Home Blog Page 1212

મહાકુંભમાં કોલ્ડપ્લેની ધૂમ, સિંગર ક્રિસ માર્ટિન પહોંચ્યા પ્રયાગરાજ

મુંબઈમાં ધમાલ મચાવ્યા પછી બ્રિટિશ બેન્ડ કોલ્ડપ્લેએ 26 જાન્યુઆરીએ અમદાવાદના નરેન્દ્ર મોદી સ્ટેડિયમમાં શાનદાર પ્રદર્શન સાથે તેમના ભારત પ્રવાસનું સમાપન કર્યું. પોતાના અવાજથી લાખો દિલ જીત્યા બાદ ગાયક હવે ઉત્તર પ્રદેશના પ્રયાગરાજ પહોંચી ગયા છે. આંતરરાષ્ટ્રીય ગાયક અને તેની ગર્લફ્રેન્ડ અને હોલીવુડ અભિનેત્રી ડાકોટા જોહ્ન્સન સાથે મહાકુંભ દરમિયાન પ્રતિષ્ઠિત સંગમ નદીમાં પવિત્ર ડૂબકી લગાવે તેવી અપેક્ષા છે. બંનેનો પ્રયાગરાજ પહોંચવાનો એક વીડિયો પણ સામે આવ્યો છે, જેમાં બંને મસ્તીભર્યા મૂડમાં જોવા મળી રહ્યા છે.

ક્રિસ માર્ટિન પ્રયાગરાજ પહોંચ્યા

જે દ્રશ્યો સામે આવ્યા છે તેમાં ક્રિસ માર્ટિન અને તેની ગર્લફ્રેન્ડ ડાકોટા જોહ્ન્સન એક કારમાં બેઠેલા જોવા મળે છે. ભારતીય પરંપરાઓનું સન્માન કરતા આ દંપતીએ ભગવા રંગના કપડાં પહેર્યા હતા. પવિત્ર શહેરમાં ભીડમાંથી પસાર થયા ત્યારે આ પ્રેમી યુગલ ખૂબ જ ઉત્સાહિત દેખાતું હતું. થોડા દિવસો પહેલા ક્રિસ માર્ટિન અને ડાકોટા જોહ્ન્સન મુંબઈના પ્રખ્યાત સિદ્ધિવિનાયક મંદિરમાં આશીર્વાદ લેતા જોવા મળ્યા હતા. મંદિરની મુલાકાત દરમિયાન બોલિવૂડ અભિનેત્રી સોનાલી બેન્દ્રે પણ તેમની સાથે હતી.તેમજ ક્રિસ માર્ટિન અને ડાકોટા જોહ્ન્સને મુંબઈના પ્રતિષ્ઠિત શ્રી બાબુલનાથ મંદિરે દર્શન કરવા પહોંચ્યા હતાં.

કોલ્ડપ્લેના મુખ્ય ગાયક ક્રિસ માર્ટિને રવિવારે અમદાવાદમાં આયોજિત એક કોન્સર્ટમાં ‘વંદે માતરમ’ અને ‘મા તુઝે સલામ’ જેવા ક્લાસિક ગીતો ગાઈને 76મા પ્રજાસત્તાક દિવસને વધુ ખાસ બનાવ્યો હતો. પ્રેક્ષકોએ તેમના ભાવનાત્મક પ્રદર્શનની પ્રશંસા કરી અને ઉત્સાહપૂર્વક તાળીઓ સાથે તેમનું સ્વાગત કર્યું હતું. અમદાવાદના નરેન્દ્ર મોદી સ્ટેડિયમમાં રાષ્ટ્રને સંબોધિત કરેલા તેમના છેલ્લા શોની શરૂઆત કરતા ગાયકે પ્રેક્ષકોને ઉત્સાહિત કરવા માટે વંદે માતરમ ગાયું અને કહ્યું, “ભારતને પ્રજાસત્તાક દિવસની શુભકામનાઓ!”

આર્ટ ઓફ લિવિંગ ઇન્ટરનેશનલ સેન્ટર ખાતે કિસાન સમૃદ્ધિ મહોત્સવ

બેંગલુરુ: મહારાષ્ટ્રના જાલના, વર્ધા, અકોલા, અમરાવતી, બુલઢાણા, બીડ અને લાતુર જેવા દુષ્કાળગ્રસ્ત પ્રદેશોમાંથી હજ્જારો ખેડૂતો આર્ટ ઓફ લિવિંગ ઇન્ટરનેશનલ સેન્ટર ખાતે પહોંચ્યા છે. તેઓ અહીં આયોજિત કિસાન સમૃદ્ધિ મહોત્સવના ત્રીજા સંસ્કરણમાં હાજરી આપવા માટે પહોંચ્યા છે.પાણીની અછત, માટીની વંધ્યત્વ અને નાણાકીય તણાવને કારણે ખેડૂતોની તકલીફો સૌથી વધુ હતી. તેવા સૌથી ખરાબ દુષ્કાળગ્રસ્ત વિસ્તારોમાં ખેડૂતોના જીવનમાં કેવી રીતે પરિવર્તન આવ્યું છે તેના પ્રોત્સાહક સંકેત તરીકે, આ વર્ષે 300 ખેડૂતોએ આ કાર્યક્રમમાં હાજરી આપવા માટે આવ્યા છે. આ ખેડૂતો શ્રી શ્રી રવિશંકરનો તેમના સુખાકારી માટેના દ્રષ્ટિકોણ અને વિવિધ આર્ટ ઓફ લિવિંગ પહેલ દ્વારા તેમના જીવનમાં સમૃદ્ધિ લાવવા બદલ હૃદયપૂર્વક આભાર વ્યક્ત કરવા માટે તેમની ફ્લાઇટ ટિકિટનું ભંડોળ વ્યક્તિગત રીતે આપ્યું છે. ખેડૂતો નવી આશા અને સુધારેલી આજીવિકાની પ્રેરણાદાયી વાર્તાઓ અહીં લોકો સમક્ષ મૂકી રહ્યા છે.

“પહેલાં, પાણી ભરવા માટે અમારે રાત્રે જાગવું પડતું હતું, પરંતુ હવે તે જરૂરી નથી,” મહારાષ્ટ્રના અમરાવતી જિલ્લાના લાભાર્થી ખેડૂત નિલેશ શેર કરે છે, “હું તમને ખાતરી આપી શકું છું કે ગામમાં પાણી અંગે હવે કોઈ વિવાદ નહીં થાય.” સન્ની અરાણે, અન્ય એક ખેડૂત કહે છે, “આ (જળયુક્ત શિવર) કાર્ય પહેલાં, યુવાનોનો ખેતી પ્રત્યેનો દ્રષ્ટિકોણ અલગ હતો. પાકની મોસમ દરમિયાન, ખેતરોમાં વરસાદી પાણી એકઠું થતું હતું, જેના કારણે ખેતી અશક્ય બની જતી હતી.”

આ મહોત્સવમાં મુખ્ય મહાનુભાવોની હાજરી જોવા મળી રહી છે, જેમાં વૈશ્વિક માનવતાવાદી અને આર્ટ ઓફ લિવિંગના નદી કાયાકલ્પ અને જળ સંરક્ષણમાં વ્યાપક કાર્ય પાછળની શક્તિ, શ્રી શ્રી રવિશંકર; સંજય રાઠોડ (માટી અને જળ સંરક્ષણ મંત્રી, મહારાષ્ટ્ર સરકાર) અને શેખર મુંદડા (પ્રમુખ, મહારાષ્ટ્ર ગૌસેવા આયોગ) હાજર રહ્યા. આ સિવાય અન્ય મહાનુભાવોમાં વિધાનસભા સભ્યો – રણધીર સાવરકર(અકોલા), શ્વેતા તાઈ મહલે(ચીકલી), કિરણ સામીક(વાશિમ), રાજેશ વિટેકર(પાથરી), શ્યામ ખોડે (વાશિમ) અને કરંજા લાડથી સાઈ તાઈ પ્રકાશ દહાલેનો સમાવેશ થાય છે.

મહોત્સવમાં કુદરતી ખેતી તકનીકો, જળ સંરક્ષણ પદ્ધતિઓ અને ઉત્પાદકતા તેમજ ખેતીની આવક વધારવા માટે કૃષિ નવીનતાઓ પર સત્રો અને કાર્યશાળાઓનો પણ સમાવેશ થશે.

આર્ટ ઓફ લિવિંગે ખેડૂતોને ખેતી માટે વધુ પાણી ઉપલબ્ધ કરાવવામાં મદદ કરવા પર ધ્યાન કેન્દ્રિત કર્યું છે. પરંતુ ધ્યાન, યોગ અને સુદર્શન ક્રિયા જેવી શક્તિશાળી શ્વાસ લેવાની પ્રથાઓ દ્વારા તેમના માનસિક સ્વાસ્થ્યને સુધારવામાં પણ તેમને ટેકો આપ્યો છે. જે તણાવ અને ચિંતાને દૂર કરે છે અને આંતરિક શાંતિ અને સુખાકારીની ભાવના લાવે છે.

આ શિબિર અંગે મહારાષ્ટ્રના મુખ્યમંત્રી દેવેન્દ્ર ફડણવીસે શેર કર્યું હતું, “ગુરુદેવે આર્ટ ઓફ લિવિંગમાં જે ટીમ બનાવી છે તે ખૂબ જ સમર્પિત અને ઉત્સાહી છે અને નિઃસ્વાર્થપણે કામ કરે છે.” 

જળયુક્ત શિબિર 2.0ની સફળતા વિશે

મહારાષ્ટ્રમાં લાંબા સમયથી ચાલી આવતી પાણીની કટોકટીનો ઉકેલ લાવવાનું વચન આપતા, જળયુક્ત શિબિર 2.0ની શરૂઆત 26 નવેમ્બર 2023ના રોજ મહારાષ્ટ્ર સરકાર અને આર્ટ ઓફ લિવિંગ વચ્ચે થયેલા MOU સાથે થઈ. જેમાં 24 જિલ્લાઓના 86 તાલુકાઓમાં મહારાષ્ટ્રને દુષ્કાળમુક્ત રાજ્ય બનાવવા માટે કામ ચાલી રહ્યું છે. જેમાં નદીઓને ઊંડી કરવા, બંધ બાંધવા અને ખેત તળાવો બનાવવા જેવા વ્યાપક પગલાં અમલમાં મૂકવામાં આવ્યા છે. જેની સફળતાના ભાગરૂપે કહી શકાય હાલમાં મહારાષ્ટ્રના 10 જિલ્લાઓમાં 2 લાખથી વધુ લોકોને લાભ આપ્યો છે.

માત્ર 4-5 મહિનામાં, 150 કિલોમીટરના 50 નાળા (નાળાઓ) વૈજ્ઞાનિક રીતે કાદવ કાઢી નાખવા, ઊંડા કરવા અને પહોળા કરવામાં આવ્યા હતા જેનાથી 2.58 અબજ લિટર પાણીનો સંગ્રહ થયો હતો. આ મોટા પ્રયાસથી દાયકાઓથી ઉપેક્ષાનો ભોગ બનેલા પ્રદેશોમાં પાણીનો પ્રવાહ પુનઃસ્થાપિત થયો છે, કેટલાક નાળા 70 વર્ષથી વધુ સમયથી સુકા હતા.

પાણીની ઉપલબ્ધતાને કારણે, ખેડૂતો બીજો પાક પણ ઉગાડી શકે છે, જેનાથી તેમની કૃષિ આવકમાં નોંધપાત્ર વધારો થાય છે અને પાણીના સંસાધનોમાં સુધારો થાય છે.

દિલ્હીના ચૂંટણી જંગમાં રાહુલ ગાંધીની એન્ટ્રી

કોંગ્રેસના ભૂતપૂર્વ પ્રમુખ અને વિપક્ષી નેતા રાહુલ ગાંધીએ બીમારીમાંથી સ્વસ્થ થયા પછી દિલ્હીમાં કોંગ્રેસનો પ્રચાર ફરી શરૂ કર્યો હતો, પરંતુ કેજરીવાલ અંગેની મૂંઝવણ અને ઈન્ડિયા ગઠબંધનમાં તિરાડથી આ પ્રચારને ચોક્કસપણે રાજકીય ફટકો પડ્યો છે. રાહુલ ગાંધીએ સંદીપ દીક્ષિત સાથે નવી દિલ્હીના વાલ્મીકિ મંદિરમાં પ્રાર્થના કરી હતી પરંતુ નવી દિલ્હીમાં કેજરીવાલ વિરુદ્ધ કોઈ રાજકીય નિવેદન આપ્યું ન હતું. નવી દિલ્હી એ બેઠક છે જ્યાંથી કેજરીવાલ ઉમેદવાર છે. બાદમાં, દિલ્હી કોંગ્રેસના ભૂતપૂર્વ પ્રમુખ અનિલ ચૌધરીના સમર્થનમાં એક રેલીને સંબોધિત કરતી વખતે, રાહુલે શીશમહલ અને દારૂ કૌભાંડ પર પહેલી વાર સીધા કેજરીવાલ પર નિશાન સાધ્યું.

જોકે, વાલ્મીકિ મંદિરમાં પૂજા અને આગામી ત્રણ દિવસમાં રાહુલના પાંચમાંથી ત્રણ કાર્યક્રમો ઓખલા, મતિયા મહેલ, ચાંદની ચોક જેવા મુસ્લિમ બહુમતી ધરાવતા વિસ્તારોમાં છે. આ રણનીતિ દર્શાવે છે કે રાહુલની પહેલી રણનીતિ દલિતો અને મુસ્લિમોના પોતાના મૂળ મત પાછા મેળવવાની છે.

કોંગ્રેસ પાસે હવે કોઈ વિકલ્પ કેમ બચ્યો નથી?

કોંગ્રેસની સમસ્યા એ છે કે તેના આક્રમક પ્રચાર પછી પણ, જો કેજરીવાલ જીતે છે તો તે પાછળ રહી જશે. બીજી બાજુ, જો ભાજપ જીતે છે, તો તે ઈન્ડિયા ગઠબંધન અને ધર્મનિરપેક્ષ સિદ્ધાંતો પર આરોપ હશે. આ દરમિયાન, અખિલેશ યાદવ અને કેજરીવાલ એક જ રિઠાલામાં સાથે રોડ શો કરવાના છે. જ્યાં રાહુલ મકરસંક્રાંતિ પર ગયો હતો. ટીએમસીએ કેજરીવાલના સમર્થનમાં શત્રુઘ્ન સિંહાને મેદાનમાં ઉતારવાની પણ જાહેરાત કરી છે. આવી સ્થિતિમાં, કોંગ્રેસ પાસે તેના સાથી પક્ષોને સલાહ આપવા સિવાય કોઈ વિકલ્પ નથી. કોંગ્રેસના નેતા અજય માકને કહ્યું કે સાથી પક્ષોએ સમજવું પડશે કે 100 સાંસદો ધરાવતી રાષ્ટ્રીય પાર્ટી કોંગ્રેસને વિપક્ષની ધરી બનાવ્યા વિના ભાજપ સામે લડી શકાય નહીં.

બંધારણ અને બાબા સાહેબ આંબેડકરના મુદ્દા પર એક થવાનો પ્રયાસ

દિલ્હીમાં 5 ફેબ્રુઆરીએ મતદાન છે, તે પહેલાં, 31 જાન્યુઆરીથી શરૂ થઈ રહેલા સંસદ સત્રમાં છૂટાછવાયા વિપક્ષોને એક કરવા માટે, કોંગ્રેસ હવે બંધારણ અને બાબાસાહેબ આંબેડકરના મુદ્દાને કેન્દ્રમાં લાવવાની તૈયારી કરી રહી છે. તેથી, TV9 સાથેની વાતચીતમાં, પાર્ટી પ્રમુખ મલ્લિકાર્જુન ખડગેએ જણાવ્યું હતું કે અમિત શાહ, જેમણે ગયા સત્રમાં કથિત રીતે હંગામો મચાવ્યો હતો, તેઓ આ સત્રમાં પણ બાબા સાહેબના અપમાનનો મુદ્દો ઉઠાવવા અને બંધારણને બચાવવા જઈ રહ્યા છે અને તેઓ માફી માંગવી પડશે. આ અંગે કોંગ્રેસ અધ્યક્ષ મલ્લિકાર્જુન ખડગેએ કહ્યું કે જ્યાં સુધી અમિત શાહ માફી નહીં માંગે ત્યાં સુધી આ મામલો ચાલુ રહેશે.

ICC એ જસપ્રીત બુમરાહને સર ગારફિલ્ડ સોબર્સ એવોર્ડથી સન્માનિત કર્યો

જસપ્રીત બુમરાહે વર્ષ 2024નો ક્રિકેટર ઓફ ધ યરનો એવોર્ડ જીત્યો છે. તેણે એવોર્ડની રેસમાં ઓસ્ટ્રેલિયાના ટ્રેવિસ હેડ, ઇંગ્લેન્ડના જો રૂટ અને હેરી બ્રુકને પાછળ છોડી દીધા હતા. પરંતુ સર્વશ્રેષ્ઠ પર્ફોર્મ સાથે બુમરાહે બાજી મારતાં આઈસીસીએ તેને સર ગારફિલ્ડ સોબર્સ એવોર્ડથી સન્માનિત કર્યો છે. ICCએ મંગળવારે સાંજે એવોર્ડની જાહેરાત કરી હતી.

5 વર્ષ પછી કોઈ ભારતીયને ‘સર ગારફિલ્ડ સોબર્સ એવોર્ડ’ મળ્યો છે. વિરાટ કોહલીએ છેલ્લે 2018માં જીત મેળવ્યો હતો. ન્યૂઝીલેન્ડની ઓલરાઉન્ડર એમેલિયા કેરે મહિલા ક્રિકેટર ઓફ ધ યરનો એવોર્ડ જીત્યો હતો. તેણે ગયા વર્ષે ટીમની મહિલા T20 વર્લ્ડ કપ જીતમાં મહત્વની ભૂમિકા ભજવી હતી. 2023માં પેટ કમિન્સને આ એવોર્ડથી સન્માનિત કરવામાં આવ્યો હતો. આઈસીસી દ્વારા એન્યુઅલ એવોર્ડની શરૂઆત બાદ સૌપ્રથમ વખત સર ગારફિલ્ડ સોબર્સ ટ્રોફી ભારતીય દિગ્ગજ ભૂતપૂર્વ ખેલાડી રાહુલ દ્રવિડને 2004માં આપવામાં આવી હતી. બાદમાં 2010માં સચિન તેંદુલકરને અને 2017 તથા 2018માં વિરાટ કોહલીને આ ટ્રોફીથી સન્માનિત કરાયો હતો. જસપ્રીત બુમરાહને 2024નો સર્વશ્રેષ્ઠ ટેસ્ટ ક્રિકેટર ઓફ ધ યર તરીકે પસંદ કરાયો છે. તેણે ઈંગ્લેન્ડના જો રુટ, હેરી બ્રૂક અને શ્રીલંકાના કામિંડુ મેન્ડિસને પછાડી આ ખિતાબ જીત્યો છે. બુમરાહ પોતાની આક્રમક બોલિંગ માટે લોકપ્રિય રહ્યો છે. તેણે 2024માં 13 ટેસ્ટ મેચમાં 14.92ની એવરેજ અને 30.16ના સ્ટ્રાઈક રેટ સાથે 71 વિકેટ ઝડપી હતી.

બજેટ-2024: ઘરેલુ LPG ગેસ સિલિન્ડરમાં ઘટાડો થવાની શક્યતા

નવી દિલ્હીઃ નાણાપ્રધાન નિર્મલા સીતારામન સંસદમાં આઠમું બજેટ પહેલી ફેબ્રુઆરીએ રજૂ કરશે. આ વખતના બજેટમાં નાણાપ્રધાન મધ્યમ વર્ગને રાહત આપે એવી વકી છે, જેમાં ઘરેલુ LPG ગેસ સિલિન્ડરની કિંમતો ઘટવાની અપેક્ષા છે. ઓઇલ મંત્રાલયે સરકારથી LPG સબસિડી માટે રૂ. 40,000 કરોડની ફાળવણીની માગ કરી છે.

જો સરકાર આ માગ સ્વીકારશે તો IOC, BPCL અને HPCL જેવી ઓઇલ કંપનીઓનું થતા નુકસાનની ભરપાઈ કરી શકાશે. એનાથી ઘરેલુ ગ્રાહકોને LPG સિલિન્ડરની કિંમતોમાં રાહત મળવાની સંભાવના છે.

હાલના સમયમાં ઘરેલુ LPG સિલિન્ડરની કિંમતો આશરે રૂ. 800થી વધુ છે. જો બજેટમાં સબસિડી વધરવામાં આવશે તો આમ જનતાને મોંઘવારીથી રાહત મળવાની શક્યતા છે. આમ જનતાને અપેક્ષા છે કે બજેટ 2025માં LPG સિલિન્ડરોની કિંમતોમાં ઘટાડવા માટે નક્કર પગલાં લેવામાં આવશે.

દેશનાં વિવિધ શહેરમાં ઘરેલુ LPG ગેસ સિલિન્ડરોની કિંમત આશરે રૂ. 1000થી વધુ છે. આ ઉપરાંત સરકાર EPS એટલે કે એમ્પ્લોયી પેન્શન સ્કીમમાં લઘુતમ પેન્શન રૂ. 1000થી વધારીને રૂ. 5000 સુધી કરવામાં આવશે. આ સિવાય UPS એટલે કે યુનિફાઇડ પેન્શન સ્કીમને રાજ્યોને અપનાવવા માટે ભાર આપવામાં આવે એવી શક્યતા છે.

આ સાથે સેન્ટ્રલાઈઝ્ડ પેન્શન પેમેન્ટ સિસ્ટમના અમલ પછી હવે પેન્શન પેમેન્ટ ઓર્ડર (PPO) ટ્રાન્સફર કર્યા વિના દેશભરની કોઈ પણ શાખામાં પેન્શન ઉપાડવાનું શક્ય બનશે. આ સિસ્ટમ સૌથી વધુ એવા પેન્શનધારકોને મદદ કરશે કે જેઓ નિવૃત્તિ પછી તેમના વતન જાય છે. EPFOએ જણાવ્યું હતું કે તે પેન્શનધારકોની સુવિધાઓ સુધારવા માટે સતત કામ કરી રહ્યું છે. દેશમાં CPPSનું અમલીકરણ આ દિશામાં લેવાયેલું એક મોટું સુધારાત્મક પગલું છે.

આઈ. પી. ગૌતમ બન્યા સાબરમતી રિવરફ્રન્ટ કોર્પોરેશનના નવા ચેરમેન

અમદાવાદમાં સાબરમતી રિવરફ્રન્ટ કોર્પોરેશનના ચેરમેન આઈ. પી. ગૌતમને બનાવાયા. અગાઉ અમદાવાદ મ્યુનિસિપલ કમિશનર રહી ચૂક્યાં છે. આઈ. પી. ગૌતમ 1986ની બેન્ચના ઓફિસર છે. હવે આઈ. પી. ગૌતમ સાબરમતી રિવરફ્રન્ટ કોર્પોરેશનના ચેરમેન તરીકે 2 વર્ષ સુધી સેવારત રહેશે.

મળતી માહિતી મુજબ, અમદાવાદમાં સાબરમતી રિવરફ્રન્ટ કોર્પોરેશનના ચેરમેન તરીકે આઈ. પી. ગૌતમની નિમણુક કરવામાં આવી છે. જેમાં તેમણે હવે 2 વર્ષ સુધી સેવા આપશે. શહેરી વિકાસ પ્રોજેક્ટ ક્ષેત્રમાં આઈ. પી. ગૌતમની કામગીરીને લઈને તેઓ વધુ જાણીતા છે. આઈ. પી. ગૌતમની 2013માં શહેરી વિકાસ વિભાગના પ્રિન્સિપલ સેક્રેટરીપદેથી નિવૃત્ત થયા હતા. તેઓ અમદાવાદ મહાનગરપાલિકાના કમિશનર તરીકે પણ સેવા આપી ચૂક્યા છે. સૌથી નોંધપાત્ર બાબત એ છે કે, સારબમતી રિવરફ્રન્ટના નિર્માણ દરમિયાન ગૌતમની સૌથી અગત્યની ભૂમિકા રહી હતી. આ ઉપરાંત કમિશનર તરીકેના તેમના કાર્યકાળ દરમિયાન કાંકરિયા લેકફ્રન્ટનો વિકાસ, બીઆરટીએસ ઉપરાંત શહેરમાં અનેક ઓવરબ્રિજની કામગીરી સફળતાપૂર્વક થઈ હતી. આ ઉપરાંત લોકપાલના ભૂતપૂર્વ સભ્ય પણ રહી ચૂક્યા છે. જ્યારે આઈ. પી. ગૌતમ મેટ્રો રેલવેના ચેરમેન તરીકે સેવા આપી છે.

અંડર-19 મહિલા T20 વર્લ્ડ કપમાં આ ખેલાડીએ ફટકારી પહેલી સદી

અંડર-19 મહિલા T20 વર્લ્ડ કપમાં ભારતની જી ત્રિશા સદી ફટકારનારી પ્રથમ બેટર બની ગઈ છે. તેણે મંગળવારે સ્કોટલેન્ડ સામે સુપર-6 મેચમાં 59 બોલમાં 110 રનની ઇનિંગ રમી હતી અને અણનમ રહી હતી. આટલું જ નહીં તેણે 3 વિકેટ પણ લીધી હતી. ત્રિશાના ઓલરાઉન્ડ પ્રદર્શનના આધારે ભારતે આ મેચ 150 રનના મોટા અંતરથી જીતી લીધી હતી. જી ત્રિશાને પ્લેયર ઓફ ધ મેચ જાહેર કરવામાં આવી હતી. ટીમ પહેલાથી જ સેમિફાઈનલમાં પહોંચી ગઈ છે. નોંધનીય બાબત છે કે અંડર-19 મહિલા T20 વર્લ્ડ કપની આ બીજી સિઝન છે. પ્રથમ સિઝન 2023માં થઈ હતી, જેમાં કોઈ ખેલાડી સદી ફટકારી શક્યા નહોતા. આ સિઝનમાં પ્રથમ સદી ભારતીય બેટર્સના બેટથી આવી છે.

મલેશિયાના કુઆલાલંપુરમાં સ્કોટલેન્ડે ટૉસ જીતીને બોલિંગ કરવાનો નિર્ણય લીધો હતો. પ્રથમ બેટિંગ કરતા ભારતીય ટીમે 20 ઓવરમાં 1 વિકેટે 208 રન બનાવ્યા હતા. જવાબમાં સ્કોટલેન્ડની ટીમ 58 રનમાં ઓલઆઉટ થઈ ગઈ હતી. ભારતીય ટીમ માટે જી ત્રિશાએ 59 બોલમાં 110 રનની ઇનિંગ રમી હતી. તેણે 13 ચોગ્ગા અને 4 છગ્ગા ફટકાર્યા હતા. તેણે 53 બોલમાં પોતાની સદી પૂરી કરી હતી. તેની ઓપનિંગ પાર્ટનર કમલિનીજીએ 42 બોલમાં 51 રનની ઇનિંગ રમી હતી. બંનેએ 147 રનની ભાગીદારી કરી હતી. કમલિનીના આઉટ થયા બાદ વાઈસ કેપ્ટન સાનિકા ચાલકેએ 20 બોલમાં 5 ફોરની મદદથી 29 રન બનાવ્યા હતા.

2023માં યોજાયેલ T-20 વર્લ્ડ કપ ભારતે જ જીત્યો હતો. જી ત્રિશા 2023માં પ્રથમ અંડર-19 મહિલા T20 વર્લ્ડ કપ જીતનાર ભારતીય ટીમનો ભાગ રહી ચૂકી છે. ભારતીય ટીમે ફાઈનલમાં ઇંગ્લેન્ડને 7 વિકેટે હરાવીને ટાઇટલ જીત્યું હતું. ત્રિશાએ ફાઈનલમાં 29 બોલમાં 24 રનની ઇનિંગ રમી હતી. ઉલ્લેખનીય છે કે 2023ના વર્લ્ડ કપ બાદ ત્રિશાના પિતાએ એક ઈન્ટરવ્યૂ દરમિયાન કહ્યુ હતું કે તેમણે પોતાની દીકરીની ટ્રેનિંગ માટે પોતાનું જીમ અને 4 એકર જમીન વેચવી પડી હતી.

દિલ્હી રમખાણોના આરોપી તાહિર હુસૈનને સુપ્રીમ કોર્ટે રાહત આપી

સુપ્રીમ કોર્ટે 2020ના દિલ્હી રમખાણોના આરોપી અને ભૂતપૂર્વ કાઉન્સિલર તાહિર હુસૈનને રાહત આપી છે અને કસ્ટડી પેરોલને મંજૂરી આપી છે. આ પછી તાહિર હુસૈનને પોલીસ કસ્ટડીમાં પ્રચાર કરવાની પરવાનગી મળી ગઈ છે. તાહિર હુસૈન દિલ્હીની મુસ્તફાબાદ બેઠક પરથી AIMIM પાર્ટીની ટિકિટ પર વિધાનસભા ચૂંટણી લડી રહ્યા છે. તાહિર હુસૈને અગાઉ સુપ્રીમ કોર્ટમાં ચૂંટણી પ્રચાર માટે જામીન મેળવવા માટે અરજી કરી હતી પરંતુ તેને મંજૂરી આપવામાં આવી ન હતી. હવે તેણે પોલીસ કસ્ટડીમાં પ્રચાર કરવા માટે સુપ્રીમ કોર્ટ પાસેથી પરવાનગી માંગી હતી. જેને સુપ્રીમ કોર્ટે મંજૂરી આપી દીધી છે.

સુપ્રીમ કોર્ટે આ શરતો લાદી

બપોરે 2 વાગ્યે પસાર થયેલા પોતાના આદેશમાં, સુપ્રીમ કોર્ટની બેન્ચે તાહિર હુસૈનને કસ્ટડી પેરોલ મંજૂર કર્યો. સુપ્રીમ કોર્ટે તાહિર હુસૈનને 29 જાન્યુઆરીથી 3 ફેબ્રુઆરી સુધી કસ્ટડી પેરોલ મંજૂર કર્યા છે. આ સમયગાળા દરમિયાન, તેની કસ્ટડીનો જે પણ ખર્ચ થશે તે તાહિર હુસૈને ભોગવવાનો રહેશે. આમાં દિલ્હી પોલીસ સ્ટાફ, જેલ વાહનો અને એસ્કોર્ટ વાહનોનો ખર્ચ પણ શામેલ છે. સુપ્રીમ કોર્ટના નિર્દેશ મુજબ, તાહિર હુસૈનને પ્રચાર માટે દિવસ દરમિયાન જ જેલની બહાર જવાની મંજૂરી આપવામાં આવશે અને દરરોજ રાત્રે જેલમાં પાછા ફરવું પડશે. તેમણે દરરોજ ૧૨ કલાકના જામીન માટે ૨.૪૭ લાખ રૂપિયા ચૂકવવા પડશે, જે તેમની સુરક્ષા પરના ખર્ચનો એક ભાગ હશે.

કોલ્ડપ્લે કોન્સર્ટને લીધે અમદાવાદ મેટ્રોની કમાણી બમણી થઈ

અમદાવાદઃ નરેન્દ્ર મોદી સ્ટેડિયમમાં 25-26 જાન્યુઆરીએ ઇન્ટરનેશનલ બ્રિટિશ મ્યુઝિક બેન્ડ કોલ્ડપ્લે  કોન્સર્ટ યોજાયો હતો. ત્યારે ગુજરાત મેટ્રો રેલ કોર્પોરેશન (GMRC)એ 250-26 જાન્યુઆરી 2025એ અમદાવાદ મેટ્રોના ઇતિહાસમાં સૌથી વધુ મુસાફરોની સંખ્યા નોંધવામાં આવી હતી. 25 જાન્યુઆરીએ 2,13,735 મુસાફરો અને 26 જાન્યુઆરીએ 1,91,529 મુસાફરોએ મેટ્રોની સેવાનો લાભ લીધો હતો. કોલ્ડપ્લે કોન્સર્ટમાં શનિવાર અને રવિવારની સરખામણીમાં દરરોજ લગભગ એક લાખ લોકોએ મેટ્રો ટ્રેનમાં મુસાફરી કરી હતી. આ દિવસોમાં દરરોજ 50,000 વધારાના મુસાફરોએ અવર-જવર માટે મેટ્રોનો ઉપયોગ કર્યો હતો. આ બે દિવસના કોન્સર્ટે અમદાવાદમાં રેકોર્ડબ્રેક રેકોર્ડ નોંધાવ્યા છે, જેમાં અમદાવાદ મેટ્રો ટેનમાં બે દિવસમાં 4.05 લાખથી વધુ લોકોએ મુસાફરી કરી હતી. જેના માટે દર 8 મિનિટે મેટ્રો ટ્રેન દોડાવવામાં આવી હતી.

દેશનાં વિવિધ શહેરોમાંથી લાખોની સંખ્યામાં આ બેન્ડના ચાહકો અમદાવાદ આવ્યા હતા. જેમાં મોટા ભાગના ચાહકો ફ્લાઈટ મારફતે અમદાવાદ એરપોર્ટ આવ્યા હતા, જેમાં સૌથી વધુ મહારાષ્ટ્ર, કર્ણાટક અને કોલકાતાથી મુસાફરો અમદાવાદ આવ્યા હતા.

છેલ્લા ત્રણ દિવસમાં 1,37,500 મુસાફરોએ અમદાવાદ એરપોર્ટથી ફ્લાઈટમાં અવરજવર કરી હતી. 24 જાન્યુઆરી કોન્સર્ટના એક દિવસ પહેલાં અમદાવાદ એરપોર્ટ પર કુલ 44,000 મુસાફરોએ અવરજવર કરી હતી. આ ઉપરાંત 320 ફ્લાઈટની આવજા રહી હતી. જેમાંથી 38 ચાર્ટર પ્લેન હતાં. 25 જાન્યુઆરીએ સૌથી વધુ 47,000 મુસાફરોએ અમદાવાદ એરપોર્ટથી અવરજવર કરી હતી તથા 340 ફ્લાઈટની આવજા રહી હતી જેમાં 40 ચાર્ટર્ડ પ્લેનની આવજા રહી હતી. જ્યારે 26 જાન્યુઆરી એ અમદાવાદ એરપોર્ટ પર 46,500 મુસાફરોની અવરજવર રહી હતી તથા 320 ફ્લાઈટની આવજા રહી હતી.

સુરતમાં ડ્રગ્સના ઓવરડોઝથી યુવકનું શંકાસ્પદ મોત

ગુજરાતનું યુવા ધન ખોટા રવાડે ચડી રહ્યું છે. રાજ્યભરના મોટા શહેરોમાં ડ્રગ્સ ઝડપાવાના કિસ્સાઓ પ્રકાશમાં આવી રહ્યા છે. જાણે ગુજરાત ડ્રગ્સનો ગૃહઉદ્યોગ બની ગયો હોય. યુવાનો ડ્રગ્સના રવાડે ચડી ગયા હોવાથી પોલીસે નો ડ્રગ્સ અભિયાન પણ ચલાવી રહી છે. તેમછતાં રાજ્યના દરિયા કિનારે અને એરપોર્ટ પરથી કરોડોના ડ્રગ્સનો જથ્થો ઝડપાય છે. આ ઉપરાંત લાખો કરોડોના ડ્રગ્સની ઘૂસણખોરી પણ કરવામાં આવે છે. ત્યારે સુરતમાં એક 32 વર્ષીય યુવકનું ડ્રગ્સના ઓવરડોઝના લીધે શંકાસ્પદ મોત નીપજ્યું હોવાનો પરિવાજનોએ આક્ષેપ કર્યો છે.

પ્રાપ્ત માહિતી અનુસાર સુરતના શહેર ઉના વિસ્તારમાં આવેલી સંજર સોસાયટીમાં રહેતો અને રીક્ષા ચલાવીને ગુજરાત ચલાવતો નવાઝખાન પઠાણ ઘણીવાર દારૂનો નશો કરતો હતો, પરંતુ કેટલાક દિવસોથી એમડી ડ્રગ્સનું સેવન કરતો થઇ ગયો હોવાનું જાણવા મળ્યું હતું. ગત 20 જાન્યુઆરીએ રાત્રે આ યુવકે નશીલા દ્રવ્યનું ઇન્જેક્શન લેતાં તેને ખેંચ આવવા લાગી હતી અને બેભાન થઇ ગયો હતો. ત્યારબાદ તેને શહેરની એક ખાનગી હોસ્પિટલમાં એડમિટ કરવામાં આવ્યો હતો. જ્યાં તેની તબિયત વધુ ખરાબ થતી જણાતા અન્ય ખાનગી હોસ્પિટલમાં ખસેડવામાં આવ્યા હતો. છેલ્લા 8 દિવસમાં શહેરની અલગ અલગ ત્રણ જેટલી હોસ્ટિલોમાં સારવાર બાદ આજે (28 જાન્યુઆરી) સવારે નવાજખાન પઠાણ નામના યુવકનું મોત નીપજ્યું હતું. પરિવારજનોએ આક્ષેપ કર્યો છે કે નવાજખાન પઠાણનું મોત ડ્રગ્સના ઓવરડોઝના કારણે થયું છે. યુવકના મૃતદેહને હાલ પોસ્ટમોર્ટમ માટે સિવિલ હોસ્પિટલ ખાતે ખસેડવામાં આવ્યો છે. ત્યારે હવે પોસ્ટમોર્ટમ રિપોર્ટ સામે આવ્યા યુવકના મોતનું સાચું કારણ જાણી શકાશે. જોકે પોલીસે હાલ આ મામલે તપાસ કરી રહી છે.

તો આ બાજું સુરત ક્રાઇમ બ્રાન્ચે ડ્રગ્સ પેડલરોને પકડવા માટે 2 ઑપરેશન હાથ ધરવામાં આવ્યું હતું. આખરે  સુરત ક્રાઇમ બ્રાન્ચે સુરતમાંથી 10 લાખની કિંમતનું ડ્રગ્સના જથ્થા સાથે 3 પેડલર્સની ધરપકડ કરવામાં આવી છે. પોલીસે આરોપીઓ પાસેથી 80.140 ગ્રામ M.D ડ્રગ્સ કબ્જે કરાયું છે. ડ્રગ્સ કેસમાં ઝડપાયેલા બે આરોપી સાળા-બનેવી હોવાનું સામે આવ્યું છે. સુરત ક્રાઇમ બ્રાન્ચે સમગ્ર મામલે તપાસનો ધમધમાટ શરૂ કર્યો છે.

1...1,2111,2121,213...5,153Page 1,212 of 5,153