અંડર-19 મહિલા T20 વર્લ્ડ કપમાં ભારતની જી ત્રિશા સદી ફટકારનારી પ્રથમ બેટર બની ગઈ છે. તેણે મંગળવારે સ્કોટલેન્ડ સામે સુપર-6 મેચમાં 59 બોલમાં 110 રનની ઇનિંગ રમી હતી અને અણનમ રહી હતી. આટલું જ નહીં તેણે 3 વિકેટ પણ લીધી હતી. ત્રિશાના ઓલરાઉન્ડ પ્રદર્શનના આધારે ભારતે આ મેચ 150 રનના મોટા અંતરથી જીતી લીધી હતી. જી ત્રિશાને પ્લેયર ઓફ ધ મેચ જાહેર કરવામાં આવી હતી. ટીમ પહેલાથી જ સેમિફાઈનલમાં પહોંચી ગઈ છે. નોંધનીય બાબત છે કે અંડર-19 મહિલા T20 વર્લ્ડ કપની આ બીજી સિઝન છે. પ્રથમ સિઝન 2023માં થઈ હતી, જેમાં કોઈ ખેલાડી સદી ફટકારી શક્યા નહોતા. આ સિઝનમાં પ્રથમ સદી ભારતીય બેટર્સના બેટથી આવી છે.
મલેશિયાના કુઆલાલંપુરમાં સ્કોટલેન્ડે ટૉસ જીતીને બોલિંગ કરવાનો નિર્ણય લીધો હતો. પ્રથમ બેટિંગ કરતા ભારતીય ટીમે 20 ઓવરમાં 1 વિકેટે 208 રન બનાવ્યા હતા. જવાબમાં સ્કોટલેન્ડની ટીમ 58 રનમાં ઓલઆઉટ થઈ ગઈ હતી. ભારતીય ટીમ માટે જી ત્રિશાએ 59 બોલમાં 110 રનની ઇનિંગ રમી હતી. તેણે 13 ચોગ્ગા અને 4 છગ્ગા ફટકાર્યા હતા. તેણે 53 બોલમાં પોતાની સદી પૂરી કરી હતી. તેની ઓપનિંગ પાર્ટનર કમલિનીજીએ 42 બોલમાં 51 રનની ઇનિંગ રમી હતી. બંનેએ 147 રનની ભાગીદારી કરી હતી. કમલિનીના આઉટ થયા બાદ વાઈસ કેપ્ટન સાનિકા ચાલકેએ 20 બોલમાં 5 ફોરની મદદથી 29 રન બનાવ્યા હતા.
2023માં યોજાયેલ T-20 વર્લ્ડ કપ ભારતે જ જીત્યો હતો. જી ત્રિશા 2023માં પ્રથમ અંડર-19 મહિલા T20 વર્લ્ડ કપ જીતનાર ભારતીય ટીમનો ભાગ રહી ચૂકી છે. ભારતીય ટીમે ફાઈનલમાં ઇંગ્લેન્ડને 7 વિકેટે હરાવીને ટાઇટલ જીત્યું હતું. ત્રિશાએ ફાઈનલમાં 29 બોલમાં 24 રનની ઇનિંગ રમી હતી. ઉલ્લેખનીય છે કે 2023ના વર્લ્ડ કપ બાદ ત્રિશાના પિતાએ એક ઈન્ટરવ્યૂ દરમિયાન કહ્યુ હતું કે તેમણે પોતાની દીકરીની ટ્રેનિંગ માટે પોતાનું જીમ અને 4 એકર જમીન વેચવી પડી હતી.
