મુંબઈ: ચીનની કાર નિર્માતા કંપની ગ્રેટ વૉલ માટર્સ ભારતના માર્કેટમાં એન્ટ્રી કરવાની તૈયારીમાં છે. કંપની ફ્રેબુઆરીમાં યોજાનારા ઓટો એક્સપોમાં કેટલીક એસયુવી અને એક ઈલેક્ટ્રીક કાર પ્રદર્શિત કરશે. આ ઈલેક્ટ્રિક કાર Ora R1 છે જે વિશ્વની સૌથી સસ્તી ઈલેક્ટ્રિક તરીકે જાણીતી છે.
Ora R1 ઈલેક્ટ્રીક કારની કિંમત 8.6 હજાર ડોલરથી લઈને 11 હજાર ડોલર જેટલી છે. એટલે કે ભારતીય રુપિયામાં આ કારની કિંમત 6.2 લાખથી લઈને 8 લાખ રુપિયા સુધી આંકી શકાય. ગ્રેટ વૉલ મોટરે પોતાના ભારતીય ટ્વિટર પેજ પર આ સસ્તી ઈલેક્ટ્રિકલ કારને ફીચર કરી છે. Ora R1 ઈલેક્ટ્રિક કાર એક વાર ફુલ ચાર્જ થયા બાદ 351 કિમી સુધી ચાલી શકે છે. કારમાં 35KWની ઈલેક્ટ્રિક મોટર અને 33kwhની લિથિયમ આયન બેટરી આપવામાં આવી છે. સ્ટાન્ડર્ડ ચાર્જરથી આ કારને સંપૂર્ણ ચાર્જ થવામાં લગભગ 10 કલાકનો સમય લાગશે. ફાસ્ટ ચાર્જરથી કારની બેટરી 40 મિનિટમાં 20 ટકાથી ચાર્જ થઈને 80 ટકા થઈ જશે.
આ સસ્તી ઈલેક્ટ્રિક કારની રેન્જ ભારતીય માર્કેટમાં રહેલી અન્ય ઈલેક્ટ્રિક કારના હિસાબે પ્રતિસ્પર્ધી છે. આ ઈલેક્ટ્રિક કારની સરેરાશ એવરેજ 270 કિમી છે. ફુલ ચાર્જ પર સૌથી વધુ એવરેજ 452 કિમી હ્યુંડાઈની કોના ઈલેક્ટ્રિક આપે છે. પરંતુ તેની એક્સ શો રૂમ કિંમત 23.72 લાખ રુપિયા છે.
જોકે, આ ઈલેક્ટ્રીક કારમાં ટેસ્લા ઓટોપાયલટ કે તેમના જેવા અન્ય ફેન્સી ટેક્નોલોજી ફિચર્સ નથી પણ આ કારનો દેખાવ આકર્ષક છે. કારની સ્ટીલ ફ્રેમ પર શાનદાર કર્વ્સ અને મોટા રાઉન્ડ હેડલેમ્પ કારને રેટ્રો મોર્ડન લુક આપે છે. આ ઈલેક્ટ્રીક કારમાં આર્ટિફિશિયલ ઈન્ટેલિજન્સ સિસ્ટમ આપવામાં આવી છે, જેથી Hello Ora બોલતાની સાથે આ કાર ચાલુ થઈ જશે.
ભારતમાં ઈલેક્ટ્રિક કારની સરેરાશ કિંમત 13 લાખ રુપિયાની આસપાસ છે. જે ટ્રેડિશનલ પોપ્યુલર કાર્સ કરતા લગભગ 5 લાખ રુપિયા વધારે છે. જ્યારે ગ્રેટ વૉલ મોટર્સની એન્ટ્રીથી ભારતના ગ્રાહકોને Ora R1ના સ્વરુપે એક સારો વિકલ્પ મળશે. ગ્રેટ વોલ મોટરે ભારતમાં પોતાની એન્ટ્રીની જાહેરાત સોશિયલ મીડિયા પર કરી છે. ટ્વિટર પેજ પર કંપનીએ નમસ્તે ઈન્ડિયા ટાઈટલ સાથે એક ટીઝર વીડિયો શેર કર્યો છે. વીડિયોમાં એક SUVની આઉટલાઈન પણ જોવા મળે છે.
