ઉત્તર કાશ્મીરના કુપવાડા જિલ્લામાં સુરક્ષા દળોને મોટી સફળતા મળી છે, સેનાએ આજે કેરન સેક્ટરમાં ઘૂસણખોરીના પ્રયાસને નિષ્ફળ બનાવ્યો અને એક આતંકીને ઠાર કર્યો. સૂત્રોના જણાવ્યા અનુસાર કુપવાડા પોલીસ અને સુરક્ષા દળોને કેરન વિસ્તારમાં ઘૂસણખોરીની માહિતી મળી હતી, ત્યારબાદ ઓપરેશન શરૂ કરવામાં આવ્યું હતું. સુરક્ષાદળો અને આતંકવાદીઓ વચ્ચે ગોળીબાર થયો હતો, જેમાં અત્યાર સુધીમાં એક આતંકી માર્યો ગયો છે. બીજી તરફ, PM નરેન્દ્ર મોદીની હાજરીમાં દિલ્હીમાં CCSની બેઠક યોજાઈ હતી, જેમાં જમ્મુ-કાશ્મીરની સ્થિતિ પર વિસ્તૃત ચર્ચા કરવામાં આવી હતી.
કેબિનેટની સુરક્ષા બાબતોની સમિતિ (CCS)ની આજે દિલ્હીમાં એક મહત્વપૂર્ણ બેઠક યોજાઈ હતી. આ બેઠકમાં વડાપ્રધાન મોદી, ગૃહ મંત્રી અમિત શાહ, રક્ષા મંત્રી રાજનાથ સિંહ, નાણા મંત્રી નિર્મલા સીતારમણ સહિત ઘણા ટોચના અધિકારીઓ હાજર રહ્યા હતા. સૂત્રોના જણાવ્યા અનુસાર, કેન્દ્રીય સુરક્ષા સમિતિની આ બેઠક લાંબા સમય સુધી ચાલી હતી અને આ બેઠકમાં જમ્મુમાં વધી રહેલા આતંકવાદી હુમલાઓ પર વિગતવાર ચર્ચા કરવામાં આવી હતી. એવું માનવામાં આવે છે કે સરકાર આતંકવાદીઓને જડબાતોડ જવાબ આપવા માટે નક્કર રણનીતિ બનાવી રહી છે, જેની અસર આગામી દિવસોમાં જોવા મળી શકે છે.
જમ્મુમાં પણ એન્કાઉન્ટર ચાલી રહ્યું છે
બીજી તરફ જમ્મુના ડોડામાં પણ એન્કાઉન્ટર ચાલી રહ્યું છે. આજે સવારે આતંકીઓએ સર્ચિંગ ટીમ પર હુમલો કર્યો, જ્યારે સેનાએ ગોળીબાર કર્યો તો આતંકીઓ જંગલ તરફ ભાગ્યા, જ્યાં સેનાએ તેમને ઘેરી લીધા. સેના અને આતંકીઓ વચ્ચે સમયાંતરે ગોળીબાર થઈ રહ્યો છે. સેના આતંકીઓને શોધવા માટે સર્ચ ઓપરેશન ચલાવી રહી છે. રામબન રેન્જના ડીઆઈજી શ્રીધર પાટીલે ડોડા એન્કાઉન્ટર પર કહ્યું છે કે જંગલમાં સેનાનું સર્ચ ઓપરેશન ચાલી રહ્યું છે. ગઈ કાલે પણ આતંકવાદીઓ સાથે એન્કાઉન્ટર થયું હતું અને આજે પણ એન્કાઉન્ટર છે. તેમણે આશા વ્યક્ત કરી છે કે ટૂંક સમયમાં સફળતા મળશે.
