બ્રિટન, ફ્રાન્સ અને કેનેડાએ ઈઝરાયલને ગાઝામાં યુદ્ધ બંધ કરવા અને હમાસને બંધકો મુક્ત કરવા સંયુક્ત નિવેદન જારી કર્યું છે, નહીં તો કડક કાર્યવાહીની ચેતવણી આપી છે. રવિવારે ઈઝરાયલે ગાઝામાં મોકલેલી સહાયને આ દેશોએ અપૂરતી ગણાવી. 22 અન્ય દેશોએ પણ ગાઝામાં સંપૂર્ણ સહાય પુનઃસ્થાપિત કરવા હસ્તાક્ષર કર્યા. ઈઝરાયલી PM બેન્જામિન નેતન્યાહૂએ આ દેશો પર વળતો પ્રહાર કર્યો, કહ્યું કે તેઓ હમાસના હુમલાઓને પ્રોત્સાહન આપે છે. સોમવારે, ત્રણ મહિના બાદ પાંચ સહાય ટ્રક ગાઝામાં પ્રવેશી, પરંતુ યુએનના જણાવ્યા મુજબ, ખાદ્ય ભંડાર ખતમ થઈ ગયો છે, અને ભૂખમરોનો ખતરો વધ્યો છે.
ઈઝરાયલે 2 માર્ચ, 2025થી ગાઝામાં ખાદ્ય સહાય પર પ્રતિબંધ મૂક્યો હતો, પરંતુ આંતરરાષ્ટ્રીય દબાણ બાદ નેતન્યાહૂએ મર્યાદિત સહાયને મંજૂરી આપી. ટાઇમ્સ ઓફ ઈઝરાયલના અહેવાલ મુજબ, ઈઝરાયલી યુદ્ધ મંત્રીમંડળે આ નિર્ણય લશ્કરી સલાહ પર લીધો, જોકે ઘણા મંત્રીઓ, જેમાં આંતરિક સુરક્ષા મંત્રી ઈટામર બેન ગ્વીરનો સમાવેશ થાય છે,એ આની વિરુદ્ધ હતા, તેને “હમાસને ઓક્સિજન” આપવાનું ગણાવ્યું. ગાઝામાં સહાયનું વિતરણ અમેરિકન એજન્સી GHF દ્વારા થશે, જે ઈઝરાયલી સેનાની દેખરેખ હેઠળ ચાર વિતરણ કેન્દ્રો ખોલશે. યુએનએ GHFની નિષ્પક્ષતા પર સવાલ ઉઠાવ્યા, કહ્યું કે તે તેમની સાથે કામ નહીં કરે.
ગાઝામાં ઈઝરાયલના હુમલાઓમાં એક અઠવાડિયામાં 464 પેલેસ્ટિનિયન માર્યા ગયા, જેમાં રવિવારે 151નાં મોત થયા. ઈઝરાયલે હમાસના 670 લક્ષ્યો પર હુમલા કર્યા. ગાઝામાં 20 લાખ લોકો બેઘર થયા, અને માનવતાવાદી સંકટ ગંભીર બન્યું છે. કતારમાં ઈઝરાયલ-હમાસ વચ્ચે યુદ્ધવિરામની વાટાઘાટો નિષ્ફળ રહી. નેતન્યાહૂએ કહ્યું કે બંધકો મુક્ત થયા બાદ જ કાર્યવાહી ધીમી પડશે. સંયુક્ત રાષ્ટ્રે ચેતવણી આપી કે ગાઝામાં દુકાળનો ખતરો નજીક છે.
