વોશિંગ્ટનઃ અમેરિકાના ભૂતપૂર્વ પ્રમુખ બરાક ઓબામાએ ચેતવણી આપી છે કે દેશની લોકશાહી ખતરામાં છે, કારણ કે પ્રમુખપદ માટે એમના અનુગામી બનેલા પ્રમુખ ડોનાલ્ડ ટ્રમ્પ સંપૂર્ણપણે અનફિટ છે.
ઓબામાએ આ કમેન્ટ્સ એમની ડેમોક્રેટિક પાર્ટીના હાલ ચાલી રહેલા રાષ્ટ્રીય સંમેલનના ભાગરૂપે કરવામાં આવી છે. એમણે ગઈ કાલે ફિલાડેલ્ફિયામાં મ્યુઝિયમ ઓફ ધ અમેરિકન રીવોલ્યૂશનમાંથી વર્ચ્યુઅલ સંબોધનમાં ઉપર મુજબ કહ્યું હતું.
એમણે અમેરિકાના મતદારોને અપીલ કરી છે કે તેઓ દેશના પ્રમુખપદની ચૂંટણીમાં ડેમોક્રેટિક પાર્ટીના ઉમેદવાર જો બિડેનને મત આપે, જે પોતાના શાસન વખતે ઉપપ્રમુખ હતા.
ઓબામાએ સંબોધનમાં મતદારોને કહ્યું કે હાલ આપણી લોકશાહી ખતરામાં છે. આ બાબતને હળવાશથી લેશો નહીં. લોકતાંત્રિક પ્રથાઓ ઉપર ટ્રમ્પ જે રીતે પ્રહારો કરી રહ્યા છે એ જોતાં એવું લાગે છે કે આખી લોકતાંત્રિક પદ્ધતિનો અંત આવી જશે. હાલના વહીવટીતંત્રે બતાવી આપ્યું છે કે જો તે ચૂંટણીમાં ફરીથી જીતશે તો આપણી લોકશાહીને છિન્નભિન્ન કરી નાખશે.
વિરોધીઓ સાથેના વર્તાવ અને પ્રચારમાધ્યમો પર પ્રહાર કરવા બદલ ઓબામાએ ટ્રમ્પની ઝાટકણી કાઢી હતી. ‘મને એવી આશા હતી કે આપણા દેશને ખાતર ડોનાલ્ડ ટ્રમ્પ પ્રમુખ તરીકે પોતાની જવાબદારીને કદાચ ગંભીરતાથી લેશે, પણ એમણે એ કર્યું નથી. છેલ્લા ચાર વર્ષમાં એમણે એવું કોઈ કામ કરવામાં કોઈ રસ બતાવ્યો નથી.’
ઓબામાના પત્ની મિચેલ ઓબામાએ કહ્યું કે ટ્રમ્પ આપણા દેશના ખોટા પ્રમુખ છે.
