24 કલાક ફરજ બજાવતી પોલીસને ભોજન પહોંચાડતા યુવાનો

રાજકોટઃ ચીનના વુહાનમાંથી જન્મેલા કોરોના વાયરસે આખા વિશ્વને પોતાના બાનમાં લીધું છે. ભારતમાં પણ કોરોના વાયરસે પોતાનો કહેર વરસાવ્યો છે. ગુજરાત સહિત ભારતના કેટલાય પ્રદેશો લોકડાઉન છે. ગઈકાલે લોકડાઉન હોવા છતાં લોકો ઘરની બહાર નીકળી રહ્યા હતા ત્યારે સરકારે પોલીસને છૂટ આપી છે કે લોકોને કામ સિવાય બહાર નીકળવા ન દેવા. એવા સમયે પોલીસની જવાબદારી વધી ગઈ છે. એ અત્યારે 24 કલાક ફરજ બજાવી રહી છે.

પોતાના પરિવારની પરવાહ કર્યા વગર પોલીસ ફરજ બજાવી રહી છે ત્યારે પોલીસ જવાનોને જમવાનું મળી રહે એ માટે રાજકોટના 5 સેવાભાવી યુવાનો પોલીસ માટે કારમાં જમવાનું લઈને ચોકે ચોકે પહોંચાડી રહ્યા છે.

વિજય સોલંકી નામનો યુવાન ચિત્રલેખાને કહે છે પોલિસ આપણા માટે સેવા બજાવી રહી છે ત્યારે માનવતાના ભાગરૂપે અમે આ કરી રહ્યા છીએ. અમે પણ બધી તકેદારી રાખીને પોલીસના ફરજ પરના જવાનોને ચા, નાસ્તો અને જમવાનું આપી રહ્યા છીએ. બધાને વિનંતી કે ઘરમાં રહો પોલીસ જે કહી રહી છે એ આપણા માટે છે.

રાજ્યમાં લોકડાઉનના કારણે અત્યારે બધું બંધ હોવા છતાં લોકો ચા પાન કે દવાખાનના બહાના હેઠળ લટાર મારવા બહાર નીકળી રહ્યા છે. ત્યારે સતત આપણી સેવામાં અને આપણી તકેદારી માટે પોતાના પરિવારને છોડી ને પોલિસ ફરજ બજાવી રહી છે એનું ઉદાહરણ એટલે રાજકોટ શહેરના ડીસીપી ઝોન 2  મનોહરસિંહ જાડેજા. એમનો પુત્ર આંતરડાની બીમારી સબબ ખાનગી હોસ્પિટલમાં સારવાર હેઠળ હોવા છતાં ફરજ ઉપર હાજર રહી ને ફરજ નિષ્ઠાનું ઉત્કૃષ્ટ ઉદાહરણ પૂરું પાડી રહ્યા છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]