સહુથી સહેલી રીતથી બની જતી વટાણા બટેટાની કચોરી નાવીન્યસભર છે! કેમ કે, તે ક્રિસ્પી તેમજ સ્વાદિષ્ટ બને છે. આ કચોરીને ચાટરૂપે પણ પીરસી શકાય છે!

સામગ્રીઃ

• બટેટા 5-6
• લાલ મરચાં પાઉડર ½ ટી.સ્પૂન
• કાળા મરી પાઉડર ¼ ટી.સ્પૂન
• કોર્નફ્લોર 2 ટે.સ્પૂન
• તીખી લીલી ચટણી
• મીઠી ચટણી
• દાડમના દાણા 3 ટે.સ્પૂન
• ચાટ મસાલો 1 ટે.સ્પૂન
• તેલ

પૂરણ માટેઃ

• બાફેલા લીલા વટાણા 1 કપ
• ખમણેલું આદુ 2 ટી.સ્પૂન
• સમારેલી કોથમીર 2 ટે.સ્પૂન
• આમચૂર પાઉડર ½ ટી.સ્પૂન
• લાલ મરચાં પાઉડર ½ ટી.સ્પૂન
• લીલા મરચાં 2-3
• મીઠું સ્વાદ મુજબ

રીતઃ  બટેટાને છોલીને ધોઈ લો. તેને જાડી ખમણીમાં ખમણીને પાણીમાં રાખો. બટેટા ખમણી લીધા બાદ તેને 2 પાણીએથી ધોઈ લો. એક કઢાઈમાં 3-4 ગ્લાસ જેટલું પાણી ગરમ કરવા મૂકો. તેમાં 1 ટી.સ્પૂન જેટલું મીઠું નાખી દો. પાણી ઉકળવા લાગે એટલે ખમણેલા બટેટામાંથી પાણી નિતારી તેને ગરમ પાણીમાં ઉમેરો. આ ખમણ 2-3 મિનિટ જેટલું ઉકળવા દો. તેને કાચું પાકું રાખવું, લગભગ 30-40% જેટલું ચઢવા દેવું. ત્યારબાદ ગેસ બંધ કરીને ખમણેલા બટેટાને ચાળણીમાં નાખીને પાણી નિતારી લેવું.

વટાણાના પૂરણ માટે બાફેલા વટાણા એક બાઉલમાં લઈ તેમાં ખમણેલું આદુ, સમારેલી કોથમીર, આમચૂર પાઉડર, લાલ મરચાં પાઉડર, સમારેલાં મરચાં, મીઠું સ્વાદ મુજબ ઉમેરી દો. આ મિશ્રણને પાઉંભાજી મેશર વડે અધકચરું વાટી લો.

ખમણેલા બટેટામાં કોર્નફ્લોર, લાલ મરચાં પાઉડર, કાળા મરી પાઉડર મેળવી લો. મીઠું નહીં નાખવું. કારણ કે, ઉકળતા પાણીમાં મીઠું નાખ્યું હોય છે. અથવા તપાસીને ઉમેરવું. આ મિશ્રણને મિક્સ કરી લીધા બાદ તે ગોળો વળે તેવું બંધાવું જોઈએ. એવું ન થાય તો તેમાં કોર્નફ્લોર થોડો ઉમેરો. કોર્નફ્લોરને બદલે મેંદો પણ લઈ શકાય છે.

બંને હાથ તેલવાળા કરી, બટેટાના મિશ્રણનો ગોળો લઈ હાથમાં તેને પુરી જેટલો થાપો. તેમાં 1 ચમચી જેટલું  વટાણાનું પૂરણ ઉમેરી દો. તેની ઉપર બટેટાની બીજી પુરી મૂકીને બંને પુરીની કિનારી દાબીને પેક કરી લો. આ રીતે બધી કચોરી તૈયાર કરીને એક પ્લેટમાં મૂકી દો.

કઢાઈમાં તેલ ગરમ કરી લો. તેલ ગરમ થાય એટલે ગેસની આંચ તેજ-મધ્યમ રાખીને હળવેથી બટેટાની કચોરી ઉમેરીને સોનેરી રંગની તળી લો.

આ કચોરી તીખી-મીઠી ચટણી સાથે પીરસો. જો ચાટ તૈયાર કરવી હોય તો એક પ્લેટમાં 2-3 કચોરીને તોડીને તેની ઉપર દહીં, તીખી-મીઠી ચટણી રેડીને ચાટ મસાલો ભભરાવીને દાડમના દાણા નાખીને પીરસી આપો.