જમ્મુ-કાશ્મીરના કિશ્તવાડ જિલ્લાના ચટરૂના સિંહપોરા વિસ્તારમાં 22 મે, 2025ના રોજ વહેલી સવારે સુરક્ષાદળો અને આતંકવાદીઓ વચ્ચે ભીષણ અથડામણ થઈ. જમ્મુ-કાશ્મીર પોલીસ, ભારતીય સેના અને પેરામિલિટરી ફોર્સના સંયુક્ત અભિયાનમાં ત્રણથી ચાર જૈશ-એ-મોહમ્મદના આતંકવાદીઓને ઘેરી લેવાયા હતા. આ ઓપરેશનમાં એક જવાન શહીદ થયા, જ્યારે બે આતંકવાદીઓ ઠાર મરાયા.
ઓપરેશન ટ્રાશી હેઠળ, સુરક્ષાદળોએ ચોક્કસ ગુપ્તચર માહિતીના આધારે સિંહપોરા વિસ્તારમાં સર્ચ ઓપરેશન શરૂ કર્યું હતું. આ દરમિયાન આતંકવાદીઓએ ફાયરિંગ શરૂ કરતાં સુરક્ષાદળોએ જવાબી કાર્યવાહી કરી. ભીષણ ગોળીબારમાં એક જવાન ગંભીર રીતે ઘાયલ થયા. આ ઓપરેશનમાં બે આતંકવાદીઓ ઠાર મરાયા, અને હાલ વિસ્તારમાં ડ્રોન અને એરિયલ સર્વેલન્સની મદદથી બાકીના આતંકવાદીઓની શોધખોળ ચાલુ છે. આ આતંકવાદીઓ તે જ જૂથના હોવાનું મનાય છે, જે અગાઉની અથડામણમાંથી નાસી છૂટ્યા હતા.
આ વિસ્તાર પીર પંજાલ રેન્જ દ્વારા અનંતનાગ સાથે જોડાયેલો છે, અને આતંકવાદીઓ કાશ્મીરથી આવ્યા હોવાની શંકા છે. સ્થાનિક વહીવટી તંત્રે નાગરિકોને ઘરમાં રહેવા અને સાવચેત રહેવા અપીલ કરી છે, જ્યારે સુરક્ષાદળોએ વિસ્તારના તમામ પ્રવેશ અને નિકાસ માર્ગો સીલ કરી દીધા છે. આ ઘટના પહલગામ આતંકી હુમલા બાદ સુરક્ષાદળોની તીવ્ર કાર્યવાહીનો ભાગ છે, જેમાં 26 નાગરિકોની હત્યા થઈ હતી.
