કન્યા કેળવણી મહોત્સવ અને શાળા પ્રવેશોત્સવ અન્વયે મુખ્યમંત્રી ભૂપેન્દ્ર પટેલે રાજ્યના પ્રથમ સરહદી ગામ એવા કચ્છના કુરનમાં નાના ભૂલકાઓને આંગળી પકડી શાળામાં પાપા પગલી કરાવી હરખભેર પ્રવેશ કરાવ્યો હતો. તેમણે કુરન ખાતે નવનિર્મિત પ્રાથમિક શાળાના અત્યાધુનિક ભવનનું લોકાર્પણ કરી વર્ગખંડમાં બાળકો સાથે ગોષ્ઠી કરી હતી અને શાળા પરિસરની મુલાકાત લીધી હતી.
નવા ભવનના નિર્માણ બદલ શ્રી કુરન પ્રાથમિક શાળાને અભિનંદન પાઠવું છું. શિક્ષણનો યજ્ઞ અહીં ખૂબ નિષ્ઠાપૂર્વક આગળ વધે અને આવનાર સમયમાં રાષ્ટ્રનું નામ રોશન કરનાર પ્રતિભાશાળી વિદ્યાર્થીઓ અહીં તૈયાર થાય તેવી શુભકામના. #ShalaPraveshotsav2025 pic.twitter.com/rsThBvZJBq
— Bhupendra Patel (@Bhupendrapbjp) June 28, 2025
કચ્છની સરહદે આવેલા કુરન ખાતેથી શાળા પ્રવેશોત્સવનો પ્રારંભ કરાવતા મુખ્યમંત્રીએ પ્રાથમિક શાળામાં શાળા વ્યવસ્થાપન સમિતિની બેઠક યોજી શાળામાં ચાલતી શૈક્ષણિક પ્રવૃત્તિઓ અને કામગીરીની સમીક્ષા કરી જરૂરી સૂચનો કર્યા હતા. શાળા વ્યવસ્થાપન સમિતિની બેઠકને સંબોધન કરતાં જણાવ્યું હતું કે, બાળકો ભણી અને આગળ વધે તે જોવાની જવાબદારી શિક્ષકોની સાથે વાલીની પણ છે.
શ્રી કુરન પ્રાથમિક શાળાના બાળકો સાથે વાર્તાલાપ પણ ખૂબ મજાનો રહ્યો.
સરહદી ગામના વિદ્યાર્થીઓ સાંપ્રત પ્રવાહોથી માહિતગાર છે, પોતાના અભ્યાસ પ્રત્યે જાગૃત છે અને ભણીને આગળ વધવા તત્પર છે, તે જોઈને ઘણો આનંદ થયો. #ShalaPraveshotsav2025 pic.twitter.com/zR3Hj3wepk
— Bhupendra Patel (@Bhupendrapbjp) June 28, 2025
કન્યા કેળવણી મહોત્સવને સાર્થક બનાવવા આપણી દીકરીઓ ભણી આગળ વધે તે માટે દરેક વાલી તેમની દીકરીઓને અવશ્ય ભણાવવા માટે અનુરોધ કર્યો હતો. કુરન ગામમાં ભણી ગણીને કેટલા લોકો ડોક્ટર, એન્જિનિયર, શિક્ષક, આર્મી વગેરેમાં નોકરીમાં જોડાયા છે તેની પૃચ્છા કરી હતી. બાળકોની સાથે કાલીધેલી ભાષામાં ગોષ્ઠી કરતા તેમણે શાળાએ નિયમિત આવવા જણાવ્યું હતું અને બાળકો પાસે ઘડિયા પણ બોલાવ્યા હતા. પદાધિકારીઓ ઉપરાંત શિક્ષણાધિકારી સહિના મહાનુભાવો સામેલ થયા હતા.
