ઈન્દોર: ડોમેસ્ટિકમાં ગુજરાત ટીમનો ઓપનર અને વિકેટકીપર ઉર્વિલ પટેલ T-20 ફોર્મેટમાં સૌથી ઝડપી સદી ફટકારનારો ભારતીય બેટર બની ગયો છે. તેણે બુધવારે સૈયદ મુશ્તાક અલી ટ્રોફીમાં ત્રિપુરા સામે માત્ર 28 બોલમાં સદી ફટકારી હતી. આ મેચ ઈન્દોરના હોલકર સ્ટેડિયમમાં રમાઈ હતી. ઉર્વિલ પહેલાં આ રેકોર્ડ રિષભ પંતના નામે હતો. જેણે 2018માં આ જ ટુર્નામેન્ટમાં હિમાચલ પ્રદેશ સામે 32 બોલમાં સદી ફટકારી હતી. ઉર્વિલે 35 બોલમાં અણનમ 113 રન બનાવ્યા હતા, જેમાં 12 સિક્સ અને 7 ફોર ફટકારી હતી.
ત્રિપુરાએ પ્રથમ બેટિંગ કરીને 20 ઓવરમાં 8 વિકેટે 155 રન બનાવ્યા હતા. જવાબમાં ગુજરાતે માત્ર 10.2 ઓવરમાં 2 વિકેટે 156 રન બનાવીને જીત મેળવી હતી. ઉર્વિલે ટીમને 8 વિકેટે જીત અપાવી હતી. તેણે ઓપનર આર્યન દેસાઈ સાથે પ્રથમ વિકેટ માટે 150 રનની ભાગીદારી કરી હતી.
ઉર્વિલ T-20 ક્રિકેટમાં સૌથી ઝડપી સદી ફટકારનારો વિશ્વનો બીજો બેટર બની ગયો છે. તેના પહેલાં એસ્ટોનિયાના સાહિલ ચૌહાણે સાયપ્રસ સામે 27 બોલમાં સદી ફટકારી હતી. ત્રીજા નંબર પર વેસ્ટ ઈન્ડીઝનો ક્રિસ ગેલ છે. તેણે IPL-2013ની સિઝનમાં પુણે વોરિયર્સ સામે RCB તરફથી રમતી વખતે 30 બોલમાં સદી ફટકારી હતી. T-20 ઈન્ટરનેશનલમાં ભારત માટે સૌથી ઝડપી સદી ફટકારવાનો રેકોર્ડ રોહિત શર્માના નામે છે. તેણે 2017માં શ્રીલંકા સામે 35 બોલમાં સદી ફટકારી હતી.
