નવી દિલ્હીઃ આંતરરાષ્ટ્રીય મહિલા દિવસ નિમિત્તે ભાજપે દિલ્હી જવાહરલાલ નહેરુ સ્ટેડિયમમાં એક કાર્યક્રમનું આયોજન કર્યું હતું જેમાં ભાજપના રાષ્ટ્રીય અધ્યક્ષ જેપી નડ્ડા, સીએમ રેખા ગુપ્તા અને દિલ્હી પ્રદેશ અધ્યક્ષ વીરેન્દ્ર સચદેવા, બૈજયંત પાંડા, મહિલા મોરચા પ્રમુખ વનથી શ્રીનિવાસન અને સાંસદ કમલજીત સેહરાવત હાજર રહ્યા હતા. આ બેઠકમાં મહિલા સમૃદ્ધિ યોજના અંગે એક મોટી જાહેરાત કરવામાં આવી છે.
રાજ્ય સરકારની કેબિનેટે મહિલા દિને મહિલા સમૃદ્ધિ યોજનાને મંજૂરી આપી છે. મહિલા સમૃદ્ધિ યોજના અંગે દિલ્હીનાં CM રેખા ગુપ્તાએ કહ્યું હતું કે માપદંડ અને પોર્ટલ ટૂંક સમયમાં શરૂ કરવામાં આવશે, જેને આધારે નોંધણી પ્રક્રિયા શરૂ કરવામાં આવશે.
તેમણે કહ્યું હતું કે મંત્રીમંડળની બેઠકમાં બધા સાથીઓ હાજર હતા. અમે અમારી જાહેરાતોને પૂર્ણ કરવા માટે કામ કર્યું છે. આજે અમે મહિલા સમૃદ્ધિ યોજના શરૂ કરી છે. મંત્રીમંડળે મહિલા સમૃદ્ધિ યોજનાને મંજૂરી આપી છે. દિલ્હી મંત્રીમંડળે મહિલા સમૃદ્ધિ યોજના હેઠળ 5100 કરોડ રૂપિયા આપ્યા છે. અમે મહિલા સમૃદ્ધિ યોજના માટે એક સમિતિની રચના કરી છે, જેની અધ્યક્ષતા હું પોતે કરીશ. આ અંતર્ગત BPL પરિવારોની મહિલાઓને દર મહિને 2500 રૂપિયા આપવામાં આવશે.
જેએલએન સ્ટેડિયમમાં આવેલી મહિલાઓ આ યોજનાથી ખૂબ ખુશ દેખાઈ. તેમણે કહ્યું કે દિલ્હીની મહિલાઓ લાંબા સમયથી રાહ જોઈ રહી હતી. તે ખૂબ જ આનંદની વાત છે. રેખાજીએ અમને અપાર ખુશી આપી છે. જ્યારથી એક મહિલા મુખ્યમંત્રી બની છે ત્યારથી અમે ખૂબ ખુશ છીએ.
