નવી દિલ્હી:કોરોના વાયરસ સામે સમગ્ર વિશ્વ ઝઝૂમી રહ્યું છે ત્યારે ભારતે મિત્રતતા નિભાવવા અમેરિકા સહિતના કેટલાક દેશોને કોરોના વાયરસ સામે અસરકારક એવી મેલેરિયાની દવા હાઇડ્રોક્સીક્લોરોક્વીનનો જથ્થો મોકલી આપ્યો છે. ભારત દ્વારા આ દવાની નિકાસ પરનો પ્રતિબંધ કપરા સમયમાં ઉઠાવી લેવાયો છે અને જ્યાં વધુ જરૂરિયાત હોય તેવા દેશોને મોકલી આપ્યો છે.
આ કપરી પરિસ્થિતિમાં મદદ કરવા બદલ અમેરિકાના રાષ્ટ્રપતિ ડોનાલ્ડ ટ્રમ્પે વડાપ્રધાન નરેન્દ્ર મોદીના ભારો ભારો વખાણ કર્યા છે. ટ્રમ્પે કહ્યું કે, ‘થેંક્યૂ ઈન્ડિયા’. યુએસ રાષ્ટ્રપતિના વળતો જવાબ આપતા પીએમ મોદીએ પણ ટ્વીટ કરીને કટોકટીના સમયમાં મિત્રો વધુ નિકટ આવતા હોવાનું જણાવ્યું હતું.
વડાપ્રધાન નરેન્દ્ર મોદીએ ગુરુવારે પોતાના સત્તાવાર ટ્વિટર હેન્ડલ પરથી જણાવ્યું કે, ‘તમારી વાતથી હું સંપૂર્ણ સહમત છું. આવા સમયમાં મિત્રો નજીક આવી જતા હોય છે. ભારત-અમેરિકા દ્વીપક્ષીય સંબંધો પહેલા કરતા વધુ મજબૂત થયા છે.’ ભારતે કોરોના સામેની લડાઈમાં તેની સંપૂર્ણ તાકાત લગાવી દીધી છે. ભારત વિશ્વભરમાં અન્ય જરૂરિયાતવાળા દેશોને સંભવિત તમામ મદદ કરશે, આપણે આ લડાઈ સૌ સાથે મળીને જીતીશું.
