અમદાવાદ: ગણેશ ચતુર્થીના પવિત્ર અવસરે (14 સપ્ટેમ્બર) રાજ્યભરમાં મેઘરાજાએ ધમાકેદાર બેટિંગ કરી છે. બાપ્પાના આગમનને વધાવતા હોય તેમ ભારે વરસાદ વરસી રહ્યો છે, જેના કારણે અનેક વિસ્તારોમાં જળબંબાકાર જેવી સ્થિતિ સર્જાઈ છે.
અમદાવાદમાં મેઘ તાંડવ
શહેરમાં આજે કાળા ડિબાગ વાદળોની ઘેરાબંધી અને અંધારપટ વચ્ચે ભારે પવન સાથે ધોધમાર વરસાદ વરસી રહ્યો છે. અંધારા અને ઘટેલી વિઝિબિલિટીને કારણે વાહનચાલકો માટે રસ્તા પરથી પસાર થવું મુશ્કેલ બન્યું છે.
- રેડ એલર્ટ જાહેર: અમદાવાદમાં કાળા ડિબાંગ વાદળો અને અંધારપટ વચ્ચે વ્યાપક વરસાદ વરસ્યો છે, જેને પગલે હવામાન વિભાગે રેડ એલર્ટ જાહેર કર્યું છે.
- વટવા-લાંભામાં જળબંબાકાર: માત્ર બે કલાકમાં વટવા અને લાંભામાં 5 ઇંચ વરસાદ ખાબક્યો છે.
- ઝીરો વિઝિબિલિટી: બપોરે પણ અંધારું છવાઈ જવાથી વાહનચાલકોને હેડલાઇટ ચાલુ રાખવી પડી હતી.
- વાસણા બેરેજ ખુલ્લો: સાબરમતી નદીનું જળસ્તર નિયંત્રિત કરવા માટે વાસણા બેરેજના 3 દરવાજા 1 ફૂટ સુધી ખોલવામાં આવ્યા છે.
રાજ્યના અન્ય વિસ્તારોમાં વરસાદી માહોલ
- સૌરાષ્ટ્રમાં પૂરની સ્થિતિ: જૂનાગઢમાં સિઝનમાં પ્રથમવાર કાળવા નદીમાં ઘોડાપૂર આવ્યું છે અને ઉપલા દાતાર પર્વત પરથી પાણી ધસમસતા વહેવા લાગ્યા છે. વિલિંગ્ડન ડેમ ઓવરફ્લો થવાની આરે છે.
- ગીરમાં હાશકારો: તાલાલા ગીરમાં ધોધમાર વરસાદથી ખેડૂતોના સૂકાતા પાકને નવું જીવન મળ્યું છે.
- સૌથી વધુ વરસાદ: સવારના 6થી 10 વાગ્યા દરમિયાન આણંદના બોરસદમાં 4.52 ઇંચ અને ગોધરામાં 3.39 ઇંચ વરસાદ નોંધાયો છે.
- વડોદરા અને અન્ય શહેરો: વડોદરામાં રસ્તાઓ પાણીમાં ગરકાવ થયા છે, છતાં બાપ્પાના આગમનના ઉત્સાહમાં જરાય ઓટ આવી નથી.
આગામી 4 વાગ્યા સુધી અમદાવાદ અને ગાંધીનગરમાં છૂટાછવાયા સ્થળોએ 41થી 61 કિમી/કલાકની ઝડપે પવન અને વીજળીના કડાકા-ભડાકા સાથે ભારે વરસાદ (15 મીમી/કલાકથી વધુ) થવાની શક્યતા છે.
