્રિટન સાથે વ્યાપક વ્યૂહાત્મક ભાગીદારી અત્યંત મહત્વપૂર્ણ છે. અમે ટેક્નોલોજી, ગ્રીન એનર્જી, સુરક્ષા, ઈનોવેશન અને ટેક્નોલોજીના ક્ષેત્રોમાં સહયોગ કરવા માટે આતુર છીએ. જોકે આ બેઠકમાં ભારતે આર્થિક ગુનાઓ સાથે સંકળાયેલા મુદ્દાઓ ઉકેલવા પર પણ ભાર મૂક્યો. તેમણે ગુનેગારનું નામ નહોતું લીધું, પરંતુ તેઓ વિજય માલ્યા અને નીરવ મોદીના પ્રત્યાર્પણની માગ કરી રહ્યા હતા તે સ્પષ્ટ છે. આ બેઠકમાં PM મોદીએ બેલફાસ્ટ અને માન્ચેસ્ટરમાં બે નવા મહાવાણિજ્ય દૂતાવાસોની સ્થાપના કરવાની જાહેરાત કરી હતી.
વિજય માલ્યા કિંગફિશર એરલાઈન્સ સાથે સંકળાયેલા રૂ. ૯,૦૦૦ કરોડથી વધુનું દેવું નહીં ચૂકવવાના કેસમાં વોન્ટેડ છે. તે વર્ષ ૨૦૧૬થી ભારતથી ભાગીને બ્રિટન પહોંચ્યા હતા. બીજી બાજુ, નીરવ મોદી પર પંજાબ નેશનલ બેન્ક કૌભાંડમાં રૂ. ૧૩,૦૦૦ કરોડની છેતરપિંડીનો આરોપ છે. નીરવ મોદી પણ પાંચ વર્ષથી બ્રિટનમાં છે.
અમદાવાદ: રાજ્યમાં વધતી ટ્રાફિકની સમસ્યાને હાઈકોર્ટે અવાર નવાર તંત્રની ઝાટકણી કરી છે. જે બાદ તંત્ર હરકતમાં આવ્યું હતુ, રાજ્યમાં તમામ સરકારી કર્મચારીઓને ટુ વ્હીલર પર હેલ્મેટ ફરજિયાત પહેરવાનો આદેશ આપ્યો હતો. સચિવાલયના તમામ વિભાગ સહિત સરકારી, અર્ધસરકારી કચેરી, બોર્ડ-નિગમ, સ્થાનિક સ્વરાજ્યની કચેરીઓ વગેરેમાં ટુ વ્હીલર પર આવતા અધિકારીઓ/કર્મચારીઓ અને પાછળ બેસનારી વ્યક્તિ માટે હેલ્મેટ ફરજિયાત છે. ત્યારે હવે રાજ્યની તમામ યુનિવર્સિટીના કર્મચારીઓ અને વિદ્યાર્થીઓ પણ ફરજિયાત હેલ્મેટ પહેરવાની રહેશે. આ અંગે રાજ્યના પોલીસ વડા વિકાસ સહાયે રાજ્યની તમામ ખાનગી અને સરકારી યુનિવર્સિટીનાં વાઇસ ચાન્સેલરને પત્ર લખીને સૂચના આપી છે.
રાજ્યના પોલીસ વડા વિકાસ સહાયે પત્રમાં લખ્યું કે, ‘રાજ્યમાં ઉચ્ચ શૈક્ષણિક સંસ્થાઓમાં અંદાજેત 16.4 લાખ વિદ્યાર્થી અભ્યાસ કરે છે. તેઓ અવર-જવર માટે મોટા ભાગે ટુ-વ્હીલરનો ઉપયોગ કરે છે. રાજ્યમાં વર્ષ 2023 દરમિયાન માર્ગ અકસ્માતમાં કુલ 7,854 લોકો મૃત્યુ નિપજ્યા હતા, જેમાં 2,767 (35%) લોકોના મૃત્યુ હેલ્મેટ ન પહેરવાના કારણે થયા હતા. આ પૈકી 2,082 (26.50%) લોકોની ઉંમર 26 વર્ષથી ઓછી હતી, જે ખૂબ જ આઘાતજનક છે. આ લોકો મોટા ભાગે યુનિવર્સિટીઓમાં અભ્યાસ કરતા વિદ્યાર્થીઓ હતા. આ પત્રમાં કહેવાયું છે કે, હેલ્મેટ પહેરવું એક સરળ અને અત્યંત અસરકારક પગલું છે. હેલ્મેટનો ઉપયોગ કરવાથી માથાના ભાગે ગંભીર ઈજાઓનું જોખમ ઘટાડી શકાય છે. મોટર વાહન અધિનિયમ 1988ની કલમ 129 મુજબ ટુ-વ્હીલર ચાલક તેમજ પાછળ બેસનાર વ્યકિતએ હેલ્મેટ ફરજિયાત છે. રાજ્યની તમામ યુનિવર્સિટીઓ (ખાનગી/સરકારી) પણ પોતાના તમામ અધિકારી/કર્મચારીઓ તથા વિદ્યાર્થીઓને હેલ્મેટ પહેરવા પ્રોત્સાહિત કરે તે માટે આપના સહકારની વિનંતી છે.
અમદાવાદઃ ગુજરાત યુનિવર્સિટી પ્રાંગણમાં ત્રિદિવસીય બ્રિક્સ શૈક્ષણિક કાર્યક્રમ (BEE) યોજાયો હતો, રશિયા જેમાં ભારત અને રશિયા વચ્ચે સમજૂતી કરાર કરવામાં આવ્યા હતા. આંતરરાષ્ટ્રીય યુવા સહયોગ માટે બ્રિક્સ પ્રોજેક્ટ ઓફિસ, બ્રિકસ યુથ એલાયન્સ અને ક્રિયેટિવ ઇન્ડસ્ટ્રીઝ ફાઉન્ડેશનની વચ્ચે સમજૂતી કરાર પર ભારત અને રશિયા વચ્ચે સાંસ્કૃતિક અને શૈક્ષણિક સંબંધોના આદાનપ્રદાન માટે કરવામાં આવ્યા હતા.
આ ત્રિદિવસીય કાર્યક્રમમાં તાલીમ અને સહયોગાત્મક સેશન યોજવામાં આવ્યાં હતાં, જેનો ઉદ્દેશ બ્રિક્સનાં મૂલ્યો અને સિદ્ધાંતોને પ્રોત્સાહન આપવા માટે પ્રતિબદ્ધ યુવા નેતાઓનો એક વર્ગ તૈયાર કરવાનો હતો. BEE આંતરરાષ્ટ્રીય યુથ સહયોગ રશિયા-બ્રિકસ યુવા ગઠબંધન, ભારત, ગુજરાત યુનિવર્સિટી અને GUSECની પ્રોજેક્ટ ઓફિસની સાથે એક સહયોગ કરવાનો હતો.
ભારત અને રશિયા વચ્ચે થયેલા સમજૂતી કરારમાં બ્રિક્સ શૈક્ષણિક અભિયાનનાં વડાં ડાયના કોવેલાએ હસ્તાક્ષર કરતાં કહ્યું હતું કે અમે અહીં BEE નામની બ્રિક્સ શૈક્ષણિક સંસ્થાના નિર્માણની ઉજવણી કરવા માટે આવ્યા છીએ. અમે પહેલેથી ભારતની સાથે કરાર કરતા આવ્યા છીએ અને આ સમજૂતી કરાર હેઠળ રશિયા અને ભારતની વચ્ચે સાંસ્કૃતિક અને શૈક્ષણિક સંબંધોને પ્રોત્સાહન આપવાનો એક પ્રયાસ છે.
BEEના માધ્યમથી અમે બ્રિક્સના સભ્યો દેશો વિશે બંને દેશોના યુવાઓમાં સમજ વધે અને યુવાઓની પહેલને ટેકો આપવા અને યુવાઓને એક મંચ પર લાવવાના પ્રયાસ કરવામાં આવી રહ્યા છે, એમ બ્રિક્સ યુથ એલાયન્સના વડા મધિશ પારેખે જણાવ્યું હતું. આ કાર્યક્રમના ઉદઘાટન સમારોહમાં ગુજરાત યુનિવર્સિટીના કુલપતિ ડો. નીરજા ગુપ્તા, GUSECના CEO શ્રીનિવાસ રેડ્ડી, બ્રિક્સ યુથ એલાયન્સના સંસ્થાપક ડિરેક્ટર મધિશ પારેખ અને ઇન્ટરનેશનલ બ્રિક્સના નિષ્ણાતો ઉપસ્થિત રહ્યા હતા.
બ્રિકસમાં બ્રાઝિલ, રશિયા, ઇન્ડિયા, ચીન અને સાઉથ આફ્રિકા દેશો સામેલ છે, જેનું ગયા વર્ષે વિસ્તરણ કરવામાં આવ્યું હતું અને એમાં ઇરાન, UAE, ઇથિયોપિયા અને ઇજિપ્તને સામેલ કરવામાં આવ્યા હતા.
આજે 4 રાજ્યોમાં 15 વિધાનસભા અને 1 લોકસભા બેઠકો માટે પેટાચૂંટણી છે. જેમાં યુપીની 9 વિધાનસભા સીટો પણ સામેલ છે. રાજ્યમાં જે વિધાનસભા બેઠકો પર ચૂંટણી ચાલી રહી છે તેમાં કટેહારી, કરહાલ, મીરાપુર, ગાઝિયાબાદ, મઝવાન, સિસામાઉ, ખેર, ફુલપુર અને કુંડાર્કીનો સમાવેશ થાય છે. તે જ સમયે, ઉત્તરાખંડમાં કેદારનાથ વિધાનસભા બેઠકની પેટાચૂંટણી માટે પણ લોકો તેમના મતાધિકારનો ઉપયોગ કરી રહ્યા છે. આ પેટાચૂંટણીમાં અનેક દિગ્ગજોની વિશ્વસનીયતા દાવ પર છે. મતગણતરી 23 નવેમ્બરે થશે.
યુપીમાં ત્રણ જગ્યાએ કાર્યવાહી
કાનપુરના સિસમાઉમાં બે પોલીસકર્મીઓને સસ્પેન્ડ કરવામાં આવ્યા છે. મતદાર આઈડી કાર્ડની ચકાસણી માટે બે એસઆઈને સસ્પેન્ડ કરવામાં આવ્યા છે. ચૂંટણી પંચે મુઝફ્ફરનગરમાં પણ કાર્યવાહી કરી છે. ECI ગાઈડલાઈનનું ઉલ્લંઘન કરવા બદલ બે ઈન્સ્પેક્ટરોને સસ્પેન્ડ કરવામાં આવ્યા છે. ફરિયાદ મળતાં જ SSP મુરાદાબાદે કુંડાર્કીમાં એક સબ ઈન્સ્પેક્ટર અને બે કોન્સ્ટેબલને ફરજ પરથી હટાવી દીધા. ત્રણેય સામે ખાતાકીય કાર્યવાહી કરવા સૂચના આપવામાં આવી છે. મતદાન સ્થળ પર ફરિયાદ મળ્યા બાદ આ કાર્યવાહી કરવામાં આવી હતી.
બે સબ ઈન્સ્પેક્ટર સસ્પેન્ડ
મતદાન દરમિયાન મુઝફ્ફરનગરના બે સબ ઈન્સ્પેક્ટરને સસ્પેન્ડ કરવામાં આવ્યા છે. અધિકારીઓના નામ નીરજ કુમાર અને ઓમપાલ સિંહ છે.
1 વાગ્યા સુધી કેટલું મતદાન થયું?
આ છે યુપીની 9 બેઠકો પર બપોરે 1 વાગ્યા સુધીના મતદાનની ટકાવારી…
કુંડારકી બેઠક પર 41.01 ટકા
કરહાલ સીટ પર 32.39 ટકા
કટેહારી સીટ પર 36.54%
ગાઝિયાબાદ સીટ પર 20.92 ટકા
સિસમાઉ સીટ પર 28.50 ટકા
મીરાપુર સીટ પર 36.77 ટકા
મઝવાન પર 31.68 ટકા
વેલ સીટ 28.80%
ફુલપુર સીટ પર 26.67 ટકા
EC ની કાર્યવાહી
ચૂંટણી પંચે મતદારોને તપાસવા અને મતદારોને મતદાન કરતા અટકાવવા અંગે ચૂંટણી પંચની માર્ગદર્શિકાનું ઉલ્લંઘન કરનારા પોલીસકર્મીઓને સસ્પેન્ડ કર્યા છે.
મુખ્ય ચૂંટણી કમિશનરની કડક સૂચના
યુપી પેટાચૂંટણી દરમિયાન કેટલાક સમુદાયોને મતદાન કરવાથી રોકવામાં આવ્યા હોવાની સમાજવાદી પાર્ટી દ્વારા સોશિયલ મીડિયા પરની ફરિયાદોને ધ્યાનમાં લઈને મુખ્ય ચૂંટણી કમિશનર રાજીવ કુમારે સીઈઓ યુપી અને તમામ જિલ્લા ચૂંટણી અધિકારીઓ (ડીઈઓ)/રિટર્નિંગ ઓફિસરો (આરઓ)ને કડક સૂચના આપી છે. મતદાન પ્રક્રિયા ન્યાયી અને સરળ છે તેની ખાતરી કરવા. તેમણે કહ્યું કે તમામ ફરિયાદો પર તાત્કાલિક ધ્યાન આપો અને તાત્કાલિક પગલાં લો અને ફરિયાદીને સોશિયલ મીડિયા દ્વારા પણ ટેગ કરીને તેની જાણ કરો. કોઈપણ લાયક મતદારને મતદાન કરતા અટકાવવા જોઈએ નહીં. કોઈપણ પ્રકારનું પક્ષપાતી વલણ સાંખી લેવામાં આવશે નહીં અને ફરિયાદ મળ્યા બાદ જો કોઈ દોષિત જણાશે તો કડક કાર્યવાહી કરવામાં આવશે. તમામ 9 જિલ્લામાં તૈનાત પોલીસ અને સામાન્ય નિરીક્ષકોને પણ કડક નજર રાખવા અને મતદાન શાંતિપૂર્ણ અને ન્યાયી રીતે થાય તે સુનિશ્ચિત કરવા કડક સૂચના આપવામાં આવી છે.
સુરતઃ ગ્રીનમેન તરીકે ઓળખાતા સુરતના વિરલ દેસાઈ તેમજ સુરતની એસવીએનઆઈટીના સંશોધક દ્વારા સંયુક્ત રીતે યોજાયેલી પ્રેસ કોન્ફરન્સમાં સુરત જેવા મહાનગરોમાં અર્બન ફોરેસ્ટના મહત્વ વિશે ચર્ચા કરવામાં આવી હતી.
એસવીએનઆઇટીના સંશોધક યુગ્મી પટેલે કહ્યું કે, શહીદ સ્મૃતિવનમાં જે વૃક્ષોની પસંદગી કરવામાં આવી છે. તે ખૂબ જ મહત્વપૂર્ણ છે. અર્બન ફોરેસ્ટ બનાવતી વખતે સ્થાનિક પ્રજાતિના વૃક્ષોની પસંદગી કરવી જોઈએ. અમારા સંશોધનમાં જાણવા મળ્યું છે કે શહીદ સ્મૃતિવનમાં PM10ના સ્તરમાં 18.85% અને PM2.5ના સ્તરમાં 10.66%નો ઘટાડો થયો છે.
આનાથી શહેરની મોટી વસ્તીના સ્વાસ્થ્યને લાભ મળ્યો છે. આ સંશોધન માટે ઉધના વિસ્તારમાં આવેલા શહીદ સ્મૃતિવન (અર્બન ફોરેસ્ટ ) પર ત્રણ મહિના સુધી અભ્યાસ કરવામાં આવ્યો હતો. એક ગેજેટ આ વનમાં અને એક ગેજેટ ત્યાંથી થોડે દૂર રાખવામાં આવ્યું હતું. આ ફોરેસ્ટના કારણે ઉથના વિસ્તારની હવામાં રહેલા ઝેરી તત્વોમાં નોંધપાત્ર ઘટાડો થયો છે.
આ સંદર્ભમાં વિરલ દેસાઈએ કહ્યું કે, “દિલ્હી અને લાહોર જેવા શહેરોની હાલત જોતાં સ્પષ્ટ છે કે આપણે વધુને વધુ અર્બન ફોરેસ્ટ બનાવવા પર ધ્યાન આપવું જોઈએ. આનાથી શહેરોના પ્રદૂષણને ઘટાડવામાં મદદ મળશે અને શહેરોનું તાપમાન પણ ઘટાડવામાં મદદ મળશે.
ઉલ્લેખનીય છે કે ગ્રીનમેન વિરલ દેસાઈ દ્વારા આ અર્બન ફોરેસ્ટ વર્ષ 2019માં બનાવવામાં આવ્યું હતું. આ ફોરેસ્ટમાં 19000 ચોરસ ફૂટની જગ્યામાં 1500થી વધુ સ્થાનિક પ્રજાતિના વૃક્ષો વાવવામાં આવ્યા છે. વિરલ દેસાઈએ છેલ્લા પાંચ વર્ષમાં સાત અર્બન ફોરેસ્ટ બનાવ્યા છે, અને 6,50,000 વૃક્ષો વાવ્યા છે.
ગાંધીનગર: આજે ભૂપેન્દ્ર પેટલની અધ્યક્ષતામાં કેબિનેટ બેઠકનું આયોજન કરવામાં આવ્યું હતું. કેબિનેટ બેઠકમાં ખ્યાતિ હોસ્પિટલના કાંડને લઈ મુદ્દા પર ચર્ચા કરવામાં આવી હતી. PMJY હેઠળ આવતી હોસ્પિટલ બરોબર કામગીરી કરે છે કે નહી તેને લઈ તપાસ પણ કરવામાં આવશે. આ સાથે સાથે PMJY યોજના માટે હોસ્પિટલની કડક SOP બનાવવા સૂચના અપાઈ છે. SOPની કડક અમલવારી પરંતુ લોકો હેરાન ના થવા જોઈએ તેવી મુખ્યમંત્રીએ સૂચના આપી છે. કોઈપણ હોસ્પિટલમાં હવે ખોટી સારવાર ના થાય તેવી કાર્યવાહી અને SOP માટે સૂચના અપાઈ છે.
પ્રાપ્ત માહિતી પ્રમાણે ટુંકા સમયમાં આરોગ્ય વિભાગ PMJY યોજના અંગેની હોસ્પિટલ માટેની SOP જાહેર કરશે. જેમાં મુખ્યત્વે 4 પ્રકારની સારવાર અને ઓપરેશન માટે કડક SOP હશે. હૃદયરોગ, કેન્સર, કિડની અને ઘૂંટણ અંગેની સારવાર અને ઓપરેશન સંબંધિત SOP જાહેર થશે. હવે કોઈ પણ ડોકટર PMJY હેઠળ દર્દીઓ સાથે છેતરપિંડી કરશે તો તેની સામે પણ કડકમાં કડક કાર્યવાહી કરવામાં આવશે. અત્રે ઉલ્લેખનીય છે કે વસ્ત્રાપુરમાં આવેલી ખ્યાતિ હોસ્પિટલમાં થયેલા કાંડ બાદ રાજયસરકાર સફાળી જાગી છે. ગરીબોના ખભ્ભે બંદુક રાખી સરકારી તીજોરી સાફ કરવાનો મુખ્ય ઉદ્દેશ હતો ખ્યાતિ હોસ્પિટલનો. આ મામલે કેટલાક ચોંકાવનારા ખુલ્લાસા પણ થાય છે. સૌથી મહત્વની વાત તો એ છે કે,ગરીબો ક્યાં છે તે જાણવા ખ્યાતિ હોસ્પિટલના સત્તાધીશોએ રાખી હતી માર્કેટિંગ ટીમ અને ગામડાઓમાં માર્કેટિંગ ટીમ સર્વેની કામગીરી કરતી હોવાની પણ વાત સામે આવી છે. આ ટીમ ગરીબો ક્યાં છે, કોની પાસે આયુષ્માન કાર્ડ છે તેનો સર્વે કરતી હતી. ક્રાઈમ બ્રાંચની ટીમની સાથોસાથ ગુજરાત નર્સિંગ કાઉન્સીલની ટીમ પણ સ્થળ પર પહોંચી હતી. નિયમ મુજબ કોઈ પણ નર્સિંગ કોલેજ ચલાવવા માટે પોતાની હોસ્પિટલ શરૂ સ્થિતિમાં હોવી જરૂરી છે. હોસ્પિટલમાં હાલમાં એક પણ દર્દી ન હોવાથી નર્સિંગ કોલેજ શરૂ રહેશે કે બંધ એ પણ મોટો સવાલ છે. જો ખ્યાતિ નર્સિંગ કોલેજ બંધ થશે તો વિદ્યાર્થીઓનું ભવિષ્ય જોખમમાં મૂકાય તેવી શક્યતા છે. હાલ તો ખ્યાતિ હોસ્પિટલ બંધ હોવાનો રિપોર્ટ નર્સિંગની ટીમ બોર્ડને કરશે.
મુંબઈ: આજે મહારાષ્ટ્ર વિધાનસભા ચૂંટણી 2024 માટે સમગ્ર રાજ્યમાં મતદાન થઈ રહ્યું છે.મતદારો મતદાન મથક પર પહોંચી ગયા છે અને મહારાષ્ટ્રમાં 288 બેઠકો માટે લડતા 4,140 ઉમેદવારો માટે મતદાન કરવાનું શરૂ કર્યું છે. મુંબઈમાં બોલિવૂડ સ્ટાર્સે પણ બુધવારે સવારથી જ વોટ આપવાનું શરૂ કરી દીધું છે.
આજે સવારે અક્ષય કુમારથી લઈને રાજકુમાર રાવ સુધીના તમામ બોલિવૂડ સ્ટાર્સ વોટ આપવા મતદાન કરવા પહોંચ્યા હતાં. મહારાષ્ટ્ર વિધાનસભા ચૂંટણી 2024ના પરિણામો 23 નવેમ્બરે જાહેર થવાના છે. બૉલિવૂડ સ્ટાર્સ સિવાય મહારાષ્ટ્રના સીએમ એકનાથ શિંદેથી લઈ અજિત પવાર, ઉદ્ધવ ઠાકરે, દેવેન્દ્ર ફડણવીસ અને પ્રિયંકા ચતુર્વેદી જેવા નેતાઓએ પણ પોતાના મતાધિકારનો ઉપયોગ કર્યો હતો.
અક્ષય કુમાર, રાજકુમાર રાવ અને કબીર ખાને મતદાન કર્યું
બુધવારે સવારે જ બોલિવૂડ સ્ટાર્સ મતદાન કરવા મતદાન મથક પર પહોંચ્યા હતા. અક્ષય કુમાર પોતાની કારમાં મતદાન કેન્દ્રમાં પ્રવેશ્યા હતા અને મતદાન કર્યું હતું. અક્ષય કુમારે મત આપ્યા બાદ મીડિયા સાથે વાત કરી હતી. અક્ષય કુમારે કહ્યું, ‘સારી વાત એ છે કે પોલિંગ બૂથમાં વ્યવસ્થા ઘણી સારી છે. અંદર સ્વચ્છતા રાખવામાં આવી છે. હું એટલું જ કહીશ કે લોકોએ આવીને પોતાનો મત આપવો જોઈએ.
અક્ષય કુમારની સાથે બોલિવૂડ સ્ટાર રાજકુમાર રાવ પણ સવારે મતદાન કરવા પહોંચ્યા હતા. રાજકુમાર રાવે કહ્યું, ‘મત આપવો એ લોકોનો અધિકાર છે. હું લોકોને પણ આ અધિકારોનો લાભ લેવાની અપીલ કરું છું. રાજકુમાર રાવની સાથે બોલિવૂડના સુપરહિટ દિગ્દર્શક કબીર ખાને પણ પોતાનો મત આપ્યો છે. આ સિવાય હેમા માલિની, પરેશ રાવલ, ઈશા દેઓલ, ગોવિંદા, રિતેશ દેશમુખ, રાકેશ રોશન, સોહિલ ખાન અને સલીમ ખાન સહિતની દિગ્ગજ હસ્તીઓ મતદાન કરવા પહોંચી હતી.
સચિન તેંડુલકર પોતાના પરિવાર સાથે મતદાન કરવા પહોંચ્યા હતા
બોલિવૂડ સ્ટાર્સની સાથે ક્રિકેટ સુપરસ્ટાર સચિન તેંડુલકરે પણ મહારાષ્ટ્ર વિધાનસભા ચૂંટણી 2024માં ભાગ લીધો હતો. સચિન તેંડુલકર પત્ની અંજલિ અને પુત્રી સારા તેંડુલકર સાથે અહીં મતદાન કેન્દ્ર પર પહોંચ્યા હતા. સચિન તેંડુલકરે સૌથી પહેલા મીડિયાની સામે પરિવાર સાથે ફોટો પડાવ્યો હતો. તમને જણાવી દઈએ કે મહારાષ્ટ્ર વિધાનસભા ચૂંટણીમાં આજે મતદાન થઈ રહ્યું છે. આ ચૂંટણીના પરિણામો 23 નવેમ્બરે આવવાના છે. આજે ઉમેદવારોના ભાવિ બોક્સમાં સીલ કરવામાં આવશે
અમદાવાદમાં ઐતિહાસિક કાંકરિયા તળાવ પાસે એક અનોખું, નવાઇ પમાડે એવું સ્થાપત્ય જોવા મળે છે. હકીકતમાં એ ભારતમાં અંદાજે ચારસો વર્ષ કરતાં પણ વધારે સમય પહેલાં વેપાર માટે આવેલા હોલેન્ડ-નેધરલેન્ડના ડચ વેપારીઓની કબરો છે. ભારતના મોટાભાગના પ્રાંતમાં અંગ્રેજો અને મોગલોના સામ્રાજ્ય વખતના સ્થાપત્યો જોવા મળે છે, પણ ડચ વેપારીઓનું આ સ્થાપત્ય વિશેષ છે.
સત્તરમી-અઢારમી સદીમાં હૉલેન્ડના ડચ વેપારીઓ ગુજરાતમાં સુરત સુધી સુતરાઉ કાપડ, સુતર અને ગળીનો વેપાર કરવા આવતા. આ વેપારીઓ સુરત, ભરૂચ અને અમદાવાદમાં સ્થાયી થયેલા. અમદાવાદના કાંકરિયા વિસ્તારમાં વન્-ટ્રી હિલ ગાર્ડનમાં આવેલી ડચ લોકોની કબરો એની સાખ પૂરે છે. લગભગ સાડા ચારસો વર્ષ જૂની આ કબરો વિશે નવી પેઢીને કદાચ ખબર ય નહીં હોય.
૧૯૭૨માં આ સ્થળને યુનેસ્કો તરફથી હેરિટેજ સાઇટ જાહેર કરવામાં આવી છે. ભારતીય અને ડચ સ્થાપત્ય શૈલીના સુંદર મિશ્રણ સમી આ કબરોમાં ઘુમ્મટ સ્તંભો અને ત્રિકોણાકાર મિનારાઓનો ઉપયોગ થયો છે. અમુક કબરો પર ક્રોસના ચિહ્નો અને ડચ-લેટિન લખાણ નજરે પડે છે. અમદાવાદમાં ઇંગ્લિશ કંપની એસ્ટાબ્લિશ કરનાર ઍલ્ડવર્થની કબર પણ અહીંજ છે. એક આર્મેનિયન કબર પર સન ૧૧૭૭ (એટલે કે ઇ.સ. ૧૬૨૮-૨૯)નો ઉલ્લેખ છે.
કબ્રસ્તાન હોવા છતાંયે આ સ્થળ સુંદર અને શાંત છે. ૨૦૦૧માં આવેલાં ભૂકંપમાં આ કબરો પણ ક્ષતિગ્રસ્ત થઇ હતી. આ ઐતિહાસિક સાઇટની જાળવણી કરવા માટે ઇન્ડો-ડચ બિઝનેસ સર્કલ અને નેધરલેન્ડ ઍમ્બેસીએ ૨૦૧૧ માં કરાર કર્યા હતા.
(પ્રજ્ઞેશ વ્યાસ)
