અમદાવાદ: ફિઝિકલ રિસર્ચ લેબોરેટરી (PRL) દ્વારા આગામી 19 થી 22 નવેમ્બર, 2024 દરમિયાન મેટિયોરોઇડ, મીટીઅર અને મીટીયોરાઈટ્સ: મેસેન્જર્સ ફ્રોમ સ્પેસ (મેટમેએસએસ-2024) વિષય પર આંતરરાષ્ટ્રીય પરિષદનું આયોજન કરવામાં આવ્યું છે. જેનો ઉદ્ઘાટન સમારોહ 20મી નવેમ્બરના રોજ યોજાશે.
PRLના કે. આર. રામનાથન ઓડિટોરિયમ ખાતે યોજાનારી આ ત્રણ દિવસીય ઇવેન્ટમાં ઉલ્કાશાસ્ત્ર અને ગ્રહ વિજ્ઞાનના નવીનતમ વિકાસ પર ચર્ચા કરવા માટે યુવા સંશોધકો સહિત દેશ-વિદેશના 140 વૈજ્ઞાનિકો એક મંચ પર આવશે.
આ કોન્ફરન્સમાં અવકાશ હવામાન, બહારની દુનિયાના કાર્બનિક પદાર્થો, ચંદ્ર, મંગળ અને શુક્ર ગ્રહના અવકાશી પદાર્થોની સપાટી પરની પ્રક્રિયાઓ તેમજ એસ્ટ્રોકેમિસ્ટ્રી અને એસ્ટ્રોબાયોલોજી જેવા વિષયોને આવરી લેવામાં આવશે. લગભગ 90 વૈજ્ઞાનિક પેપર્સ રજૂ કરવામાં આવશે, જે નિષ્ણાતો અને વિદ્યાર્થીઓને જ્ઞાન અને વિચારો શેર કરવા માટે એક પ્લેટફોર્મ પૂરું પાડશે.
ચંદ્રયાન-3 સહિત સ્પેસ મિશનમાં ભારતની તાજેતરની સફળતા સાથે, આ ઘટના વધુ મહત્વ ધરાવે છે. ચંદ્રયાન-4 મિશન માટે ISROની યોજનાઓ પર પણ ચર્ચા થશે. જેનો ઉદ્દેશ્ય ચંદ્ર પરથી નમૂનાઓ પાછા લાવવાનો છે. PRL, ગ્રહોની સામગ્રીના પૃથ્થકરણમાં તેની કુશળતા માટે જાણીતું છે. આ નમૂનાઓનો અભ્યાસ કરવા માટે પ્રોટોકોલને આકાર આપવામાં તે મુખ્ય ભૂમિકા ભજવશે.
મુખ્ય કાર્યક્રમના ભાગરૂપે એક હેન્ડ-ઓન વર્કશોપ અથવા “કાર્યશાળા” આગામી 18-19 નવેમ્બરના રોજ આયોજીત થયેલ છે. જેમાં માસ્ટર્સ અને પી.એચ.ડી. વિદ્યાર્થીઓને ઉલ્કાઓ પર તાલીમ આપવામાં આવશે.
