મહારાષ્ટ્રમાં 5000 લોકોને ‘હાઈ-રિસ્ક કોન્ટેક્ટ’ને કારણે ક્વોરન્ટાઈન કરાયા

મુંબઈઃ મહારાષ્ટ્રના આરોગ્ય પ્રધાન રાજેશ ટોપેએ આજે આંચકાજનક માહિતી આપી. એમણે કહ્યું છે કે રાજ્યમાં 5000થી વધારે લોકો કોરોના વાઈરસના રોગચાળા માટે ‘હાઈ-રિસ્ક કોન્ટેક્ટ’માં છે. આ લોકોને ક્વોરન્ટાઈન કરવામાં આવ્યા છે, કારણ કે એમને કોરોનાનો ચેપ લાગ્યો હોવાની સંભાવના છે અથવા એમને કોરોના લાગુ પડી ગયો છે.

મહારાષ્ટ્રમાં વધુ બે જણનો કોરોના રિપોર્ટ પોઝિટીવ આવ્યો છે અને એ સાથે જ રાજ્યમાં દર્દીઓની કુલ સંખ્યા 322 પર પહોંચી છે. છેલ્લા બે દિવસમાં મુંબઈમાં પણ કોરોનાનાં દર્દીઓની સંખ્યા ઝડપથી વધી છે.

મુંબઈમાં કોરોનાનાં અત્યાર સુધીમાં 162 દર્દીઓ છે.

રાજેશ ટોપેએ આજે મુંબઈ મહાનગરપાલિકા મુખ્યાલયના વોર રૂમની મુલાકાત લીધી હતી. ત્યાં યોજેલી બેઠકમાં એમણે જણાવ્યું કે મહારાષ્ટ્રમાં 5000થી વધારે લોકો હાઈ-રિસ્ક કોન્ટેક્ટમાં મૂકાયા છે. એમની પર દેખરેખ રાખવા માટે 4000 જેટલા લોકોને મૂકવામાં આવ્યા છે.

મુંબઈમાં પાંચ સરકારી અને 7 ખાનગી હોસ્પિટલોમાં કોરોનાની તપાસ કરવાની સુવિધા શરૂ કરાઈ છે. ત્યાં દરરોજ બે હજાર જેટલી તપાસ કરી શકાશે. હાલ 1,200 કેસની તપાસ કરી શકાય છે.

આ ઉપરાંત 46 વેન્ટીલેટર મળ્યા છે તેમજ 1 લાખ એન-95 માસ્ક પણ ઉપલબ્ધ કરવામાં આવ્યા છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]